1 Akupin

Yus Saramúṉja̱i̱ chícham najanamu

9 Nuyá̱ Saramúṉsha Uunt Yusa Je̱e̱n nuyá̱ úunt akupin pujutai̱ je̱a̱ncha amuk tura ni túrataj tu enentáimmia núnaka ashí umikiu ai̱ 2 Uunt Yus Saramúṉkan Kapaunnum wantintiukmia nútiksaṉ ataksha wantintiukmiayi. 3 Nuyá̱ Uunt Yus chicharuk “Ame seatmena nuna anturkajme tura nu je̱a̱ je̱a̱rtinmena nui̱ winia Naar tuke shiir awajtai̱ asamtai ti shiir imiatkincha awajsájai. Tuma asamtai tuke tsawant shiir enentáimtusan wainkiatjai. 4 Tura ámeka ame apa Tawit Wi akupkámu chichaman nekas enentái̱ji̱a̱i̱ umik ímiatrus túrimia nútiksam túrakminkia 5 ame apa Tawitian nekas umiktatjai tusan chicharkun ‘Israer shuarnum amé weanmaya̱ṉ tuke akupin átiniaiti’ tímiaj núnisaṉ aminí̱ya̱ Israernumka tuke úunt akupin ártiniaiti. 6 Tura atumsha núnisaṉ atumí uchirí̱sha Wi akupkámu chicham umitsuk Wini̱ya̱ kanakrum chíkich yus enentáimtakrumni̱ṉkia 7 Wi Israer shuaran nuṉkan súsarmiaj nuya̱ṉka ji̱i̱ran akuprartatjai. Tura Winia náarun Shiir Awajtai̱ Je̱a̱ atí tusan imiatkincha awajsámaj nunasha ajapa ikiuktiatjai. Túramtai Israer shuarka ashí nuṉkanmaya̱ aents áujmattsar wishiktai̱ juákartatui. 8 Ántsaṉ ju̱ Je̱a̱ imiá páantniua ju̱na ashí nuní̱ naṉkaamainia wáinkiar wishikiainiak ‘¡Aaj, ju̱sha! ¿Urukakua jú̱nikiuit? ¿Urukamtaik ju̱ nuṉkancha tura Yusa Je̱e̱ncha Uunt Yussha jú̱tikiait?’ tiártatui. 9 Tuíniakui ‘Warí Uunt Yus ni Yusri̱ Ejiptu nuṉkanmaya̱n ni we̱a̱trí̱n ji̱i̱r yaruakmia nuna nekas enentáimtustinian iniaisar ántar yusan tikishmátrar shiir awajáiniakui Uunt Yus ashí itiurchatja̱i̱ sumamtikiawaruiti’ tiártatui” tímiayi Uunt Yus Saramúṉkan.

Saramúṉ Jiraman akikma

10 9:​10-14 Nuyá̱ painti uwí Uunt Yusa Je̱e̱n tura úunt akupin pujutai̱n Saramúṉ je̱a̱mak umikmiayi. Nu je̱a̱nka sétur tura sepris numincha núnisaṉ kurin Tírunmaya̱ úunt akupin Jiram akuptúrmia nuja̱i̱ je̱a̱mkamiayi. Tura painti pepru Kariréa nuṉkanam armia nuna úunt akupin Saramúṉ Jiraman suramiayi. Túrasha Jiramka núnaka wakerukchamiayi. Nu nuṉkanka Kawur* anaikiamiayi tura yamaisha tuke núnisaṉ tuíniawai.

Chíkich takat Saramúṉ najankamu

15 9:​15-19 Tura úunt akupin Saramúṉka Uunt Yusa Je̱e̱n tura ni je̱e̱n je̱a̱mkattsa núnisaṉ Jerusaréṉka wenuke̱n najatkattsa nuyá̱ Ásur Mikitiu tura Jeser péprun je̱a̱mkattsa Israercha aents akikmaktinia núnis takatja̱i̱ akikmakarat tusa nú aentsun irurmiayi. Kame Ejiptunmaya̱ akupin Parauṉ Jeser péprunka tarí atá̱i̱ ekemak Kanaan aentsnaka ashí kajeṉmiayi tura ni nawantri̱ Saramúṉja̱i̱ nuatnaiyakui nú peprun nawantri̱n susamiayi. Tuma asamtai nunasha iwiarkamiayi. Nuyá̱ Nuṉkach Pitjurunan, Paraatnasha tura Tamarnasha núnisaṉ yurumak ikiutai̱ pepru, ántsaṉ kawái nuyá̱ kawainium ekeemin matsamtai̱ Jerusaréṉnum tura Ríwianunmasha je̱a̱mkamu armia nunasha ashí iwiarkamiayi. Wariṉkish je̱a̱mkatniun wakerimia nunasha ashí nu nuṉkanam túrimiayi.

20 9:​20-23 Ashí aents Amur, Jet, Píris, Jep tura Jípius aentsun Israer shuar amuktinian tujintkiarmia nuna uchirí̱n takakmastinniaka irurarmiayi. Antsu Israer shuarnaka chikichkiṉkisha takakmastinniaka achikchamiayi. Warí niṉkia mesetnum mánin tura yaintri̱ núnisaṉ suntara uuntri̱ tura kárun ewekámin nuyá̱ kawainium ekeemin ármiayi. Tura nu arant takatan wáinin kiniantu seṉkuintia ármiayi tura takakmainiancha niṉki wainiarmiayi.

24 Núnisaṉ Parauṉka nawantri̱sha Tawitia Pépruri̱ya̱ jiinkí̱ Saramúṉ je̱a̱n je̱a̱rmia nui̱ támiayi. Nuyá̱ Mírun kumpin je̱a̱ncha je̱a̱mmiayi.

25 Saramúṉsha ashí uwitin ni najanamua nú aestutai̱niam Uunt Yusan shiir awajuk tura taṉkun maa takamtsuk áeseamuncha tura kuṉkuinniasha chikichik uwitini̱ṉ menaintiú Uunt Yusan áestimiayi.

26 9:​26-28 Núnisaṉ úunt akupin Saramúṉka Etum nuṉkanam Iratnum tíjiu̱ch Isiunjipírnum Kapantin Nayantsa yantamén uunt kanun najankamiayi. Tura Jiramsha ni takarniúri̱n nayantsanam wekaatan unuimiátkarun kanunam yujá áinian Saramúṉka takarniúri̱ji̱a̱i̱ métek akuprámiayi. Túram Upirnum wéar kurin júkiar kuatrusiántu painti tarentun* úunt akupin Saramúṉkan itiariármiayi.