1 Akupin

Nawuta uwa ajarí̱n Akaap jukimiu

21 Tura mesetka naṉkaamasu ai̱ chíkich tsawant ju̱ka jú̱nis túrunamiayi. Jisriir péprunam Samarianmaya̱ úunt akupin Akaapa pujutái̱ri̱ ámiayi tura nui̱ ayamach Nawut uwa ajan Jisriirnum takakuyayi. 2 Tura Akaap Nawutan chicharuk “Warí winia je̱a̱rui̱ uwa ajaram ayamchichukait tuma asamtai winia surusta, wi arakan aratmaktaj. Nuyá̱ wikia núna peṉker ajan amastatjai. Kame ame itiur wakeram, kuit tákumnisha, kuítniak akiktajme” tímiayi. 3 Tutai Nawut Akaapan aya̱k “Aparu nuṉké̱ winia juakua nuna ámin amastinian Uunt Yus winia peṉké tsaṉkatrukchaiti” tímiayi. 4 Tura Akaapsha Jisriir nuṉkanmaya̱ Nawut aparu nuṉké juakua núnaka amaschattajai tama asa, kajeku kúntuts enentáimpra ni je̱e̱n jeá yurumtsuk peakri̱n tepesmiayi. 5 Tura Jisawír ni áishri̱n werí chicharuk “¿Urukamtai imiá kuntutsash pujam tura yurumátniush nakitiam?” tímiayi. 6 Tutai Akaap nuwe̱n aya̱k “Jisriirnumia̱ Nawutan chicharkun ‘Ame ajarmin kuitji̱a̱i̱ sumaktájai kame wakerakmiṉkia wisha ajanak amastájai’ taja. Támaitiat ‘Winia ajarnaka amaschattajai’ túruta” tímiayi. 7 Tutai ni nuwe̱ Jisawír aya̱k “¿Amesha Israernum úunt akupniua núniniak nekapeam? ¡Weme yurumúta tura enentáimsam warasta! Jisriirnumia̱ Nawuta uwa ajarí̱nkia auka wi amastatjai” tímiayi.

8 Nuya̱ṉka Jisawír Akaapa náari̱ji̱a̱i̱ papin aar akupniu aniyuri̱ji̱a̱i̱ apujtua asakamiayi. Tura Nawut pujumia nu pepru úuntri̱n tura peṉkeri̱ncha akuptúkarmiayi. 9 Kame papí aar akupeak “Ashí ijiarmátarum titiarum túrarum aents matsatmanum Nawutka eem apujsatarum. 10 Nuya̱ṉka jimiará áishmaṉ netse áiniana nu naka apujtustarum túram chicharainiak ‘Yussha tura úunt akupniusha yajauch chicharkame’ tiártatui nuya̱ṉka jí̱i̱krum kayaja̱i̱ tukurum mátarum” tu áarmiayi.

11 Nuya̱ṉka nu péprunam aents pujuarmia nusha tura uuntri̱ armia nusha núnisaṉ náakam armia nusha Jisawír papin aar akupkámia ímiatrusaṉ túrawarmiayi. 12 Kame ijiarmátarum tiar aents iruntramunam eem Nawutnaka apujsarmiayi. 13 Nuya̱ṉka jimiará áishmaṉ netse armia nu Nawut pujamunam eem pujusármiayi. Tura aents iruntramunam Nawutan chicharainiak “Yúsnasha tura úunt akupniuncha yajauch chichareawai” tiármiayi. Nuya̱ṉka péprunmaya̱ jí̱i̱kiar kayaja̱i̱ tukurar máwarmiayi. 14 Nuyá̱ Nawutnaka kayaja̱i̱ tukurar máwarai tu ujaktarum tusar Jisawíran chichaman akuptúkarmiayi. 15 Tura Nawutka kayaja̱i̱ tukurar máamuiti táman Jisawír antuk Akaapan chicharuk “Jisriirnumia̱ Nawuta uwa ajari̱ kuitji̱a̱i̱ sumaktai tutaisha suritramkama nu werim yamaikia nérentin ajasta. Warí yamaikia Nawutka iwiaaktsui antsu jákaiti” tímiayi. 16 Tura Nawutka jákaiti táman Akaapka antuk, Jisriirnumia̱ Nawuta uwa ajarí̱n nérentin ajastaj tusa werimiayi.

Akaap asutniátniun Irías ujakma

17 Nuna túramtai Uunt Yus Tispi nuṉkanmaya̱ Iríasan chicharuk 18 “Israera akupniúri̱ Akaap Samaria péprunam pujana nu iyuta. Kame Nawuta uwa ajarí̱n nérentin ajastaj tusa werí yamaikia nui̱ pujawai. 19 Nu jearim chicharkum ‘¿Maṉkartuamchak ajasha akinkiam? Nu tura asam Nawuta numpe̱n ya̱wá̱ nukararma nui̱ṉ ame numpe̱mniasha ya̱wá̱ nukarartatui’ Uunt Yus jú̱nis túramui titiá” tímiayi. 20 Nuna antuk Akaap Iríasan chicharuk “¿Winia nemasru, yamaikia wáitkiachumek?” tímiayi. Tutai Irías chicharuk “Ee, Uunt Yus íimmianumsha peṉké netse túratin surumatka asakmin yamaikia wainkiajme. 21 Nu tura asakmin Uunt Yus chichartamuk peṉké waitnentrashtatjai. Núnisnak ashí Israer nuṉkanam amé aentsnaka aṉkant ainia nunasha tura takartámin ainia nuya̱ncha ashí áishmaṉkan amuktatjai. 22 Nawata uchirí̱n Jirupuáman tura Ajíasa uchirí̱n Páasan Wi itiurkamiaj nútiksanak amincha túrattajme. Warí netse túrakum Israer shuarsha tunáa túrumtikiakum akajtuku asakmin núnaka túrattajai. 23 Ántsaṉ Uunt Yus Jisawírnasha chicharuk ‘Jisriir nuṉkanam ni aya̱shi̱nkia ya̱wá̱ yuáwartatui. 24 Tura Akaapa shuari̱ péprunam jákarunka ya̱wá̱ yuáwartatui. Tura kampunniunam jákarunka chuaṉ yuáwartatui’ tawai” tímiayi.

25 Tura Akaapka ni nuwe̱ Jisawír yajauch túratin útsuamu asa Uunt Yus iismasha ti yajauchin túrimiayi. Tuma asa chíkich aents Akaapja̱i̱ métek yajauch túratniun surumatkaka peṉké atsumiayi. 26 Tura niṉkia mui̱jmiainian túrak Israer shuar iimiainiamunam Uunt Yus ji̱i̱r akuprámia nuna Amur aents ántar yusan enentáimtak túrin armia núnis Akaapsha túramiayi.

27 Tura Akaapsha nu chichaman antuk pushiri̱n ja̱a̱r ijiarma suí̱r pushin entsar núja̱i̱ṉ kanuumiayi. Kame túruna péejchach ajas wekaimiayi. 28 Nuyá̱ ataksha Tispi péprunmaya̱ Iríasan Uunt Yus chicharuk 29 “Akaap Wi íimmianum péejchach ajasu ¿wáinkiachumek? Kame túruna asamtai ni iwiaaku pujuttana nui̱ṉkia wáitkiaschattajai. Antsu ni uchirí̱ pujuttana nui̱ wáitkiastatjai” tímiayi.