1 Akupin

Awías Yúsnan etserin Jirupuám túrunatniun ujakma

14 Tura nu tsawantin Jirupuáma uchirí̱ Awías jaa tepemiayi. 2 Túmakui̱ Jirupuám nuwe̱n chicharuk “Kame Jirupuáma núwe̱nte turamara̱i̱ waitneasam nekaachmin ajasam Siru nuṉkanam wetá. Nui̱sha Yúsnan etserin Ajías ame ju̱ aentsu akupniúri̱ átatme turutmia nu nui̱ pujawai. 3 Nui̱ wéakum tias paṉsha tura apatuk nanekmasha nuyá̱ míshkisha uwam jukitia. Tura nisha ju̱ uchi urukattawa nuna paant ujatmáktatui” tímiayi. 4 Tutai Jirupuáma nua̱ri̱sha ímiatrusaṉ iwiarnar Siru nuṉkanam wémiayi. Tura Ajíasa je̱e̱n je̱a̱miayi. Túrasha Ajíaska tí uuntach ajasu asa wáinmachmiayi. 5 Túrasha Uunt Yuska Ajíasan íiṉkiá ujak “Jirupuáma nuwé̱ ni uchirí̱ jáamun urukatiṉ ujatkai tusa nekaachminia ajak tarutmattawai. Tura tarutmamtaisha tájamna tímiatrusmek ujakta” tímiayi.

6 Tura Ajíassha nu nuwa̱ wáitiniam waya̱ttsa winiamun anturak chicharuk “Jirupuáma nuwe̱yá waya̱ta. ¿Urukakmea nékashtai̱ nuwa̱ áinkiamsha winiam? Witjiai ámin kúntuts chicham ujakai tusa akupkámuitjiai. 7 Kame waketkim Jirupuám jú̱nisam ujakta ‘Israer shuara Uunt Yusri̱ chichaak “Ashí Israer shuarnumia̱ Wi ámin páantin awajsan Israer shuaran akupin atí tusan anaikiamjame. 8 Tura Tawit shuar akupeamun atankin áminkia amasmajai. Túrasha ámeka Winia takartin Tawit Wi akupkámun núnisaṉ Wi támancha ti shiir enentáimtus Wi iismasha tí peṉker túrama núnisam túrachuitme. 9 Antsu ti yajauch túrakum ámiji̱a̱i̱ yaunchu akupin armia núja̱i̱sha naṉkaamas yajauch túraitme. Warí akajtuktaj tusam chíkich yus tura imintra nakumka najankamu ju̱i̱ti yus tusam enentáimtakum Wíniaka tuntupea iniaitiusuitme. 10 Tuma asamtai nekaata, Jirupuám aentsnaka yajauch awajkartatjai. Túrakun Israer nuṉkanam Jirupuám shuar aṉkant áiniana tura takarin áiniana nuya̱ncha ashí áishmaṉkan amukártatjai. Kame Jirupuám shuarka peṉké juákcharti tusan ijia japimkiar ajapatniua nútiksaṉ amumusartatjai. 11 Núnisaṉ Jirupuám shuar péprunam jákartatna núnaka ya̱wá̱ yuáwartatui. Tura kampunniunam jákartatna núnaka yaki̱ya̱ yajasma yuáwartatui” tawai Uunt Yus’ titiá. 12 Tuma asamtai yamaikia je̱e̱min waketkitia. Tura ame uchirmeka péprunam yama tarimmin jakattawai. 13 Túrunamtai ashí Israer shuar e̱a̱rar iwiarsartatui. Kame Jirupuám shuarka aya níchik iwiarsamu átatui tura Israera Úunt Yusri̱sha Jirupuám shuarnumia̱ṉka aya níchiniak péṉkertaku íisuiti. 14 Túrasha Uunt Yus Israer shuara úunt akupniuri̱ imia Niṉki anaikiattana nu tsawantai̱k Jirupuám aentsnaka mash amuktatui. 15 Túrasha pintiu entsa amuram urukawa nútiksaṉ Uunt Yus Israer shuarnaka kakaram awati umuchrattawai. Núnisaṉ ni úuntri̱n Uunt Yus péṉker nuṉkan súsarmia nuya̱ṉka ji̱i̱r Yúpratis entsa amaini̱ tsakiṉmakartatui. Warí numin najankamu yusri̱ enentáimtutai̱ awajsarmanum Aseran tikishmátainiak Uunt Yusan akajkaru ásarmatai núnaka túrattawai. 16 Tura Jirupuám tunaan túrak Israer shuarnasha tunaan túrumtikiawaru ásarmatai Israer shuarnaka chíkich aentsnum suruktatui” tímiayi Ajías.

17 Nuya̱ṉka Jirupuáma nua̱ri̱ṉkia waketki̱ Tirsa péprunam jeamiayi. Tura je̱e̱n waya̱ttsa wáitiri̱n tarimiai̱ úchikia jakamiayi. 18 Tura Uunt Yus takui̱ Yúsnan etserin Ajías tímiania tímiatrusaṉ ashí Israer shuar e̱a̱rar iwiarsarmiayi.

19 Kame Jirupuáma chíkich túramuri̱ṉkia núnisaṉ mesetnum mánaikmari̱sha nuyá̱ itiur akupkámia nusha Israernumia̱ Úunt Akupin Túrawarma Aatai̱ papinium aakma áiniawai. 20 Jirupuámsha paintitús uwí úunt akupin ajas pujusmiayi nuyá̱ jaka ni aparí̱ ayampramunmaṉ nisha ayamumiayi. Nuyá̱ ni uchirí̱ Natap úunt akupin ajasmiayi.

Jutanmaya̱ akupin Rupuam tura Sesak Jutan utsantuamu

21 Kame Saramúṉka uchirí̱ Rupuamka kuaraintiúnu uwí takaku Jutanam úunt akupin ajasmiayi. Tura Winia naar ju̱i̱ tuke atí tusa ashí Israer weanmaya̱ Jerusaréṉkan Uunt Yus anaikiamia nui̱ṉkia tiasisiáti uwí akupkámiayi. Tura ni nukurí̱ṉkia Amun aentsu nawantri̱ Naama náartiniuyayi. 22 Tura Jutanmaya̱ shuarsha ni we̱a̱tri̱ tunaan túrawarmia núna naṉkaamas Uunt Yus íimmianum ti yajauchin túruiniak Yusan ti akajkarmiayi. 23 Núnisaṉ ashí nainniumsha tura numi ukat ukatin wajamunam wakenmari̱ncha naint wákar najankamu yus enentáimtutai̱ncha nuyá̱ enentáimtutai̱ kayancha núnisaṉ Asera enentáimtutai̱ncha najankarmiayi. 24 Núnisaṉ nu nuṉkanam najankamu yusan enentáimtajai tiniu armia nu aya̱shi̱n tsaṉkamin áishmaṉ pujuarmiayi. Kame yaunchu Uunt Yus Israer shuaran Kanaan nuṉkanam awayá̱iniak aents nui̱ matsatainian ni iimiainiamunam ji̱i̱rar amukármia núna naṉkaamas Jutá shuarka mui̱jmiainian túrin ajasármiayi.

25 Nuya̱ṉka seṉku uwí akupin ajas Rupuam pujamunam Ejiptunmaya̱ úunt akupin Sesak Jerusaréṉ péprun jatekármiayi. 26 Tura Uunt Yusa Je̱e̱n núnisaṉ akupniu jé̱e̱ya̱ncha péṉker iruniarmia núnaka ashí yaruakarmiayi. Nuyá̱ Saramúṉ tantaran kuriji̱a̱i̱ najankamia nunasha mash yaruakarmiayi. 27 Nu yaruakma asamtai akupin Rupuam yaṉkú jiruja̱i̱ tantaran najanak suntara uuntri̱ akupniu je̱e̱n wá̱i̱ti̱a̱i̱ri̱n wainiarmia nuna wáinkiarat tusa súsarmiayi. 28 Tura akupin Rupuam Uunt Yusa Je̱e̱n wéakuiṉkia suntarka nú tantaran jukí̱ nemar wéarmiayi tura awaiṉki̱ suntar matsamtai̱niam nú tantarnaka ataksha ikiú wéarmiayi.

29 Tura Rupuama chíkich túramuri̱ṉkia núnisaṉ warinia najankamia nusha Jutanmaya̱ Úunt Akupin Túrawarma Aatai̱ papinium ¿áakchamuk ainia? 30 Tura Rupuamka Jirupuámja̱i̱ṉkia tuke mánaisaṉ pujuarmiayi. 31 Nuyá̱ Rupuamka ni aparí̱ ayamprarmia núnisaṉ nisha ayamumiayi. Tura Tawit péprunam aparí̱ iwiarsamu ainia nui̱ṉ nincha iwiarsarmiayi. Tura ni nukurí̱ṉkia Amun aentsu nawantri̱ Naama náartiniuyayi. Tura Rupuam jakamtai ni uchirí̱ Apías úunt akupin ajasmiayi.