2 Akupin

Juakas Israernum akupin ajasma

13 13:1-13 Kame Juas Jutanam akupin ajas paintitráis uwí pujamunam, Jeú uchirí̱ Juakas Israernum akupin ajasmiayi. Tura Jirupuám tunaan túrak Israeran tunaan túrumtikiamia núnisaṉ nisha nu yajauchiniak túramiayi. Nuna túrakui Uunt Yus ti kajerak untsurí tsawant Sírianmaya̱ akupniun iktua initiusmiayi. Kame tí waitkiainiam Juakaska ataksha Uunt Yusan yáintkiata tusa seamiayi. Túram Uunt Yussha anturak Israernaka ataksha aṉkant awajsámiayi. Túrasha suntari̱nkia peṉké ishichik juákmiayi túrunayataṉ yajauchin tuke túruki̱ wéarmiayi. Nuya̱ṉka Juakas jakamtai ni uchirí̱ Juas Israernum akupin ajasmiayi. Nusha núnisaṉ yajauchiṉkia túruki̱ wémiayi. Kame Juakas tura Juásan chíkich túrawarmari̱ṉkia Israernumia̱ Akupin Túrunawarma Aatai̱ papinium aakma áiniawai.

Iriséu jaak Yúsnan etserak jakamia nu

14 Tura Iriséusha ti jaa asa, jákatniunam tepan Israera úunt akupniuri̱ Juas jearí miniakak úutuk chicharuk “Winia aparuá, winia aparu, ámeka Israernum suntara káruri̱nme tura kawainium ekemtan unuimiátkarinme” tímiayi. 15 Iriséu aya̱k “Tíshimiuk tura untsurí naṉki achikta” tímiayi. Tutai nisha tíshimkiun nuyá̱ naṉkin achikmiayi. 16 Nuyá̱ Iriséu Israer shuara úunt akupniuri̱n chicharuk “Yamaikia naṉki ekenkámnium tíshimiuk achikiam iwiarnarta” tutai iwiarnas wajasmiayi. Túramtai Iriséusha úunt akupniun achimtikias 17 chicharuk “Nantu jintiainmaani̱ je̱a̱ áṉkamuri̱ uraitia” tutai úunt akupniusha uraimiayi. Túramtai Iriséu chicharuk “Yamaikia ekenkata” tutai naṉkí ekenmaja̱i̱ métek Iriséusha kakaram chichas “¡Uwemtikkiartin Uunt Yusa naṉkiri̱nti. Siria nupetkar warastin naṉkiti! Sírianmaya̱ aents ame Awiknum ashí amuktatme” tímiayi. 18 Nuyá̱ ataksha úunt akupniun chicharuk “Naṉki takusam wajasta” tutai naṉkin takus wajasmiayi. Túramtai chicharuk “Yamaikia nuṉka awattia” tímiayi. Tutai nuṉkan menaintiú awati iniaisámiayi. 19 Nuyá̱ nuna túramtai Yúsnan etserniusha úunt akupniun kajerak chicharuk “Séṉkuksha túrutskesha sáiskesha awatmikia Sírianmaya̱ aentska nupetkam ashí amuka̱a̱me. Túrasha yamaikia menaintiuk awatin asam núnismek menaintiú nupetmaktatme” tímiayi.

Iriséu ukunchí̱

20 Nuya̱ṉka Iriséu jakamtai iwiarsarmiayi. Nuyá̱ chíkich uwitinkia Muápnumia̱ aents aṉkant aṉkant iruntrar mesetnum wea áintsar iwiarnakar Israer shuar kasarkartai tusar nuṉke̱n tuke taa wéarmiayi. 21 Nuyá̱ ju̱sha naṉkaamasmiayi. Israernumia̱ áishmaṉ jakaan iwiarsataj tusa matsamtuiniai̱ aya aneachma mesetnum wea áintsar iwiarnakaru winitiáiniam Iriséu iwiarsamunam jakaan naṉkimiá ikiukim Iriséu ukunchi̱n antiṉ nu jakasha nantakmiayi.

Juas Sírian menaintiú nupetkamu

22 Sírianmaya̱ úunt akupin Jasaérka Israer shuarnum Juakas akupmia nuiṉkia tuke tsawant wáitkiarmiayi. 23 Tura Uunt Yus nin waitnenta asa ni waitnenkartutairi̱n iniaktus enentáimturmiayi. Kame Aprajámja̱i̱ Isakja̱i̱sha tura Jakupja̱i̱sha chichaman najanamia nuna enentáimtur emesratniuncha enentáimturchamiayi. Núnisaṉ Yus íimmianumia̱ yamaiya̱ ímiaja̱i̱sha Israer shuarnaka jí̱i̱ktinian nakitraiti. 24 Tura Siria nuṉka úunt akupniuri̱ Jasaér jakamtai ni uchirí̱n Piniatát úunt akupin ajasmiayi. 25 Nuyá̱ Juakasa uchirí̱ Juaska Piniatátan mesetnum menaintiú nupetak ashí Israernumia̱ péprun ni aparí̱ Jasaér Juakasai̱ya̱ atankimiun ashí awaṉturmiayi.