2 Akupin

Jutanmaya̱ úunt akupin Amasías

14 14:1-7 Kame Israernumka úunt akupin Juakasa uchirí̱ Juas úunt akupin ajas jimiará uwí pujamunam Juasa uchirí̱ Amasías Jutanam úunt akupin ajasmiayi. Tura Amasíassha paintiséṉku uwí takaku akupin ajas Jerusaréṉnum pujus paintinuíwi uwí akupkámiayi. Ni aparí̱ Juas túramia núnisaṉ Uunt Yus iismasha péṉkeran túramiayi. Túrasha ni uuntri̱ Tawit túramia tímiatruska túrachmiayi. Tuma asamtai aents najankamu yus enentáimtutai̱ armia nui̱ kuṉkuinian tuke áestiarmiayi. Nuya̱ṉka ashí nupetmak pujus ni takarniúri̱ úunt akupniun máwarmia núnaka ashí kajeṉkarmiayi. Túrasha akupkámu chichaman umíak nu aentsu uchirí̱nkia mácharmiayi. Núnisaṉ Wee Pákanan Etum aentsun tias míran nupetak Séran atá̱i̱ Júktir anaikiamiayi.

8 14:8-14 Nuya̱ṉka Jutanmaya̱ úunt akupin Amasías Israernumia̱ úunt akupin Juas mániatai tusa chichaman akuptúkmiayi. Tutai Israernumia̱ úunt akupin chichaak “Ríwianunmaya̱ jaṉki sétrun chicharuk ‘Ame nawantrum winia uchir nuatkat suruttsai timiai’ túrasha yajasma naṉkaamak amuturmai. Kame Etum nupetka asam naṉkamantu enentáimme túrasha núja̱i̱ṉ shiir enentáimsam pujusta. Urukamtai jeachiatmesha amesha tura Jutasha yajauch awajsatniusha ¿wakeram?” tímiayi. Túrasha Amasías peṉké ántachkui Juassha werí Pitsemísrum mániawarmiayi. Tura Israer nupetmakui̱ Jutanmaya̱ṉka pisakármiayi. Túrunamtai Juas Amasíasan achik Jerusaréṉ jukimiayi. Tura péprun wenuke̱n chiṉkia wayá̱ Uunt Yusa Je̱e̱n tura úunt akupniu je̱e̱n kuri núnisaṉ kuit jiru ántsan najankamu takatai̱ irunmia núnaka ashí yaruakmiayi. Nuya̱ṉka aentsu achir yaruak Samarianam waketkimiayi.

15 14:15-16 Kame Juasa chíkich túrawarmari̱nkia Israernumia̱ Úunt Akupin Túrunawarma Aatai̱ papinium ¿áakchamukait? Tura Juas jakamtai ni uchirí̱ Jirupuám Israernumka úunt akupin ajasmiayi.

17 14:17-22 Kame Israernumia̱ úunt akupin Juakasa uchirí̱ Juas jakamtaisha Jutanmaya̱ úunt akupin Juasa uchirí̱ Amasíaska kinse uwí tuke iwiaaku pujusmiayi. Jerusaréṉnum pujan nakitiáiniak chichaman najatawarmiayi. Tura nuna nekaama pisar Rákisnum wéan pataatukar máwarmiayi. Kame Amasíasa chíkich túrawarmari̱nkia Jutanmaya̱ Úunt Akupin Túrunawarma Aatai̱ papinium aakma áiniawai. Tura Amasías jakamtai Jutanmaya̱ aentska Amasíasa uchirí̱n Asaríasan tiasisáis uwí takakun úunt akupin awajsarmiayi. Úunt akupin ajas pujus Irat péprun ataksha iwiarak je̱a̱mak Jutan ataksha awaṉtukmiayi. Nuya̱ṉka nusha núnisaṉ jakamiayi.

Israernumia̱ úunt akupin chíkich Jirupuám

23 14:23-29 Kame Jutanmaṉka Juasa uchirí̱ Amasías úunt akupin ajas kinse uwí pujamunam Israernumka Juasa uchirí̱ Jirupuám úunt akupin ajas kuaraintiúnu uwí Samarianam pujusmiayi. Nisha chíkich túrawarmia núnisaṉ Uunt Yus iismasha yajauchinkia túramiayi. Tura Israera Yusri̱ Uunt Yus timia nuja̱i̱ métek Israera nuṉké̱ tesamuri̱n Repuamátnumia̱ juárkin Arapánmaya̱ nayantsa tímianai ataksha iwiarkamiayi. Kame Israer shuar ti wáitiainiakui tura yáiṉtincha atsá asamtai Uunt Yus waitnentrar núnaka túramiayi. Núnisaṉ Israer shuarnaka ashí amuk ni náari̱ncha asakátrartinniaka wakerachu asa Uunt Yus Israer shuarnaka Jirupuámja̱i̱ uwemtikrarmiayi. Kame Jirupuáma chíkich túrawarmari̱nkia Israernumia̱ Úunt Akupin Túrunawarma Aatai̱ papinium aakma áiniawai. Tura Jirupuámka jakamtai ni uchirí̱ Sakarías Israernumka úunt akupin ajasmiayi.