1 Akupin

Tawit jaak Saramúṉkan akatrámu

2 Tawit jákatin ishichik ajas ni uchirí̱n Saramúṉkan akateak, 2 “Ashí aents ni uuntri̱ ayamuwearmanumaṉ ayamutin ainia núnisnak wisha ju̱ nuṉkan ikiuakuisha áishmaṉ asam kakaram ajasam pujutá. 3 Ame Úunt Yusrum ashí akupkámu umiktin chicham ni wakerana nuja̱i̱ métek tuke enentáimji̱a̱i̱ umirkata. Túrakum ashí akupkámun Muisaisan áamtikramia nuja̱i̱ métek túrata. Nu túrakmeka émkattame. Nuyá̱ ame takatrumsha núnisaṉ tuí̱ṉkish wekaittiam nui̱sha ashí péṉker arutrámtiatui. 4 Kame Uunt Yus yaunchu nekas umiktatjai tusa chichartak ‘Yamaisha tura ukunmasha ame uchiram nekas enentáiji̱a̱i̱ tura wakaní̱ji̱a̱i̱ Winia umirtukar péṉker wekainiakuiṉkia amé weanak Israer nuṉkanam akupin ártí tusan tsaṉkatkartatjai’ turutmia nuja̱i̱ métek umiṉki̱ wetí tusam túrata. 5 Núnisaṉ Sarwia uchirí̱ Juap warí itiurtukma nu amesha nékame. Nui̱ jimiará Israer shuar suntara úuntri̱n Nera uchirí̱ Ápneran tura Jetera uchirí̱ Amasan mesetka atsamunam máiniak mesetnum túrutai̱ya núnis numpen ukatainiak tura emenmamkari̱ncha nuyá̱ sapatri̱ncha númpak ajaschamkia. 6 Tuma asamtai ámeka nekatairmiji̱a̱i̱ itiurkamnia nekapeam núnismek túrata. Peṉké weamas jakati tusam iniaisaip.

7 Antsu Karaatnumia̱ Parsirái uchirí̱ ainia nuka waitnentrarta túram ame yurummena nui̱ ekentram ayurawarta. Warí ame yatsumíya̱ Apsarúnai̱ya̱ pisara weai̱ niṉkia ayamprutkarmai. 8 Antsu Piṉjiamín shuar Pajurímniumia̱ Jera uchirí̱ Semaikia Majanáimnium weai̱ wáitsar jákatniunam wíniaka yumiṉkrurmai. Túrasha ámiji̱a̱i̱ pujawai. Tura yumiṉkrú ajakiat Jurtan entsanam iṉkiuṉkamtai nekas tajai tákun Uunt Yus íimmianum ‘puya̱ja̱i̱ṉkia máshtatjame’ tímiajai. 9 Tura yamaikia tsaṉkuraip. Ámeka neka áishmaṉkaitme. Niji̱a̱i̱ warí itiurkatniua wakeram ame Iistá. Peṉké weamsamtaisha niṉki jakati tusam iniaisaip antsu maatá” tímiayi.

Tawit jakamtai ikiusma

10 Tura úunt akupin Tawit jaka ni uuntri̱ ayamprarmia núnis nisha ayamumiayi. Túrunamtai Tawit Péprunam iwiarsarmiayi. 11 Kame Tawit Israer shuarnum akupin ajas pujumia nui̱ Eprunnumka siati uwí tura Jerusaréṉnumka traintitráis uwí akupin ajasmiayi. Tura ashí irurmaka kuaraintia uwí úunt akupin ajas pujusmiayi. 12 Tura ni aparí̱ Tawit akupku pujutái̱ri̱n Saramúṉsha pujusmiayi. Nui̱ṉkia nisha nekas ímiatrus akupin ajasmiayi.

Saramúṉ Atuníasan maamu

13 2:13-14 Nuya̱ṉka Akiitia uchirí̱ Atunías Saramúṉka nukurí̱n Pitsawín werimiayi. Túram chichareak “¿Péṉker enentái̱ji̱a̱i̱ṉ taum?” tutai nisha chichaak “Ee péṉker enentái̱ji̱a̱i̱ tajai túrasha ju̱na títinian wakerajai” tímiayi. Takui̱ “chichakta” tutai chichaak 15 2:15-16 “Ámeka nékame akupkatniuka winia amai núnisaṉ ashí Israer shuar akupin ajasat tusa winia iiriarmai. Túrasha Uunt Yus tiniu asamtai yamaikia winia yatsurnaiti. Tuma asamtai wi seattajmena nu nakitrutraip” tímiayi. Takui̱ “chichakta” tutai chichaak 17 “Waitneasam akupin Saramúṉ Awisákan surusat wi nuatkataj seatritia. Warí áminkia suritrámkashtatui” tímiayi.

18 2:18-19 Tutai Pitsawí chichareak “Wátsek nui̱ṉkia akupniun áujtustajme” tímiayi. Nuya̱ṉka Atuníasan áujtustajtsa Pitsawíkia akupin Saramúṉkan werimiayi. Tura waya̱kui akupniúka wajatki̱ tsuntsumpruá waketki̱ pujusmiayi. Tura akupniu nukurí̱ chichaak 20 “Jú̱chiniak seatniun wakerajme túrasha suritrukaip” tímiayi. Tutai akupin chichaak “Nukuru seattiá suritkiashtatjame” tímiayi.

21 Tutai nukurí̱ chicharuk “Súnemnumia̱ Awisákka ame yátsum Atunías sunasti” tímiayi.

22 Tutai akupin Saramúṉ nukurí̱n chicharuk “¿Urukamtai Súnemnumia̱ Awisákka Atunías sunasti tusamsha seateam? Nui̱ṉkia wi akupeamusha ni seattia. Warí niṉkia wíji̱a̱i̱ṉkia úuntchakait tura Yúsnan pujurin Awiatársha núnisaṉ Sarwia uchirí̱ Juapsha ¿níjia̱i̱ṉchak pujuinia?” tímiayi.

23 2:23-25 Nuya̱ṉka akupin Saramúṉ nekas túrattajai tusa Uunt Yusan pachis chichaak “Atuníaska yamaik jakattawai tura nuna umikchamtaisha Yus íirsati” tímiayi. Nuya̱ṉka Juyata uchirí̱ Piniayásan akuptuk Atuníasan mámtikiamiayi.

Saramúṉ Awiatáran Juapja̱i̱ ji̱i̱kiarma

26 2:26-35 Nuyá̱ akupin Yúsnan pujurniun Awiatáran chicharuk “Ame nuṉkemín Anatútnum wetá. Warí amesha jákatniuitme túrasha winia apar Tawit iwiaakai̱ Uunt Yus Aentsja̱i̱ Chícham Najanamu Eṉketai̱ júkin asakmin máshtatjame” tímiayi. Nuja̱i̱ Uunt Yus Irí aentsun timia nu uminkiamiayi. Tura Juapsha nuna antuk Atuníasa nemarka asa pisarmiayi. Túruna Uunt Yus aujtai̱ je̱a̱nam wayá̱ Uunt Yus áestutai̱ kachuri̱n achimkiámiayi. Nuya̱ṉka úunt akupin ujakam Piniayásan Juap maatá tusa akupkámiayi. Nuya̱ṉka Piniayás Juápan jearí chichareak “Akupin jíinkiti túramui” tímiayi. Tutai Juap chichaak “Jíinkishtatjai antsu ju̱i̱ṉ jakattajai” tímiayi. Takui̱ akupniun waketruki̱ “Juapka ju̱i̱ṉ jakattajai tawai” tímiayi. Tutai akupin “Ni tana nútiksamek túrata túram iwiarsata. Warí winia apar Tawitkia nekaachmanak aentsun níji̱a̱i̱ṉkia péṉkeran máwarmiayi. Israernumia̱ suntara uuntri̱ Ápneran tura Jutanmaya̱ suntara uuntri̱ Amasancha máwaru asa yajauch yumiṉkkia níniak tura ní tiraṉki̱niak jeariarti. Antsu Tawit shuarka aṉkant matsamsati” tímiayi. Akupin takui̱ Piniayás werí maa ní je̱e̱ni̱ṉ iwiarsamiayi. Nuyá̱ Juápai̱ya̱ṉka Piniayásan suntara uuntri̱ awajsámiayi. Núnisaṉ Awiatárai̱ya̱ṉka Satukan Yúsnan pujurin awajsámiayi.

Semái maamu

36 2:36-46 Nuya̱ṉka Semainkia akupin untsuk chicharuk “Yamaikia Jerusaréṉnum je̱a̱mam pujusta. Túrasha tui̱ṉsha weep. Tura nekaata ju̱yá̱ jiinkim Kitrun ashints katitkiumka nekas mantamnattame” tímiayi. Tutai Semái chichaak “Ayu péṉkeraiti tura ame takartámniuka támena tímiatrusaṉ umiktatui” tu ái̱kmiayi. Tura menaintiú uwí naṉkaamasmanum jimiará takarniúri̱ pisarar Káatnumia̱ akupin Maaka uchirí̱ Ákis pujamunam wéarmiayi. Semaisha nuna nekáa Káatnum we ni takarniúri̱n ataksha awaiṉkiarmiayi. Nuya̱ṉka akupin Saramúṉ Semain untsuk chicharuk “Ju̱ya̱ṉka jiinkip tíchamkajam tura ju̱yá̱ jiinkim tui̱ṉsha wémeka nekas mantamnattame takui̱ Uunt Yussha íimmianum péṉkeraiti tura tímiatrusnak ‘umiktatjai’ tíchamkam túrayatmesha ¿urukamtai umikcham? Núnismek winia apar Tawit tí itiurchat awajkáman nusha nékame. Tuma asakmin Uunt Yusak amincha nu yajauchin awaṉturmakní̱. Túrasha Saramúṉka shiir awajsamu átatui tura Tawitia pujutái̱ri̱ṉkia Uunt Yus iismasha tuke átatui” tímiayi. Nuya̱ṉka akupin chichaak “Semái maatá” tutai Piniayás Semain mámiayi. Nuna tura ni nemasri̱n amuk akupin ajas itit awajsachma péṉker pujusmiayi.