2 Akupin

Samaria Israera shuari̱n nupetkar achirma

17 Tura Akaas Jutanmaya̱ úunt akupin ajasmaka tuse uwí ai̱ Irá uchirí̱ Useas Israer shuara úunt akupniuri̱ ajasmiayi. Tura nisha nuiwi uwí Samarianam úunt akupin pujusmiayi. 2 Tura Uunt Yus iisam túrutairi̱sha yajauchiyayi. Túmaitkiusha yaunchu Israernum úunt akupin ti yajauchin túrawarmia tímianu yajauchinkia túrachmiayi. 3 Nuyá̱ Asiria nuṉka uuntri̱ Sarmanasár mesetan jurus waruk nupetak Useasnaka ni takarniúri̱ awajás “yamaikia ámeka akikmata” tímiayi. 4 Nu ukunam Sarmanasár Useas chichaman etserniun ú̱saṉ Ejiptu úunt akupniuri̱ Suun chichaman akuptúkmia nuna nekáa tura nu arant ashí uwitin akiktinia nuna akitsuk iniaisámuncha nekáa Useasnaka achik sepunam eṉkeamiayi. 5 Nuna tura Asiria úunt akupniuri̱ ashí nuṉka nupetak Samaria pépruncha akinkiataj tusa téntakar menaintiú uwí pujursarmiayi. 6 Tura Useas nuiwi uwí akupin pujusu ai̱ Asiria úunt akupniuri̱ Samarian akinkiamiayi. Tura Israera shuari̱n achikiar Asiria nuṉkanam yaruakar Ará nuṉka Mítianmaya̱ aentsu pépruri̱n Kusan entsá yantamén Apur nuṉkanam matsasármiayi.

Israera shuari̱ṉkia ni uchirí̱n najankamu yusan áestamu

7 Kame Israer shuaran Ejiptunam Parauṉka kakarmari̱ya̱ Uunt Yus ji̱i̱ki̱ aṉkant awajsarmaitiat Niin tunaan túrawar nuya̱sha najankamu yusan umirainiak tikishmátainiakui nuka túrunamiayi. 8 Nuyá̱ Uunt Yus Israera shuari̱ iimiainiamunam nui̱ matsamármia nuna ji̱i̱r ishiakarmia nuna túrutairi̱ tura yaunchu Israera úunt akupniuri̱ yajauch túrutairi̱ncha umirainiakui túrawarmiayi. 9 Nuyá̱ Israera shuari̱ Uunt Yus wakerachman ú̱kar túruiniak ashí péprunam naint yakiya nui̱ najanamu yus enentáimtutai̱n ikiusar kumpin je̱a̱nmasha nuyá̱ kaya wénuimiu péprunmasha ikiusármiayi. 10 Nuna túrawar yúsaiti tusar kayan apujsar tura Asera enentáimtutai̱ numincha ashí náintniumsha tura ashí numi ukat ukat wajainiamunam wakenmari̱n awajrarmiayi. 11 Tura yaunchu aents nui̱ matsamin armia nuna yajauch túrutairi̱n túruiniakui Israera shuari̱ iimiainiamunam Uunt Yus ji̱i̱r ishiakmia nuna túrutairi̱n túruiniak ashí najankamu yus enentáimtutai̱ ikiusmanum nui̱ kuṉkuinian áestuiniak peṉké yajauchin túruiniak Uunt Yusan akajkarmiayi. 12 Kame Uunt Yus chichaak “Átumka najankamu yus nakumkarum tikishmáttrairap” támaitiat ántar yusan tikishmátrarmiayi.

13 Nuyá̱ Uunt Yus Israernumia̱ shuaran tura Jutanmaya̱ shuarnasha ashí ni etserniuri̱ji̱a̱i̱ tura ashí neka Yus chichame̱n ujauya armia nuja̱i̱ chicharainiak “Atumí yajauch túrutairi̱ iniaisarum tura waketkirum Wi akupkámu umiktarum. Kame yaunchu atumí we̱a̱trí̱n ashí umikiarat tusan winia takartin Yúsnan etserniuja̱i̱ akupkámiajai” tímiayi. 14 Tura Uunt Yus timia nuna umitsuk ni we̱a̱trí̱ túrutairi̱niak túruiniak ní enentái̱ji̱a̱i̱ umichu ajasár Úunt Yusnaka peṉké enentáimtuscharmiayi. 15 Kame Uunt Yus akupkámu tura Israer shuara we̱a̱trí̱ji̱a̱i̱ umiktin chichaman yaunchu najanamuncha nakitrar Yus umiktarum tusa chicharkarmaitiat antukcharmiayi. Tura ju̱ nuṉkanmaya̱ antra nuna wakerukar niṉki ántar awajmámsarmiayi. Warí aents ayamach matsamármia nuna túrutairi̱ átumka túrawairap Uunt Yus tímiaitiat nisha núnisaṉ túrawarmiayi. 16 Tura ni Uunt Yusri̱ ashí akupkámunka iniaisar yaṉkú jiruja̱i̱ jimiará waaka yamatskaman najanawar tura Asera numí enentáimtutai̱n nuyá̱ ashí yaancha núnisaṉ Páarnasha tikishmátiarmiayi. 17 Nuyá̱ ni uchirí̱ncha tura nawantri̱ncha ii yusri̱ súaji tusar áestuiniak tura uwishniumawar nekamniuitji tuinia ásar Uunt Yus íimmianum peṉké yajauch túruiniak akajkarmiayi. 18 Títmainiakui Uunt Yus Israer shuarnaka ti kajerkar nin íitian nakitiak kanakmiayi. Tura aya Jutá shuarja̱i̱ṉ juákmiayi.

19 Túrasha Jutá shuarsha Uunt Yus akupkámun umitsuk Israer shuar túriarmia núnisaraṉ nisha túriarmiayi. 20 Tuma asamtai Uunt Yus ashí Israera tiraṉki̱nkia chíkich nuṉkanmaya̱ aents mesetja̱i̱ wáitkiasma matsamás enentáimkiarti tusa íitian nakitiak níya̱ṉka shitiakarmiayi. 21 Tura Uunt Yus Israer shuarnum aya Tawit shuarnumia̱ akupin ajasártiniaiti timia nuna iniais akankámiayi. Nuna túramtai chíkich shuarnumia̱ Nawata uchirí̱ Jirupuám úunt akupniun anaikiarmiayi. Túram Israer shuaran Yusai̱ya̱ akanák ti tunaan túrumtikiawarmiayi. 22 Tura Israer shuarsha ashí tunaan Jirupuám túrumtikiamia nuna unuimiátkaru ásar tunáa túrutan peṉké iniaisacharmiayi. 23 Tuma asamtai Uunt Yus ashí Ni takarin Yúsnan etserniuri̱ji̱a̱i̱ ujakármia nuja̱i̱ métek Israer shuaran íitian nakitiak níya̱ṉka shitiakarmiayi. Núnis túramtai Israer shuarnaka Asirianmaya̱ aents tariar achirar yaruakarmiayi. Túramu ásar juákaru yamaiya̱ ju̱i̱sha nui̱ṉ pujuiniawai.

Samarianam chíkich aents matsamsarma

24 Tura Asirianmaya̱ úunt akupin aentsun Papirúnianmaya̱n tura Kutanmaya̱n nuyá̱ Ápnumia̱ncha Amatnumia̱ncha núnisaṉ Separwáimniumia̱ncha ikiankar Israer shuar matsamármia nui̱ Samaria nuṉkanam pepru írunmanum matsasármiayi. Tura Samaria nuṉkanam pepru irunmia nuna akintrukar nérentin ajasár íksaraṉ nu aents nui̱ matsamsarmiayi. 25 Túrasha aents nui̱ matsamkarsha Uunt Yusnaka peṉké enentáimtichu ásarmatai úunt ya̱wa̱ Uunt Yus akuprámu nú aentsnaka kaje̱niarmiayi. 26 Nuyá̱ Asirianmaya̱ úunt akupniun chichaman akuptuiniak “Ame aents achira ikiankam Samaria nuṉka pépruri̱n matsamam nu shuarka nu nuṉkanam pujusár umiktin chichaman Yus najanamia nuna nékainiachu ásarmatai Uunt Yus úunt ya̱wa̱n akuptur amuiniawai” tu ujakármiayi.

27 Nuna antuk Asirianmaya̱ úunt akupin chichaak “Yúsnan pujurin achira ikiankamarumna nuyá̱ chikichik ataksha awaiṉkitiarum nui̱ pujus nú nuṉkanmaya̱ yus itiurá enentáimtutai̱n nuna jintintiáwarat” tímiayi. 28 Nuyá̱ Yúsnan pujurin Samarianmaya̱ jukimiu ataksha waketki̱ Pitir nuṉkanam pujus Uunt Yus itiurá enentáimtustiniait nuna unuiniararmiayi.

29 Túrasha ashí nuṉkanmaya̱ aents aṉkant aṉkant ní yusri̱niak najankar Samarianam najankamu yus enentáimtutai̱ naint najankamu armia nui̱ ikiusármiayi. Aṉkant aṉkant aents matsamármia nuka ní pepruri̱ni̱ṉ núnis túrawarmiayi. 30 Nuyá̱ Papirúnianmaya̱ aentska Sukutpiniútan tura Kutanmaya̱ṉka Nirkaran nuyá̱ Amatnumia̱ṉka Aseman nakumkar najankarmiayi. 31 Núnisaṉ Ápnumia̱ṉka Nipasan Tartakja̱i̱ nuyá̱ Separwáimniumia̱ṉka Atramiríkian Anamiríkji̱a̱i̱ ni yusri̱ ásarmatai nakumak najanawar nuna enentáimtuiniak ni uchirí̱n áestiarmiayi. 32 Kame Úunt Yusnasha enentáimtuiniayat ni ántar yusri̱ncha enentáimtuinia ásar najankamu yus enentáimtutai̱ naint najankamu armia nui̱ takasártinian niniya̱nak ántar yusri̱n takarniúri̱n anairarmiayi. 33 Tura tu nuṉkanmaya̱ káunkarmia nuyá̱ túrutai̱ncha túruiniak najankamu yusnasha enentáimtiarmiayi. Nuna túruiniayataṉ Úunt Yusnasha enentáimtiarmiayi.

34 Kame yamaiya̱ ímiaja̱i̱sha yaunchu túrutairi̱nkia tuke túruiniawai. Uunt Yusan ashamainiachu ásar ni chichame̱ncha uminiachuk Uunt Yus Jakupan Israer anaikiamia nuna uchirí̱ umikiartin akupkámuncha umirainiatsui. 35 Warí Uunt Yuska umiktin chichaman Jakupja̱i̱ najanachmakia tura akupeak chicharainiak “Chíkich yuska ashamkairap. Núnisrumek takareakrum tikishmátrairap tura áestutcha áestuawairap. 36 Antsu Ejiptunmaya̱ Ni kakarmari̱ji̱a̱i̱ tura Ni kunturi̱n iwiaintiurmak ji̱i̱rmarmiarmena nuke ashamkarum tikishmáteakrum taṉkusha Úunt Yusak áestuatarum. 37 Ashí akupkámu umíakur túratniun aar amasmiarmena nu umiktarum tura ántar yus ainia nu ashamkairap. 38 Núnisaṉ Wi atumji̱a̱i̱ chichaman najanamaj nu kajinmátkirap. Núnisrumek najankamu yus ainia nusha ashamkairap. 39 Atumí Yusri̱ Uunt Yusa nuke ashamkatarum tura ashí atumí nemasri̱ya̱ṉka Niṉki aṉkant awajtámsattarme” tímiayi. 40 Nuka támaitiataṉ niṉkia anturkacharmiayi tuma ásar yaunchu túrutainiak túriarmiayi. 41 Tuma ásar nu péprunmaya aentska Úunt Yusnasha ashamainiayataṉ najankamu yusri̱ncha shiir awajiármiayi. Ni uchirí̱ tura ni uchirí̱ya nuyá̱ uchirí̱ armia nusha núnisaṉ túrawarmiayi. Nisha ni aparí̱ túrawarmia núnisaraṉ yamaiya̱ ju̱i̱sha túruiniawai.