1 Akupin

Irías entsa ku̱yu̱ktinian étserma

17 Tura Irías Tispi péprunmaya̱ Karaatnum pujuya nu Akaapan chicharuk “¡Uunt Yus íimmianum Nin takarin asan ju̱na tajai, Ju̱ uwí naṉkaamasartatna ju̱i̱ṉkia yumisha yutukchattawai tura sanasha sanamákchattawai. Antsu aya wi takui̱ yutuktatui!” tímiayi. 2 Nuya̱ṉka Uunt Yus Iríasan chicharuk 3 “Ámeka ju̱ya̱ṉka etsa̱ tatainmaani̱ weme Jurtan entsa íṉkiuasmak Kirit ashintsa nuní̱ ú̱mkata” tímiayi. 4 Tura ámeka nu ashints umittiame. Núnisnak ayurtamat tusan Wi shanashnán akuptittiajme. 5 Nui̱ṉkia Iríassha Uunt Yus timia nuna umik etsa̱ tatainmaani̱ we Jurtan entsa íṉkiuasmak Kirit ashintsanam ú̱mak pujumiayi. 6 Kame shanashnáka káshiksha tura kí̱arai̱sha páṉkan namaṉja̱i̱ ikiati̱á̱rmiayi. Núnisaṉ entsanka nuya̱nak umimiayi. 7 Túrasha tsawant naṉkaamaki̱ wéakui yumisha peṉké yútachu asamtai entsasha ku̱yu̱á kukach ajasmiayi.

Irías Sareptanmaya̱ waje̱ja̱i̱

8 Nuya̱ṉka Uunt Yus Iríasan chicharuk 9 “Setun nuṉkanam Sarepta péprunam waje̱ pujana nui̱ pujuuta. Nu ámin ayurtamat tusan iwiarajai” tímiayi. 10 Tutai Iríassha Sareptanam wémiayi. Tura pepru wá̱i̱ti̱a̱i̱ri̱n jeá waje̱ jinia juak wekaan wainkiamiayi. Tura untsuk chicharuk “Waitneasam entsa shikikiam surusta umartaj” tímiayi. 11 Tutai waje̱sha entsan utitiaj tusa wéan ataksha chicharuk “Waitneasam paṉ ishichkisha ajampruitia” tímiayi. 12 Tutai waje̱sha Iríasan aya̱k “Ti nekas ame Yúsrumi náari̱n pachisan tájame, paṉ iniarkámunka peṉké takaktsujai. Antsu trikiu nekeṉman ishichik ichiṉnanam takakjai tura asuitincha mutinium ishichik takurmakjai. Tura núchik asamtai winia uchirja̱i̱ṉ paṉ iniarkar yurumár jáakur jakatai tusan jíchin júurmakun wekaajai” tímiayi. 13 Tutai Irías waje̱n chicharuk “Ashamkaip, takakjai támena nuke emka wi yúatniua iniarkam itiartitia. Nuya̱ṉka ame uchirmiji̱a̱i̱ yúatniuka urum iniarkata. 14 Warí Uunt Yus Israer shuara Yusri̱ chichartak ‘Trikiu nekeṉma ichiṉnanam tura asuiti mutinium ana nusha Wi ju̱ nuṉkanam yumin yutumtikmam peṉké amutukchattawai’ turutniuiti” tímiayi Irías.

15 Tura waje̱sha Irías timia nuna ímiatrusaṉ umikmiayi. Nuya̱ṉka waje̱sha ni uchirí̱sha nuyá̱ Iríassha núkap tsawant yurumáwarmiayi. 16 Kame trikiu nekeṉma muítsnum amia nusha tura asuiti mutiniun uwamusha Uunt Yus Iríasan timia nuja̱i̱ métek peṉké amutukcharmiayi. 17 Tura nu naṉkaamasu ai̱ chíkich tsawantin wajé̱ uchirí̱ naṉkamna ti wárik jakamiayi. 18 Túrunamtai nu wajé̱ Iríasan chicharuk “Maa, Yusan esetas enentáimtin áishmaṉka ¿Wisha amincha warí itiurkaitjiam. Ámeka winia tunaar ataksha enentáimtikruram tura uchirsha ajakturataj tusamchak wíniaka tarutniuitiam?” tímiayi. 19 Tutai aya̱k “Uchiram itiata” tímiayi. Nuya̱ṉka wajé̱ uchirí̱n weṉkuk takakun jurukí̱ yakí̱ iwiak ni peakri̱n aepsamiayi. 20 Tura Uunt Yusan kakaram áujeak “Maa Winia Uunt Yusru ¿Ju̱ wajé̱ ni je̱e̱n apujtus pujurtana nu imiá waitsakek ni uchirí̱sha ajakruram nu arant awajtiatam?” tímiayi. 21 Nuna ti uchi tepan menaintiú awamtuk Uunt Yusan áujeak “Uunt Yusru waitneasam ju̱ uchí wakaní̱ ataksha awaṉtuktia” tímiayi. 22 Tutai Uunt Yussha Iríasan anturak uchí wakaní̱n aya̱shí̱n ataksha awaṉtukmiayi túram nú uchi ataksha iwiaaku ajasmiayi. 23 Túrunamtai nuya̱i̱k Irías uchin nuṉká akaki̱ nukurí̱n súak “Ju̱á iisiá, ame uchirmeka iwiaakui” tímiayi. 24 Túramtai nu nuwa̱sha Iríasan chicharuk “Yamaikia nékajme, ámeka Yusan esetas enentáimtin áishmaṉkaitme tura ame étsereamna nusha nekas Uunt Yusa chichame̱nte” tímiayi.