2 Akupin

Jutanmaya̱ úunt akupin Asarías

15 15:1-7 Jirupuámka paintisiáti uwí akupin ajas Israernum pujamunam Asarías Jutanam akupin ajasmiayi. Kame tiasisáis uwí takaku akupin ajas seṉkuintitús uwí akupkámiayi. Ni aparí̱ Amasías túramia tímiatrusaṉ nisha péṉkeran túramiayi. Túmaitiat aents najankamu yus enentáimtutai̱ ainia núnaka emeskachu asamtai aentska taṉkú máwar najankamu yusan nui̱ áestiarmiayi. Tuma asamtai Uunt Yus répraja̱i̱ suṉkurmamtikiamiayi túramu asa akupin pujutai̱ je̱e̱ni̱ṉ akankámu pujumiayi. Tuma asamtai ni uchirí̱ Jutam akupmiayi. Tura Asarías jakamtai ni uuntri̱ iwiarsamu armia nui̱ tíjiu̱ch Tawitia Pépruri̱n iwiarsarmiayi.

Israernumia̱ úunt akupin Sakarías

8 15:8-12 Asarías Jutanam úunt akupin ajasmaka traintiúchu uwí ámanum Jirupuáma uchirí̱ Sakarías Israernum úunt akupin ajas sais nantu Samarianam pujusmiayi. Ni uuntri̱ túrawarmia núnisaṉ nisha yajauchiniak túramiayi. Nuyá̱ Sakaríasnaka Japisa uchirí̱ Sarum mámiayi tura úunt akupin ajasmiayi. Nuja̱i̱ Uunt Yus Jeú chicharuk “Amé shuarka kuatru weanmaya̱ akupin ajasártatui” timia nu uminkiamiayi.

Israernumia̱ úunt akupin Sarum

13 15:13-16 Kame Asaríaska traintinuíwi uwí akupin ajas Jutanam pujamunam Sarum Israernum úunt akupin ajas chikichik nantu Samarianam pujusmiayi. Nuya̱ṉka Manajém Samarianam taa Saruman maa úunt akupin ajasmiayi. Tura Tipsa pépruncha emeskamiayi nuya̱ṉka nuwa̱ ajamtin armia núnaka wake̱n nakarkar kajeṉkármiayi.

Israernumia̱ úunt akupin Manajém

17 15:17-22 Kame Asaríaska Jutanam traintinuíwi uwí akupin ajas pujamunam Israernumka Manajém úunt akupin ajas tias uwí pujusmiayi. Manajémsha chíkich túrawarmia núnisaṉ nisha yajauchin túramiayi. Tuma asamtai Asirianmaya̱ úunt akupin Pur Israeran kakarmaja̱i̱ utsantuamiayi. Túrunamtai Israernum ashí nupetmakan úunt akupin ajastaj yaintkiai tusa mir tarentu jean jirú kuítian Manajém Puran akikmiayi. Nuna akikmaktaj tusa Manajémka aentsun atantrarmiayi. Túrakui aents kuítrintin armia nuka seṉkuintia jirú kuit jean akikmakarmiayi. Nuya̱ṉka Asirianmaya̱ úunt akupniuka ni nuṉke̱n waketkimiayi. Nuyá̱ Manajém jakamtai ni uchirí̱ Pikiayás Israernum úunt akupin ajasmiayi.

Israernumia̱ úunt akupin Pikiayás

23 15:23-26 Tura Asaríaska úunt akupin ajasmaka seṉkuintia uwí ámanum Israernumka Pikiayás úunt akupin ajas jimiará uwí Samarianam pujusmiayi. Nisha núnisaṉ yajauchinkia túramiayi. Nuya̱ṉka ni suntari̱ uuntri̱ Remaríasa uchirí̱ Pikia seṉkuintia aentsja̱i̱ werí Píkiancha núnisaṉ Arkuknasha tura Ariancha máwarmiayi. Tura Israernumka Pikia úunt akupin ajasmiayi.

Israernumia̱ úunt akupin Pikia

27 15:27-31 Kame Jutanmaṉka úunt akupin Asarías seṉkuintitús uwí akupeamunam Israernumka Pikia úunt akupin ajas painti uwí pujusmiayi. Nisha chíkich túrawarmia núnisaṉ yajauchinkia túramiayi. Nuya̱ṉka Asirianmaya̱ úunt akupin Tikratpirisér Israeran kakarmaja̱i̱ utsantua Ijiunnumia̱ncha tura Apirpitmákanmaya̱ncha Januanumia̱ncha Káatishnumia̱ncha Karaatnumia̱ncha Ásurnumia̱ncha tura Kariréanmaya̱ncha núnisaraṉ Neptarí nuṉkanmaya̱ncha ashí achirar Asirianam yaruakarmiayi. Nuya̱ṉka Irá uchirí̱ Useas Píkianka mámiayi. Kame Jutanmaṉka Asarías uchirí̱ Jutam úunt akupin ajas painti uwí pujamunam nu túrunamiayi.

Jutanmaya̱ úunt akupin Jutam

32 15:32-38 Israernumka Pikia úunt akupin ajas jimiará uwí pujamunam Usíasa uchirí̱ Jutam Jutanmaṉka úunt akupin ajasmiayi. Kame paintiséṉku uwí takaku akupin ajas tiasisáis uwí akupkámiayi. Kame niṉkia péṉkeran túramiayi túrasha najankamu yus enentáimtutai̱ armia núnaka emeskacharmiayi. Jutamka Uunt Yusa Je̱e̱n waiti nekas páantniuya nuna najanamiayi. Nuya̱ṉka mesetan najatawarat tusa Asirianmaya̱ úunt akupniun Resenan tura Israernumia̱ Remarías uchirí̱ Píkian Uunt Yuska Jutá shuaran akuptan naṉkamamiayi. Tura Jutamka jakamtai ni uchirí̱ Akaas Jutanmaṉka úunt akupin ajasmiayi.