1 Akupin

Piniatát Samaria tenta eṉkekma

20 20:1-12 Nuya̱ṉka Sírianmaya̱ úunt akupin Piniatát ni suntari̱n ashí irur tura traintitús akupniun ipiá mesetan jurus Samarian tenta eṉkeawarmiayi. Tura péprunam Israernumia̱ akupin Akaapan chichaman akuptak “Ame kuítrumsha tura kurirmesha nuyá̱ nuwemsha núnisaṉ uchiram peṉkeri̱ ainia nuka winia áiniawai” tímiayi. Tutai Israernumia̱ úunt akupin chichaak “Winia uuntru, wisha tura mash takarjana núurtiuk áminiuitji” tímiayi. Tura ataksha Piniatáta yaintri̱ káunkar chichainiak “Wikia ame kuítrumsha tura kurisha nuyá̱ nuwemsha núnisaṉ uchirmesha surusarta tímiajme. Túrasha kashin winia takarniúrun akupkartatjai. Tura ame je̱e̱mincha tura ame takarniúrmi je̱e̱ncha warí nui̱ timiá péṉker irunainia núnaka ímia niṉki yaruakartatui tawai Piniatát” tiármiayi. Nuna tuíniakui akupin Akaap ashí Israer shuara uuntri̱ armia nuna untsukar chicharainiak “Atumsha nekaatarum ju̱ka aya yájauchiniak e̱a̱iniawai” tímiayi. Tutai uuntri̱ chichainiak “Anturkaip núnismek umirtásha umirkaip” tiármiayi. Nuya̱ṉka Akaap Piniatáta yáintri̱n chicharainiak “Winia úuntur yamái seatna núnaka peṉké umirkashtatjai” tímiayi. Nu ujakam Piniatát chichaak “Nú peprun imiá nekas émeseachkuisha ashí ántar yus írunna nu asuttiuáwarti túrasha nui̱ íruneana núnaka winia nemartuinian ashí surartatjai” tímiayi. Nuna antuk Israernumia̱ akupin Akaap chichaak “Meset náṉkamchamunmaṉka nupetmakua tímianuka enentáimtumaschati” tímiayi. Nuyá̱ Piniatát chichaak “Meset juárkimi iwiarnaktarum” tímiayi.

Akaap Piniatátan nupetkamu

13 20:13-15 Nuya̱ṉka Uunt Yúsnan etserin Akaapan tarí chichareak “Uunt Yus chichartameak Wi Úunt Yusaitjiana nu nekarak tusan ju̱ aents ti untsurí wainiainiamna jú̱naka ámin íktustatjame túramui” tímiayi. Tutai Akaap chichaak “Nunasha ya túrawartata” tímiayi. Takui̱ chichareak “Nuṉka tesarmánum uuntri̱ pujuiniana nuna suntari̱ uuntri̱ ainia nu túrawartatui” tímiayi. Takui̱ ataksha Akaap chichaak “Nunasha ya naṉkamatta” takui̱ ataksha chichareak “Ame naṉkamattame” tímiayi. Nuṉka tesarmánum uuntri̱ pujuiniana nuna suntari̱ úuntri̱ṉkia tusiantu traintitús ármiayi. Nuyá̱ suntarka siati mir ármiayi.

16 20:16-21 Tura akupin Piniatátka akupniun ipiaawarmia nuja̱i̱ ú̱mak pujuiniai̱ Akaapa suntari̱ nuṉka tesarmánum uuntri̱ pujuiniana nuna suntari̱ uuntri̱ tusiantu traintitús armia nuka nántuka tutupin ajasmanum mesetan jiintiurarmiayi. Túmainiakui suntarsha nuna úkuri̱n jíintrarmiayi. Túmainiai̱ akuprámu armia nu Piniatátan chicharainiak “Samarianmaya̱ aents jíintrar ju̱ní̱ wininiawai” tiármiayi. Tutai akupin chichaak “Mesetan winitiáiniachkuisha tura mesetan winitiáiniakuisha íwiaakuk achirtarum” tímiayi. Túrasha Israer shuarka Sírianmaya̱ suntaran nupetkar tí kajeṉkarmiayi antsu akupin Piniatátka kawainium ekemak pisarmiayi.

22 20:22-30 Nupetmakarmatai Yúsnan etserin akupniun chichareak “Áitkiamna nu iisam yamaikia kakaram ajasta túrasha chíkich uwitin ataksha kautramkartatui” tímiayi. Nuyá̱ Sírianmaya̱sha chichainiak “Ni yusri̱ṉkia náinniumia̱ najankamu yus áiniawai tuma asamtai yamaikia ame suntarum péṉker iwiarkarta. Túrawakmin pakanam mániatai túrarkia nupetkachartajiash” tiármiayi. Tura chikichik uwí naṉkaamasmatai Piniatátka ni shuari̱ tiarmia tímiatrusaṉ umik emka suntaran ikiamkamia timianú untsurín suntaran iwiarak Israer shuarja̱i̱ mánaiktaj tusar Awiknum matsamkarmiayi. Núnisaṉ Israer shuarcha jintiurar nisha íṉkiuasmak matsamtúkarmiayi. Kame Israera suntari̱ṉkia peṉké ishichik ármiayi. Antsu Sírianmaya̱ suntarka nuṉká piákarmiayi.

Tura Yúsnan etserin akupin Akaapan chichareak “Sírianmaya̱ aents chichainiak ‘Uunt Yuska náinniumia̱ yúsaiti pakanmaya̱ yúschaiti’ tiaru ásarmatai tura Wikia Úunt Yusaitjiana nu ame nekarak tusan jú̱ aentsnaka ashí ámin íktustatjame túramui” tímiayi. Nui̱ṉkia siati tsawant aya matsamsar nuyá̱ mánaikiar iṉkiukarmiayi tura sian mir suntaran Sírianmaya̱n Israer shuar kajeṉkármiayi. Tura iwiaaku juákaru Awiknumaani̱ pisararmiayi. Túrasha nu suntarnaka pepru wenuke̱ sa̱a̱naki̱ painti siati mir suntaran kajeṉkármiayi. Piniatátcha pisar péprunam jeá ú̱meak nui̱ wayá̱ nui̱ wayá̱ ajá wekaimiayi.

31 20:31-34 Tura yaintri̱ armia nu Piniatáta chicharainiak “Israernumia̱ akupniúka tí waitnenkartin áiniawai. Tuma asamtai yuṉkunim ukatmamkar nuyá̱ chápik nuṉkurar weritiái túramka tsaṉkurtámpracharaintjiash” tusar tímiatrusaṉ túrawarmiayi. Tura Israernumia̱ akupniun Akaapan jeariar chicharainiak “Ame takartámin Piniatát iwiaakmarun tsaṉkurturti túramui” tiármiayi. Tutai akupin chichaak “Tuke iwiaakuak winia yatsuruá” tímiayi. Nuyá̱ chichaak “Itiatárum” tutai itiarmiayi tura Piniatátan itiarmatai Akaap ni káruri̱n eṉkermiayi. Tura chichareak Piniatáta “Winia apar ame apan péprun atantramia núnaka mash awaṉtuktiatjame. Núnismek winia apar Samarianam túramia nútiksamek amesha Tamaskunam surutai najatmakta túrawakminkia aṉkant akupkáttajme” tímiayi. Tu chichaman niji̱a̱i̱ najana Piniatátan aṉkant akupkámiayi.

35 Kame Uunt Yus timia asa Yúsnan etserniu uchirí̱ ni tsaníakmari̱n chicharuk “Waitneasam awatitia” tímiayi. Támaitiat nu áishmaṉ awattinian nakitrámiayi. 36 Túram chicharuk “Uunt Yusa chichame̱ umirkachu asakmin wini̱ya̱ kanakiakmin úunt ya̱wa̱ mantamattawai” tímiayi. Nuyá̱ kanakí̱ wéan úunt ya̱wa̱ iṉkiuṉ esái mámiayi. 37 Núnisaṉ chikichnasha iṉkiuṉ chicharuk “¡Waitneasam ijiuttia!” tímiayi. Tutai ijiú tsupíamiayi. 38 Nuyá̱ Yúsnan etserin ji̱n janchji̱a̱i̱ nukuk nekaachmin ajas úunt akupniun jintiá nákaktaj tusa werimiayi. 39 Tura úunt akupin naṉkaaman wainiak Yúsnan etserin kakantar untsúak “Ámin takartámin mesetnum pujan chíkich áishmaṉ mesetnumia̱ aentsun achik itiarti chichartak ‘Ju̱ áishmaṉ péṉker wáinkiatarum tura meṉkakamtaiṉkia ni iwiaakmari̱ ame iwiaakmarmiji̱a̱i̱ núja̱i̱ṉchuka chikichik tarentu akikmaktatme’ túrutui. 40 Tura ame takartámniuka chíkich takatnum itiurchat pujái̱ nu aentska meṉkakayi” tímiayi. Nuiṉkia Israernumia̱ úunt akupin aya̱k “Ame támena nuka tímiatrusan túrunattawai. Ame chichammek makurmayi” tímiayi. 41 Nuya̱ṉka wárichik ji̱ janchji̱a̱i̱ nukumákman jusamiayi. Tura Israernumia̱ úunt akupin Yusna takarniua nuna nekaamiayi. 42 Tura Yúsnan etserin úunt akupniun chicharuk “Uunt Yus chichaak ‘Ju̱ aentska jákatniuiti tímiaj nu akupka asam ni iwiaakmari̱ ame iwiaakmarmiji̱a̱i̱ akikmaktatme. Tura Piniatáta shuari̱ jákartinnium Israer shuarcha jákartatui’ tawai” tímiayi. 43 Kame Israernumia̱ úunt akupniusha kakarmachu ajas kajeku ni je̱e̱n waketki̱ Samarianam jeamiayi.