1 Akupin
Irías Akaapai̱ wantinma
18 Kame untsurí tsawant naṉkaamas menaintiú uwí jeamtai Yus Iríasan ataksha chicharuk “Akaap pujamunam wetá tura jearim chicharkum ‘Yamaikia Wi nuṉká yumin yútumtikiattajai tawai Uunt Yus’ titiá” tímiayi. 2 Nuyá̱ Irías Akaapan wantintiuktajtsa werimiayi tura Samarianmaṉka tsuka tí amiayi. 3 Nuya̱ṉka akupniu je̱e̱n wáinin Aptíasan Akaap untsukmiayi. Kame Aptíaska Uunt Yusan tí arantiniuyayi. 4 Kame Yúsnan etserin armia nuna Jisawír máiniakui Aptíaska sian Yúsnan etserniun yaruak kayá wá̱a̱nam u̱u̱k seṉkuintia seṉkuintia akanák apujsarmiayi. Tura niṉki wáiniuk paṉja̱i̱ entsan suarmia nuja̱i̱ iwiaaku matsamsarmiayi. 5 Nuyá̱ Akaapsha Aptíasan chicharuk “Kawái tura umpuru yurumáwartin wainkiaintiajti ashí nuṉkanam weme púkuni tura ashints áiniana nui̱ sa̱a̱k e̱a̱karta. Nu túrachkurkia iikia taṉkurtichu juákartatji” tímiayi. 6 Nuya̱ṉka e̱a̱ktai tusar nuṉkan nakarnáikiar kánasaraṉ Akaapsha niisháa tura Aptíassha niisháa wéarmiayi.
7 Kame Aptíassha jintiak wesa Irías winian wainiak iṉkiuṉtaj tusa werimiayi. Tura íṉkiuak tikishmátar tsuntsumpruá anintrak “Aj, ¿winia úuntur Iríaschakaitiam?” tímiayi. 8 Tutai aya̱k “Ee, witjiai. Tura yamaikia weme ame úuntrum chicharkum ‘Iríaska ju̱i̱ pujawai’ titiá” tímiayi. 9 Tutai Aptías aya̱k “Ame takartámniusha ¿warí yajauchinia túrait ame Akaapai̱ surutkakmin mantamnatniuncha? 10 Ame Yúsrum Uunt Yus íimmianum nekasan tajai winia úuntur ni takarniúri̱n ámin e̱a̱tmakarat tusa akupkacharmaka núṉkaka peṉké atsawai. Túrasha ‘ju̱i̱ṉkia atsawai’ tuíniakuisha. Wats, nekasash wáinkiacharuit tusa nekas tajai tumamtikiaruiti. 11 Túrasha yamaikia ame chichaakum ‘Ame úuntrum werim “Iríaska ju̱i̱ pujawai” titiá’ tame. 12 Túrasha Akaapan chichama ujaktajtsan wématai Uunt Yusa Wakaní̱ yajá ámin juramkittiawai. Túrunawakmin Akaap ámin waitmakach wíniaka mantuattawai. Túrasha ame takartámniuka natsa asan Úunt Yusnaka ashamniuiti. 13 Warí Yúsnan etserin armia nuna Jisawír máiniakui sian Yúsnan etserniun wi yaruakan kayá wá̱a̱nam ú̱kan seṉkuintia seṉkuintia akankan apujsaran paṉja̱i̱ entsan suíniakun wáinkiarmiaj núnaka, uuntru, áminkia ujatmákcharukait. 14 Túrasha yamaikia ame chichaakum ‘Ame úuntrum werim “Iríaska ju̱i̱ pujawai” titiá’ tame. Túrasha ámin waitmakchaṉka wíniaka mantuattawai” tímiayi. 15 Nuya̱ṉka Irías chicharuk “Ashí Akupin Uunt Yusan wi umirjana nu iwiaaku asamtai nekas Akaapja̱i̱ yamái iṉkiunaiktatjai” tímiayi.
16 Nuya̱ṉka Akaapan chichama ujaktajtsa Aptías werimiayi. Tura ujakam Akaap Iríasan wáinkiataj tusa wémiayi. 17 Tura Akaapsha Iríasan wainiak chicharuk “¿Ámechuk Israer shuar itit awajáiniam?” tímiayi. 18 Tutai Irías Akaapan aya̱k “Wikia yajauchikia awajainiatsjai antsu ame tura ame shuarumji̱a̱i̱ Uunt Yus akupkámu umiktin chicham iniaisam ántar yus Paar umireakum ame Israer shuarka yajauch awajéname. 19 Tuma asamtai yamaikia ashí Israer shuar tura ántar yúsnan etserin Paarna kuatrusiántu seṉkuintia tura Aseranu kuatrusiántu Jisawírji̱a̱i̱ iruntrar yurumáinia nu Karmiriu nainnium wiji̱a̱i̱ iruntrarat tusam ashí akupkarta” tímiayi.
Najanamu yus Páarnan etserniun Irías maa amukárma
20 Nuyá̱ Akaap ashí Israer shuaran untsukar tura ántar yúsnan etserniuncha Karmiriu nainnium irurarmiayi. 21 Tura Irías, Israer shuar iruntramunam weanak chichaak “Atumsha jimiará enentái enentáimprumna nusha urutáintsuk iniaisatarum. Tura Uunt Yus nekas Yúsaitkiuiṉkia niṉki nemarsatarum núja̱i̱ṉchuka Paar nekas Yúsaitkiuiṉkia nuke enentáimtustarum” tímiayi. Tákui̱sha Israer shuarka peṉké áimkiacharmiayi. 22 Nuya̱ṉka Irías ataksha chichaak “Uunt Yúsnan etserniunka aya wiki juakjai antsu Páarnan etserin ainia nuka kuatrusiántu seṉkuintia áiniawai. 23 Tura yamaikia jimiará waaka áishmaṉ yamatskam amastarum. Tura chikichnaka Páarnan etserin ni wakeramun achikiar maa asa̱a̱rar jinia irumprar awantkarti túrasha jíniaka ikiapátracharti. Tura wisha núnisnak chíkich waakan maan asa̱a̱ran jinia irumpran awa̱rtatjai túrasha jíniaka peṉké ikiapátrashtatjai. 24 Tura átumka atumí yusri̱ untsuktarum antsu wikia Uunt Yusan untsuktatjai. Tura tú Yusa jinia akupkata nuiti nekas Yuska” tímiayi. Nuna Irías takui̱ ashí shuar ti nekas tame tiármiayi.
25 Nuya̱ṉka Iríassha Páarnan etserin armia nuna chicharenak “Waaka túa wakerarum nu atumeá máarum iwiaratarum. Warí átumka ti untsuríchukaitrum túrarum atumí yusri̱ untsuktarum túrasha jikia ikiapátrairap” tímiayi. 26 Kame waakan súsarmia nuna nisha iwiararmiayi. Túrawar Paara náari̱n pachisar untsumainiak káshik juárkimiutak Paará ai̱kratkata ajá ajainiakua tutupin ejeniarmiayi. Túrasha yaki ai̱kiat, peṉké ai̱kcharmiayi. Nuna túmainiak kayan irumprar áestutai̱n najanawarmia nui̱ ayamach jantsempriarmiayi. 27 Nuyá̱ tutupin ajasmatai wishikiainiak Irías chichaak “Warí yúschakait, kakaram untsuktarum. Kame atumí yusri̱sha enentáimiuk pujatsuash, núchaja̱i̱ṉkia atsumamuri̱n pujurtumtsuash, túmatskesha irauchiash, nuíchuka kanarchiash. Ishintiartarum” tímiayi. 28 Tura nisha tuke túrin asar puya̱ja̱i̱ akamainiak naṉkiji̱a̱i̱sha íjiumarar numpá chukui ajakmaikia ti kakaram untsumiarmiayi. 29 Kame tutupin naṉkaamasmataisha wáurkamaikia nuna kakaram untsumainiak kí̱arai̱ árak áestutai̱ urancha aya úntsumtaik ejeniarmiayi. Túrasha ai̱kiartincha tura anturkartincha peṉké atsumiayi.
30 Nuya̱ṉka Irías ashí aentsun chicharainiak “Winí̱ weankátarum” tutai ashí shuar niin weantúkarmiayi. Tura nisha Uunt Yus áestutai̱ emesramuya nuna iwiaramiayi. 31 Kame, Uunt Yus Jakupan chicharuk “Yamaikia Israer náartin átatme” timia nuna uchirí̱ tuse armia nuja̱i̱ métek Iríassha tuse kayan achikmiayi. 32 Nuna tura Yus áestutai̱n iwiaramiayi. Nuyá̱ kaya irumpramu yantamén entsa painti ritru piákmin jean tautar téntakmiayi. 33 Tura jinia iwiartur waaka namaṉke̱n tsupir awa̱rmiayi. 34 Nuyá̱ “Kuatru ichiṉnanam entsa aimkia utirum ji irumpramunam namaṉ patarma nu ukattratarum” tutai ímiatrusaṉ umikiarmiayi. Tura ataksha nútiksarmek túratarum tutai ataksha nútiksaṉ túrawarmiayi. Nuyá̱ ataksha túratarum tutai ji irumpramunam namaṉ patarman nuya̱shá entsan ukattrarmiayi. 35 Túramu asa éntsaka Yus áestutai̱nmasha chukui ajainiak yantamén tautra téntakmauya nui̱sha éntsaka piákarmiayi. 36 Núnisaṉ kí̱arai̱ áestutai̱ ura jeamtai Irías wéanak chichaak “Maa, Uunt Yusá, Aprajáman Isakan tura Israera Yusri̱yá, Israernumka Ameketme nekas Yúsmeka nuna yamái nekaawarti. Tura wisha Ámin takarin asan Ame túrutmena nuna umíakun ashí naṉkaamasainia núnaka túraitjiai. 37 Ái̱rkata Uunt Yusru. Maa ái̱rkata, ju̱ aents Ame, Uunt Yusá, nekas Yúsaitmena nuna tura ataksha Amiin waketkitin enentáimtikraitmena nunasha nekaawarti” tímiayi. 38 Nuya̱ṉka Uunt Yusa jiri̱ iniantar namaṉnasha kayancha jiniasha nuṉká ju̱yu̱ri̱ncha tura tautra téntakmanum entsa amia nunasha mash amukmiayi. 39 Tura ashí shuar nuna wáinkiar tikishmar tsuntsumawar chichainiak “Uunt Yuska nekas Yúsaiti tura nekas Uunt Yusaiti” tiármiayi. 40 Nuyá̱ Irías chicharainiak “Páarnan etserin ainia nu achirtarum chikichkisha pisarchati” tímiayi. Nuna takui̱ ashí achirármiayi. Tura Irías Kisun ashintsanmaani̱ yaruak kuntujnum tsupikiar máwarmiayi.
Yumi yutukat tusa Irías Yusan seamu
41 Nuyá̱ Irías Akaapan chicharuk “Yamaikia yumi ti yutuktajtsa uu ajakí̱ winiá ántuwawai. Tuma asamtai ámeka wakata tura yurumam umuuta” tímiayi. 42 Tutai Akaapsha yurumá umartaj tusa wakamiayi. Nuyá̱ Iríaska Karmiriu nainnium waka awaami nuṉka tikishmar tsuntsumamiayi. 43 Nuyá̱ ni takarniúri̱n chicharuk “Ámeka wakam nayantsanmaani̱ íimsata” tutai waka nayantsanmaani̱ íimias chichaak “wariṉkish atsawai” tímiayi. Nuya̱sha ataksha chicharuk “Antsu wake wáketkuam siati ejeta” tímiayi. 44 Nuna takui̱ waké waketrakua siati ejé takarniusha chichaak “Yuraṉkim uchich aentsu uwejé̱ya núninian nayantsanmaya̱ wákun wainjiai” tímiayi. Takui̱ Irías chicharuk “Akaap werim chicharkum ‘Yumi áreṉmakai̱ṉ ame káruram kawainium nenakam wárik waketkitia’ titiá” tímiayi. 45 Nuna tumai̱ nayaimpisha kia̱r yuraṉmisha tee ajas nasé naseja̱i̱ ti kakaram yutukmiayi. Tura Akaapka káruri̱n eṉkemár Jisriir péprunam wémiayi. 46 Túrasha Iríaska Uunt Yus pujurma asa pushiri̱n takuí kaki akachuma tseke wéak Akaapnaka naṉkaiki̱ Jisriir pepru wá̱i̱ti̱a̱i̱ri̱n jeataj tusa eem wémiayi.