1 Akupin

Akaap Jusapátja̱i̱ Siria aents meset najatma

22 Israer shuarka Sírianmaya̱ áentsja̱i̱ṉkia mesetnasha najantsuk menaintiú uwí iniaṉkasarmiayi. 2 Tura Jusapátka Jutá nuṉkanam úunt akupin ajas menaintiú uwí pujus Israernumia̱ úunt akupniun íistaj tusa wémiayi. 3 Nuyá̱ Israera úunt akupniuri̱ ni takarniúri̱n chicharainiak “Karaatnumia̱ Ramutka íiniuiti tura Sírianmaya̱ úunt akupniui̱ya̱ ataksha awaiṉkitiai tusarsha iikia peṉké itiurkacharuitji” tímiayi. 4 Tura Jusapátan chicharuk “¿Karaatnumia̱ Ramutnum mánaiktin amesha iiji̱a̱i̱ winittiamek?” tutai Jusapát Israernumia̱ úunt akupniun aya̱k “Wisha amea núnisketjai tura winia shuarusha ame shuarumea núnisaṉ áiniawai nuyá̱ winia kawairusha ame kawairumea tímiatrusaṉ áiniawai” tímiayi. 5 Nuyá̱ Jusapát Israer shuara úunt akupniuri̱n ataksha chicharuk “Waitneasam Uunt Yus anintrústa” tímiayi. 6 Nuyá̱ Israer shuara úunt akupniuri̱ kuatrusiántu yúsnan etserin armia nuna ashí irurar anintrak “Karaatnumia̱ Ramutan mesetan jurusan werittiajak nuíchuka ánkik iniaisattaj” takui̱ yúsnan etserin armia nu aimiainiak “Wetá. Warí Uunt Yus úunt akupin nupetkai tusa ame uwejmíin íkturmastatui” tiármiayi. 7 Nuyá̱ Jusapát anintrak “Uunt Yussha warí tawa, nu anintrúsminkia ju̱i̱ṉkia Uunt Yúsnan etserniuka peṉké atsawak” tímiayi. 8 Takui̱ Israera akupniúri̱ Jusapátan aya̱k “Kame aents chikichik Yúsnan etserin awai. Tura Uunt Yussha warí tawa nuka niini̱ nekaamnaitji. Túrasha wikia ninkia peṉké muí̱jiajai. Warí niṉkia péṉkera núnaka peṉké turuttsuk aya yájauchiniak ujatniuiti. Nuka Impra uchirí̱ Mikiayásaiti” tímiayi. Takui̱ Jusapát aya̱k “Atsá, úunt akupniuka nuni̱ṉkia chichakchatniuiti” tímiayi. 9 Takui̱ Israera akupniúri̱ yáintrin untsuk chicharuk “Impra uchirí̱ Mikiayás wárik itiata” tímiayi. 10 Tura nui̱ sewata neketai̱nian Samarianam wá̱i̱ti̱a̱i̱niam Israera akupniúri̱ tura Jutá akupniúri̱ Jusapátcha akupin iwiarmamtai iwiarmamkaru nuyá̱ akupkur pujutái̱ri̱ni̱ṉ pujuiniamunam kuatrusiántu yúsnan etserin armia nuka etseriarmiayi. 11 Nuyá̱ Kiniana uchirí̱ Setekías kátsuram jiruja̱i̱ kachun najankauya nu chichaak “Uunt Yus chichaak ‘Sírianmaya̱ṉka ju̱ja̱i̱ iṉkiuam awakkam mash amuktatme’ tíniuiti” tímiayi. 12 Tura ashí etserin armia nusha núnisaṉ etserainiak “Karaatnumia̱ Ramutnum wetá túram mesetja̱i̱ nupetmakta. Warí Uunt Yus akupniun íktustatjai túramui” túumam ajarmiayi.

13 Tura untsuká utitiá tusa akupkámu Mikiayásan jearí chicharuk “Wats nekaata, ashí etserin ainia nu nekas péṉkera nunak akupniúnka ujainiawai. Tura amesha núnismek aya péṉkera nuke titiá” tímiayi. 14 Túrasha Mikiayás aya̱k “Uunt Yuska nekas iwiaakui tuma asamtai aya Uunt Yus turuttiatna nunak títiatjai” tímiayi. 15 Nuya̱ṉka akupniun jearmiayi tura akupin anintrak “Mikiayasá, Karaatnumia̱ Ramut meset jurusar werittiajik nuíchuka ánkik iniaisattajⁱ” tímiayi. Tutai Mikiayás aya̱k “Weritia tura nupetkata. Warí Uunt Yus akupniun íktustatui” tímiayi. 16 Takui̱ akupin chicharuk “¿Urutmatsuk aya nekasa nunak tájame Uunt Yusa náari̱ji̱a̱i̱ tumamtiktiajam?” tímiayi. 17 Nuiṉkia Mikiayás ataksha aya̱k

“Ashí Israer shuaran pisakár ni wainniuri̱ atsakui murik tsakiṉmaka núnis kampunniunmaani̱ yujan wainiainiajai.

Nuya̱ṉka Uunt Yus chichaak ‘Ju̱ka úuntri̱ncha áiniawai.

Tuma asamtai aṉkant aṉkant atumí je̱e̱ni̱ṉ aṉkant waketratarum’ tawai” tímiayi. 18 Nuyá̱ Israera akupniúri̱ Jusapátan chicharuk “Iisiana, ¿warí tájamea? Wíniaka péṉkera núnaka ujattsuk aya yajauchiniak ujatniuiti tátsujmek” tímiayi. 19 Nuyá̱ Mikiayás chicharuk “Wats, nui̱ṉkia Uunt Yusa chichame̱ antukta. Uunt Yus ni pujutái̱ri̱n pujan wainkiajai tura ashí nayaimpinmaya̱ suntarsha untsuurí̱ni̱ tura menaari̱ni̱sha Nin ayamas wajainian wáinkiarjai. 20 Tura Uunt Yus chichaak ‘Karaatnumia̱ Ramutan mesetan najata Akaap iniarat tusa ¿ya útsuktata?’ tawai. Tutai chíkichkia niisháa tura chikitcha niisháa aimiainiawai. 21 Nuya̱ṉka wakan jiinkí̱ Uunt Yusai̱ naka wajas chichaak wi túrattajai takui̱ Uunt Yus anintrak ‘¿Itiura nusha túrattam?’ tawai. 22 Tutai wakan aya̱k ‘Ni etserniuri̱ ainia nui̱ wait chichaman eṉketrartatjai wáitian chichakarat tusan’ tawai. Nuyá̱ Uunt Yus chichaak ‘Ame tu enentáimtikraram umimtikiartatme. Tuma asamtai weme tímiatrusmek túrata’ Uunt Yus tawai. 23 Tuma asamtai yamaikia nekaata, Uunt Yus ashí etserniuram ainia nui̱ wait chichaman eṉketrarai. Núnisaṉ Uunt Yus emesrattajme turamniua nusha yamaikia jeartámai” tímiayi.

24 Nuya̱ṉka Kiniana uchirí̱ Setekías weantuk Mikiayásan mishanam paat awatí chicharuk “Ámin áujtamsataj tusasha Uunt Yusa Wakaní̱sha winiasha ¿itiur naṉkatuki̱?” tímiayi. 25 Tura Mikiayás aya̱k “Wats nu tsawant jeamtai, ú̱mkataj tusam nui̱ waya̱m nui̱ waya̱m ajá wekaakum paant nekaattame” tímiayi. 26 Nuya̱ṉka Israera akupniúri̱ chichaak “Pai yamaikia, Mikiayás achikiam pepru úuntri̱n Amunai̱ tura akupniu uchirí̱ Juasai̱ jukitia. 27 Tura chicharkum ‘Akupin chichaak “Wi aṉkant ajasa táamam jú̱naka sepunam eṉkeawar páṉnasha tura entsancha ishichik súsarti” tawai’ titiá” tímiayi. 28 Takui̱ Mikiayás chicharuk “Nekas aṉkant waketki̱ táakmiṉkia nui̱kia Uunt Yuska wini̱ni̱ṉkia chichakchaiti” tímiayi. Tura nui̱ ashí aents pujuarmia nuna chicharainiak “¡Atumsha ju̱ nekaatarum!” tímiayi.

Israer shuar nupetnak Akaap jakamu

29 Nuya̱ṉka Israera akupniúri̱nkia Jutanmaya̱ akupin Jusapátja̱i̱ tsaniṉkiar Ramut pepru Karaatnum mániatai tusar wéarmiayi. 30 Nui̱ Israernumia̱ akupin Jusapátan chicharuk “Wikia nusháa iwiarmampran nekaachmin ajasan mesetnumka waya̱ttajai. Túrasha ámeka tuke iwiarmamtaiya̱ nuke entsarta” tímiayi. Nuya̱ṉka Israernumia̱ akupniuka tímiatrusan nusháa iwiarmamar nekaachmin ajas mesetnumka waya̱miayi. 31 Nuyá̱ Sírianmaya̱ akupin suntar kárunam mánaiktinian unuimiátkaru kapitiántri̱ traintitús armia nuna chicharainiak “Náṉkamas suntarja̱i̱ṉkia mánaikiairap antsu áyatik Israer shuara úunt akupniuri̱ji̱a̱i̱ṉ mánaiktarum” ti akuprámiayi. 32 Nuyá̱ suntar kárunam mánaiktinian unuimiátka ainia nuna kapitiántri̱ Jusapátan wáinkiar “Imiá nekas áuwaiti Israera úunt akupniuri̱ṉkia” tusar weriarmiayi. Túrasha Jusapátka nekarawarat tusa charáa ajakmiayi. 33 Túrunamtai Israer shuara akupniúri̱nchuiti tusa nekaawar kapitiánkia ikiukiarmiayi. 34 Túmainiai̱ suntar ni tíshimkiuri̱ji̱a̱i̱ naṉkin náṉkamas ekenkámiayi. Tura aya aneachma Israernumia̱ akupniun jiru mesetnum entsatai̱ náṉkatkana tímianai mijiarnum naṉkiji̱a̱i̱ ijiumiayi. Nuya̱ṉka kárun ewekámun chicharuk “Karu ayantram mesetnumia̱ṉka ji̱i̱rkitia peṉké mantukiarai” tímiayi. 35 Kame nu tsawantka ti mánaikiarmiayi. Tura Sírianmaya̱ suntarja̱i̱ mánainia asar úunt akupniunka ni káruri̱ni̱ṉ achis awajsarmiayi. Tura naṉkiji̱a̱i̱ ijiumunmaṉka numpa ti jintimiayi túmak kárunam pajampramiayi. Tuma túmakua ki̱arai̱ jakamiayi. 36 Túrunamtai, etsa̱ patamsai̱ suntar chichaak “Aṉkant aṉkant atumí pépruri̱ni̱ṉ tura atumí nuṉke̱ni̱ṉ waketratarum” tímiayi.

37 Kame akupniúsha jakamtai Samarianam júkiar nui̱ iwiarsarmiayi. 38 Tura Samarianam entsa pajamtai tsanirmatai nuwa̱ nijiamatai̱ amia nui̱ kárunka nijiararmiayi. Nuna túruiniai̱ Uunt Yus yaunchu timia núnisaṉ numpe̱nka ya̱wá̱ nukatrarmiayi. 39 Tura Akaapa chíkich túramuri̱ṉkia nuyá̱ ashí najankamuri̱sha núnisaṉ yajasma wajinkiji̱a̱i̱ ni je̱e̱n je̱a̱mmia nusha tura péprun najankarmia nunasha Israernumia̱ Úunt Akupin Túrawarma Aatai̱ papinium áakchamukait. 40 Tura Akaapsha ni aparí̱ ayamuwearmia nui̱ṉ ayamumiayi. Túrunamtai ni uchirí̱ Ukuséas Israernum akupin ajasmiayi.

Jusapát Jutanam úunt akupin ajas túramu

41 Nuyá̱ Israer nuṉkanam Akaap akupin ajasmaka kuatru uwí ai̱ Asa uchirí̱ Jusapát Jutá nuṉkanam akupin ajasmiayi. 42 Tura Jusapátka traintiséṉku uwí takaku akupin ajasmiayi. Nuyá̱ paintiséṉku uwí Jerusaréṉnum akupkámiayi. Ni nukurí̱ṉkia Serji nawantri̱ Asuwa náartiniuyayi. 43 Kame ni aparí̱ Asa Uunt Yus iisam péṉker túramia núnisaṉ nisha túramiayi. Túmaitiat nainnium kuṉkuin áestutai̱ armia nuka emestukchamu asar tuke áestiarmiayi. 44 Tura Jusapátka Israernumia̱ shuara akupniúri̱ji̱a̱i̱sha aṉkant pujustai tusa chichaman najanawarmiayi.

45 Kame Jusapáta túramuri̱sha ni kakarmari̱ji̱a̱i̱ mesetnum nupetmak amukratkachmakia nusha Jutanmaya̱ Úunt Akupin Túrawarma Aatai̱ papinium áakchamuk ainia. 46 Jusapátka ni aparí̱ Asa pujumia nu tsawantin nuamtak áishmaṉkak yajauchin túruiniak yusri̱ya ánis enentáimtin juákaru matsamármia núnaka nú nuṉkanmaya̱ṉka mash amukmiayi.

47 Etumnumka úunt akupin atsumiayi tuma asamtai áyatik uuntri̱ anaikiamu ámiayi. 48 Jusapátka Upirnumia̱ kurin werittsa Társesnumia̱ uunt kanu armia núninian najankamiayi. Túrasha uunt kanu Isiunjipírnum jakukarmatai wericharmiayi. 49 Nuyá̱ Akaapa uchirí̱ Ukuséas Jusapáta chicharuk “Winia takartin ame takartámniuja̱i̱ kanunmaṉka wéarti” tímiayi. Túrasha Jusapát nakitrámiayi. 50 Nuyá̱ Jusapátka ni uuntri̱ ayamuwearmia nui̱ṉ nisha ayamumiayi. Túrunamtai ni uuntri̱ Tawit péprunam iwiarsarmiayi. Túrunamtai Jusapáta uchirí̱ Juram úunt akupin ajasmiayi.

Ukuséas Israernum akupin ajas túramu

51 Kame Jusapátka Jutanam úunt akupin ajas tiasisiáti uwí pujamunam Akaapa uchirí̱ Ukuséas Samarianam pujus Israernum úunt akupin ajasmiayi. Túruna jímiarchik uwí Israernumka akupkámiayi. 52 Kame Ukuséas Uunt Yus íimmianum yajauchin túrak ni aparí̱ tura ni nukurí̱ nuyá̱ Nawata uchirí̱ Jirupuám yajauchin túrak Israer shuaran tunaan túrumtikiamia núnisaṉ nisha túramiayi. 53 Nuya̱sha ántar yus Páaran tikishmátuk Israer shuara Uunt Yusri̱n akajkamiayi. Túmak ni aparí̱ túramia nuja̱i̱ métek túramiayi.