1 Akupin
Jutanmaya̱ akupin Apías
15 Jirupuám Nawata uchirí̱ tiasiúchu uwí úunt akupin ajas pujamunam Apíaska Jutanam úunt akupin ajasmiayi. 2 Túruna menaintiú uwí Jerusaréṉnum akupkámiayi. Tura ni nukurí̱ṉkia Apisharúna nawantri̱ Maaka náartiniuyayi. 3 Kame Apíaska yaunchu ni aparí̱ yajauchin túramia nuja̱i̱ métek nisha túramiayi. Túmak Uunt Yus iismasha ni uuntri̱ Tawit péṉker wekasamia ímiatrus túrachmiayi. 4 Tuma asamtai shiripik keak tsáapin ajana núnis Jerusaréṉnum tsáapin atí tusa Uunt Yus ni Yusri̱ Tawitian anea asa susamiayi. Tura asa ni jakamtaisha ni uchirí̱n akupin awajtúsmiayi tura Jerusaréṉka tuke kakaram atí tusa túramiayi. 5 Tawitkia iwiaaku pujumia nui̱ṉkia Uunt Yus íimmianumsha tí peṉker túramiayi. Tuma asa Uunt Yus timia nuya̱ṉka peṉké kanakchamiayi. Antsu Jet aents Uríasan túramia núja̱i̱ṉ yajauchiṉkia túramiayi.* 6 Kame Apíaska iwiaaku pujumia nui̱ṉkia Jirupuámja̱i̱ṉkia tuke mesetja̱i̱ṉ pujú ármiayi. 7 Nuyá̱ Apíasa chíkich túramuri̱ṉkia núnisaṉ warinia itiurkamia nusha Jutanmaya̱ Akupin Túrawarma Aatai̱ papinium ¿áarchamukait? Tura Apíaska mésetnumaṉ Jirupuámja̱i̱ṉkia pujuarmiayi. 8 Nuyá̱ Apías jakamtai Tawit péprunam iwiarsarmiayi.
Túrunamtai ni uchirí̱ Asa akupin ajasmiayi.
Jutanmaya̱ úunt akupin Asa
9 Jirupuám painti uwí Israernum úunt akupin ajas pujamunam Ásaka Jutanam úunt akupin ajasmiayi. 10 Túruna kuaraintiúnu uwí Jerusaréṉnum akupkámiayi. Tura ni nukuchri̱ṉkia Apisharúna nawantri̱ Maaka náartiniuyayi. 11 Antsu Ásaka Uunt Yus iisam ni uuntri̱ Tawit túramia ímiatrusaṉ túramiayi. 12 Tura asa aya̱shi̱n kuitji̱a̱i̱ tsaṉkama armia nú áishmaṉnaka úunt akupin Ásaka nú nuṉkanmaya̱ṉka ji̱i̱r ishiakmiayi. Tura ántar yusan yaunchu ni uuntri̱ najankamu armia núnaka utsaṉkarmiayi. 13 Núnisaṉ ni nukuchri̱ Máakanka najanamu yus Aseran nakumak mui̱jmiainian najana asamtai nuwa̱ úunt akupniuya̱ nuya̱ṉka jí̱i̱kmiayi. Tura Ásaka mui̱jmiai̱ nakumkar najanamuya̱ núnaka emesak Kitrun ashintsanam áesamiayi. 14 Tura najanamu yus tikishmatai̱ armia nuna emeskachuitiat antsu Asa iwiaaku pujumia nui̱ṉkia Úunt Yusnaka nekas péṉker enentáimtimiayi. 15 Núnisaṉ Yúsnaiti tusa ni aparí̱ tura nisha akantúkmia núnaka kuít jirun núnisaṉ kurincha nuyá̱ Yusa Je̱e̱n takatai̱ncha Uunt Yusa Je̱e̱n ikiusmiayi.
16 15:16-19 Asaja̱i̱ Paasa akupin armia nuiṉkia tuke mánaisaṉ pujú ármiayi. Israernumia̱ akupin Paasa Jutan werí yája̱i̱ṉsha áujmattsara̱i̱ tusa Raman ataksha je̱a̱mkattsa pujurmiayi. Túrakui Asa Uunt Yusan tura akupniu je̱e̱ya̱ṉ kuít jirun núnisaṉ kurincha jusa ni yaintri̱ armia nuna súsarmiayi. Tura Tapritia uchirí̱ Jisiuna tiraṉki̱n Piniatátai̱ akupénak “Yamaikia winia aparja̱i̱ ame apa najanawarmia núnisrik ámiji̱a̱i̱ chicham najanatai. Tuma asamtai kuit jiruja̱i̱ kurin akuptajme tura yamaikia Israernumia̱ akupniuja̱i̱ chícham najanaitrumna nuka tsuriṉtarun winia iniaitiusat túramui” titiarum tusa ni yáintri̱n akuprámiayi.
20 15:20-24 Tutai Ásasha Piniatátan umirak Israer shuaran mesetan jurus Ijiunan Tánan Apirpitmákan tura Neptarí aentsun nuṉke̱n utsantuawarmiayi. Páasaka nuna antuk Ramá je̱a̱mkattsa pujurmanka ikiukí̱ Tirsa nuṉkanam pujuumiayi. Túrunamtai Ásaka kayancha tura numincha yaruakar nuja̱i̱ Piṉjiamínniumia̱ Képan nuyá̱ Míspan ataksha je̱a̱mkarmiayi. Tura chíkich túramuri̱nkia Úunt Akupin Túrunamu Aatai̱ papinium aakma áiniawai. Tura Ásasha jakamtai ni uchirí̱ Jusapát úunt akupin ajasmiayi.
Israernumia̱ úunt akupin Natap
25 Ásaka Jutanam úunt akupin ajas jimiará uwí pujamunam Jirupuáma uchirí̱ Natap Israernum akupin ajasmiayi tura jimiarchik uwik akupin ajas pujusmiayi. 26 Ni aparí̱ Jirupuám tunaan túrak Israer shuaran tunaan túrumtikiawarmia núnisaṉ Natapsha nú yajauchiniak túrak Uunt Yus íimmianumsha tunaan túramiayi.
27 15:27-32 Kame Natapka ashí Israer shuarja̱i̱ Jipitiúnan téntakar matsamtuiniai̱ Isakár shuarnumia̱ Ajíasa uchirí̱ Paasa wajatar akupniun maa íksaṉ ní akupin ajasmiayi. Tura Paasa úunt akupin ajas Uunt Yus ni takarniúri̱ Sírunmaya̱ Ajíasja̱i̱ timia tímiatrusaṉ Jirupuám aentsnaka ashí amukmiayi. Natapa chíkich túramuri̱ṉkia Úunt Akupin Túrunamu Aatai̱ papinium aakma áiniawai.
Israernumia̱ akupin Paasa
33 15:33-34 Ásaka Jutanam akupin ajas menaintiú uwí pujamunam Ajíasa uchirí̱ Paasa Tírsanam pujus Israernum akupin ajas paintikuátru uwí pujusmiayi. Nisha Jirupuám túramia nunak túrak Uunt Yus iismasha tí yajauchin túramiayi.