2 Akupin

Jutá nuṉka akupeamuri̱n Ataría ata̱i̱miu

11 Tura Ukuséasa nukurí̱ Ataría ni uchirí̱ Ukuséas mámun wainkiamiayi. Tura Ataría ashí uchi úunt akupin ajasmin armia nuna amukármiayi. 2 Túrasha úunt akupniu Jurama nawantri̱ Jusawa Ukuséasa umái̱ peṉkeri̱ armia nuna uchirí̱n máiniamunam páchitkia Juásnaka ú̱saṉ jukí̱ uchin tsakatmauja̱i̱ kanutainiam Ataríai̱ya̱ ú̱kmiayi. Túramu asamtai nú uchikia mantamnachmiayi. 3 Tuma asa Ataría úunt akupin pujakui Juaska sais uwí Uunt Yusa Je̱e̱n u̱kma uchin tsakatmauja̱i̱ pujumiayi. 4 Nuyá̱ uwí siátitin Juyataka ashí suntara uuntri̱ chíkich chíkich sian suntaran akupea nuna tura Seret suntarnasha tura akupniun wáinniua nunasha untsukrum utitiarum tusa akupkarmiayi. Túrawar nu aentsja̱i̱ chichaman najanawarmiayi. Tura úunt akupniu uchirí̱n iniakmasarmiayi.

Juas Jutanam úunt akupin ajasma

5 11:​5-21 Kame Yúsnan pujurin Juyata suntaran akupin pujutai̱ je̱a̱n wáinin armia nuna tura suntara uuntri̱ armia nunasha chícham nekaachma u̱kma nuna ujakártaj tusa Uunt Yusa Je̱e̱n untsuk ikiankamiayi. Ukuséasa nukurí̱ Ataría akupin ajastaj tusa Ukuséasa uchirí̱n máiniakui Ukuséasa umái̱ úunt akupniun uchirí̱sha chikichkiniak Juásan ú̱kmiayi. Kame nekaachma asa siati uwí Uunt Yusa Je̱e̱n pujus úuntmarmiayi. Tuma asamtai Juyatka ni túratniun wakerimia nuna ujakar suntaran chicharainiak “Juas Uunt Yusa Je̱e̱ya̱ jíiniakui tura Jutanmaṉka yamaikia Juas úunt akupin átatui tákuisha péṉker wáinkiatarum ántsarmek yaaksha atumíin weamkattsa winiakiunkia mátarum” tímiayi. Juyata timia núnaka tímiatrusaṉ umikiarmiayi. Túrunamtai aentska tí warasarmiayi. Tura aents charaatum ajainiakui nuwa̱ akupin Ataríaka nuna antuk akupin pujutai̱ je̱a̱nmaya̱ jiinkimiayi. Nuya̱ṉka Atarían achik máwar ikiuiniak yamaikia ju̱i̱ti úunt akupin tusa iniakmastai tusar Uunt Yusa Je̱e̱n ashí wéarmiayi. Túrawar iniaisar Paar enentáimtutai̱ je̱a̱nam utsanawar ashí emeskarmiayi tura Páarnan pujurniun Matanan nui̱ṉ máwarmiayi. Kame Juas siati uwí takaku akuptan naṉkamamiayi.