1 Akupin

Shíwianmaya̱ úunt akupin nuwa̱ Saramúṉkan tarimiú

10 Tura Shíwianmaya̱ úunt akupin nuwa̱ Saramúṉkan Uunt Yus tí neka naṉkamantu awajsaiti táman antuk anintramu nekaachminia nuja̱i̱ nekapsataj tusa tarimiayi. 2 Tura niji̱a̱i̱ untsurí aents nemarkainia, kuṉkuinian tura tí nukap kurin nuyá̱ tí shiirmach kayancha kamiyun áentskar Jerusaréṉ péprunam tariarmiayi. Tura Saramúṉkan tarí ni anintrústaj tu enentáimmia núnaka mash anintrúsmiayi. 3 Tura Saramúṉsha nuwa̱ nekaachminian anintrúsmia núnaka ishichkisha tujintsuk mash ái̱kmiayi. 4 Úunt akupin nuwa̱ Shiwia nuṉkanmaya̱ Saramúṉka nekatairi̱n tura je̱a̱ je̱a̱mkamuncha wainkiamiayi. 5 Núnisaṉ ni yurumtairi̱n tura ni takarniúri̱ matsamtairi̱ncha takakmakur iwiarmamtairi̱ncha nuyá̱ umutairi̱n suu armia nunasha tura Uunt Yusa Je̱e̱n Yusan takamtsuk áestimia nunasha ashí wainiak jaka ii wajatmiayi. 6 Tura úunt akupniun chicharuk “Winia nuṉkarui̱ pujusnak ame túramun tura nekatai̱rmincha ashí áujmatman antimiaj nuka nekasaiti. 7 Ju̱i̱ táachkunka chichaman ántaknasha nekasaiti tíchamjame. Túrasha yamaikia ímia winia jí̱ruja̱i̱ṉ wainkiajai. Kame ímiajunka ujattsuk ájapeni̱ṉ ujatiarmai. Túrasha ame túramurmiji̱a̱i̱ nuyá̱ nekatairmiji̱a̱i̱sha nekas naṉkamantuitme. 8 Ame takartámniusha tura ámiji̱a̱i̱ pujuinia nusha ame nékamurmiji̱a̱i̱ warasarti. 9 ¡Kame ame Úunt Yusrumka ti shiir awajnásti. Waras Israer shuara úunt akupniúri̱ atí tusa akuptámkaiti! Uunt Yus Israer shuaran tuke anea asa nekasa nuja̱i̱ péṉker akupkatniun anaitiamak apujtamsaiti” tímiayi. 10 Nuna tinia nuwa̱sha kurí kijintri̱nkia siantu painti tarentu jeá tura kuṉkuinniasha tí nukap nuyá̱ shíirmach kayancha susamiayi. Kame úunt akupin nuwa̱ Shiwia nuṉkanmaya̱ Saramúṉkan susamia nuka yáunchusha súchatai̱ji̱a̱i̱ naṉkaamas susamiayi.

11 Nuya̱sha Jirama kanuri̱ji̱a̱i̱ Upirnumia̱ kurin nuyá̱ sántaru numin nuyá̱ shíirmach kayancha ikiankarmiayi. 12 Tura úunt akupin sántaru numiji̱a̱i̱ṉkia Uunt Yusa Je̱e̱n tura úunt akupniu je̱e̱n pauri̱ncha najatkamiayi. Nuyá̱ tuntuiyatniun unuimiátka ainia núnan árpancha tura ke̱e̱rnasha najatkamiayi. Kame sántaru numia timianú péṉkernaka nú yaunchusha ikiankacharmiayi. Tura yamaiya̱ ju̱i̱sha tímianuka peṉké wáinchatainti.

13 Núnisaṉ úunt akupin nuwa̱ Shíwianmaya̱ seataj tusa enentáimtimia nunakcha antsu úunt akupin Saramúṉsha tsaṉka asa nuna naṉkaamas susamiayi. Nui̱ṉkia úunt akupin nuwa̱ ni takarniúri̱ji̱a̱i̱ nuṉke̱n waketkiarmiayi.

Saramúṉ kuítriniamu tura nekatairi̱

14 Kame Saramúṉnaka ashí uwitin kurí kijintri̱ saisiantu sasaintisáis tarentu jean akuptiarmiayi. 15 Nu arantcha nu nuṉkanmaṉ uuntri̱ akíarmia nunasha tura súrin armia núnancha nuyá̱ ashí úunt akupin Arapia nuṉkanmaya̱ akuptiarmia nunasha achimiayi. 16 Tura úunt akupin Saramúṉ tusiantu tantar úuntan kuri iwiarkamuja̱i̱ najankamiayi. Nuyá̱ chikichik tantara kijintri̱ṉkia saisiantu sikru jeá ármiayi. 17 Núnisaṉ chikichnasha traisiantu tantar yáirchin kuri iwiarkamuja̱i̱ najankamiayi. Tura nu tantarka aṉkant aṉkant kuri menaintiú ripra jeaja̱i̱ najankamu ármiayi. Nuna tura úunt akupin pujutai̱ “Ríwianu Kampuntin Je̱a̱” náartinnium ikiusmiayi. 18 Nuyá̱ úunt akupin Saramúṉsha akupin pujutai̱n tí uuntan yajasma wajinki̱ji̱a̱i̱ tura kuri unuikmaja̱i̱ eteṉkar najanamiayi. 19 Tura akupin pujustaj tusar watai̱ jatera najatamuri̱sha sais ármiayi. Nuyá̱ atumtai̱ri̱nkia tenteár najatar tura mái̱ yantamen kunturi̱ awa̱tai̱ri̱sha najatamuyayi. Nui̱ ayaam mái̱ yantam úunt ya̱wa̱ jímiar najanar awajtúsmauyayi. 20 Núnisaṉ watai̱ jatera najanamu sais asamtai úunt ya̱wa̱ tuse najanamu ju̱í̱ni̱sha sais tura atuni̱sha sais wajarmiayi. Kame chíkich nuṉkanam úunt akupin pujú armia nui̱sha tímiatrusar najankamu peṉké wáinchatai̱yayi. 21 Úunt akupniu Saramúṉka umutairi̱sha aya kúrik ármiayi. Núnisaṉ “Ríwianu Kampuntin Je̱a̱” náartinnium piniṉ irunmia nusha kuitji̱a̱i̱ najanachma antsu aya kúriji̱a̱i̱ṉ najankamu ármiayi. Warí Saramúṉ pujumia nui̱ṉkia kuít jiruka peṉké ántrauyayi. 22 Kame úunt akupin Saramúṉ untsurí uunt kanun Társesnumia̱n nuyá̱ Jirama uunt kanuri̱ncha nayantsanam wekatain takaruyayi. Tura menaintiú uwitin Társesnumia̱ chikichkí táiniak kurincha, kuítniasha yajasma wajiṉki̱ncha washincha tura papu rearnasha ikiati̱á̱rmiayi.

23 Kame úunt akupin Saramúṉka chíkich akupin armia núja̱i̱sha naṉkaamas nekatairi̱ji̱a̱i̱sha tura kuítri̱ji̱a̱i̱sha páantniuyayi. 24 Tuma asamtai ashí nuṉkanmaya̱ aents armia nusha Saramúṉkan Yus nekatai̱n susamia nuja̱i̱ chichamun anturkatai tusar káutiarmiayi. 25 Tura ashí uwitin iyuttsa ashintiuiniak warinkish kuitji̱a̱i̱ tura kuriji̱a̱i̱ najankamuncha, tarachniasha, mesetnum mánaitiaincha, kuṉkuinniasha, kawaincha tura umpuruncha juriarmiayi. 26 Tura Saramúṉ mir kuatrusiántu kárun tura tuse mir kawainium entsamta unuimiátrarun irurarmiayi. Tura karu matsamtai̱ péprunam nuyá̱ Jerusaréṉnum úunt akupin pujamunam matsasármiayi. 27 Tura akupin Saramúṉ kuít jirun ti iruru asamtai kayaja̱i̱ métek irunmiayi. Núnisaṉ sétrusha ti irurma asa sikiumúruja̱i̱ métek náṉkamas irunmiayi. 28 Kame Saramúṉka kawairi̱ṉkia Ejiptunmaya̱ tura Kuánmaya̱ ármiayi. Tura Kuánam úunt akupniun sumari̱n armia nuka kuitji̱a̱i̱ métek sumariarmiayi. 29 Kame Ejiptu nuṉkanmaya̱ ikiankamu chikichik karu kuítri̱ṉkia saisiantu ármiayi. Tura chikichik kawái kuítri̱ṉkia siantu seṉkuintia ármiayi. Núnaka Saramúṉka takarniúri̱ Jet aentsu úunt akupniuri̱ tura Sírianmaya̱ aentsu úunt akupniuri̱ armia nui̱ surutiarmiayi.