2 Akupin
Esekías Jutá nuṉka úunt akupniuri̱ ajasma
18 Kame Israer nuṉkanam Irá uchirí̱ Useas menaintiú uwí úunt akupin ajas pujái̱ Akaasa uchirí̱ Esekías Jutá nuṉkanam úunt akupin ajasmiayi. 2 Tura úunt akupin ajasmia nuiṉkia painti seṉku uwí takakuyayi. Nuyá̱ painti nuiwi uwí Jerusaréṉ nuṉkanam akupin pujusmiayi. Tura nukurí̱ṉkia Sakaríasa nawantri̱ Awi náartiniuyayi. 3 Nuyá̱ Uunt Yus iisam Esekíassha ni we̱a̱trí̱ Tawit péṉkeran túramia tímiatrusaṉ umikmiayi. 4 Tura ántar yus enentáimtutai̱ je̱a̱rkamu armia nuna mash emestukarmia nuka níyayi. Núnisaṉ péṉker kaya nakumkar najankamuncha tura Asera nakumkamuncha nuyá̱ Muisais yaunchu yaṉkú jiruja̱i̱ napin najanamia nuna Israernumia̱ aents nu tsawantinkia kuṉkuinian áestuiniak enentáimtiarmia nunasha mash tsai̱tsai̱ji awajtúsarmiayi. Esekías nu napin Nijiustán* anaikiamiayi. 5 Tura Esekías úunt akupin ajas pujus Uunt Yusan enentáimtusmia nuja̱i̱ métekka yáunchusha nuyá̱ ukunmasha ashí akupniusha Jutá nuṉkanmaṉka peṉké atsuarmiayi. 6 Tuma asa Úunt Yusai̱ya̱ peṉké kanatsuk antsu yaunchu Uunt Yus Muisaisan akupkámu chichaman áamtikramia nuja̱i̱ métek umikmiayi. 7 Tura Uunt Yus yaya̱mu asa ashí túrimia nui̱sha itiurchatnaka peṉké wainkiachmiayi. Tuma asa Esekíassha, Asiria nuṉka úunt akupniu chichame̱ncha umirkatniun nakitrámiayi. 8 Núnisaṉ mesetan najana Kaasa pépruja̱i̱ nuṉka tesarnáiyamunam pujuarmia nuna nupetak kumpin je̱a̱ wajainia nunasha tura kayaja̱i̱ wenuimiu pepru armia tímianai Jiristíu aentsnaka nupetkarmiayi.
9 Esekías Jutá nuṉkanam úunt akupin kuatru uwí pujái̱ tura Israer nuṉkanam Irá uchirí̱ Useassha siati uwí akupin pujawa̱i̱ Asiria úunt akupniuri̱ Sarmanasár Samariaja̱i̱ mániattsa matsamtúkarmiayi. 10 Esekíaska sais uwí akupin pujái̱ Useas Israer shuara akupniúri̱ṉkia nuiwi uwí akupin pujawa̱i̱ Samariaka mánikiarmiayi. 11 Asirianmaya̱ úunt akupin Israer shuaran achir Asirianam yaruakmiayi tura Arajnum núnisaṉ Apur entsa yantam Kusannum Mítianmaya̱ pépruri̱n matsasármiayi. 12 Ni Yusri̱n Uunt Yusan umirkacharu ásar núnisaṉ chichaman najanawarmia nunasha anturkacharmiayi. Tura Muisais Uunt Yusa takarniúri̱ya nu ju̱ umiktarum timia núnaka ántutsuk umikcharmiayi.
Senakiríp Jutá nuṉkan eṉkemtuamu
13 Kame Esekías úunt akupin ajasmaka katurse uwí pujamunam Asiria nuṉka uuntri̱ Senakiríp Jutá nuṉkanam kayaja̱i̱ wenukma armia nu péprun eṉkemtua ashí akintrukarmiayi. 14 Tura Jutá nuṉka uuntri̱ Esekías Asiria nuṉka uuntri̱ Rákis péprunam pujan chichaman akuptak “Yajauchin túrajai. Waitneasam winia nuṉkaruí̱ya̱ṉka jiinkitia. Kame ame urutmá kuitia akirkai turuttiatam tímiatrusnak akiktajme” timiai. Tutai Asiria nuṉka uuntri̱ Esekíasan Jutá nuṉka úuntri̱n chicharuk “Kuitia kijintri̱ 21.780 ripra nekapek jea tura kuri kijintri̱sha 2.178 ripra nekapek jea akirkata” tímiayi. 15 Tura Esekíassha Uunt Yusa Je̱e̱ya̱ kuítniasha nuya̱sha úunt akupin kuít eṉketai̱nmaya̱ kuítniasha jukí̱ ni wainkiamia núnaka mash susamiayi. 16 Nu arantcha Uunt Yus Je̱a̱ wáitiri̱ yantamén ni kurimpramia nuna urar Asiria úunt akupniuri̱ susamiayi.
17 Tura Asiria nuṉka úunt akupniuri̱sha suntara úuntri̱n Tartanan, Rapsarísan, nuyá̱ Rapsasesan untsurí suntarja̱i̱ Rákis péprunmaya̱ naṉkamawar Jerusaréṉ péprunmasha meset juárkitiai tusa Esekíasan akuptúkarmiayi. Nuyá̱ wákar Jerusaréṉ péprunam jeawar yumirmata nuji̱n arakaani̱ núṉkentin nijiakmakur wakettai̱ jintianmaani̱ weantúrar matsamtúkarmiayi. 18 Túrawar úunt akupin Esekíasan untsukarmiayi túrasha Irkíasa uchirí̱ Iriakím akupniu je̱e̱n wáinniuya̱ nu tura papí aakmau Sepna nuyá̱ Asapa uchirí̱ Juash akupniu papí áatniuya nu jintiukiarmiayi. 19 Nuya̱ṉka Rapsases chichaak “Esekías chicharkuram ‘Uunt akupin Asiria akupniúri̱ chichaak “¿Ausha waritia enentáimiam? 20 Ámeka mesetnum tí neka tura kakarmaitjiai tátsumek. Túrasha ántram chichamtiniaitme. Tura yamaisha ¿yainia enentáimkiumea winiasha kajertukum? 21 Maa, nekaata, ámeka yamaikia Ejiptu enentáimtame. Nu wai̱ pintiú saepe̱ya núniniaiti tura nui̱ yáakesh achimkiuṉka ijium uwejnum jiimiamniaiti ashí Ejiptunmaya̱ Parauṉkan enentáimtuinia nuka núnisaiti. 22 Tura chichartakum ‘Ii Yusri̱n Uunt Yusak enentáimtaji’ túrutkumsha Yus tikishmáttai̱ naint irunmia nuna tura ni áestutairi̱ncha Esekías emestukar Jutancha núnisaṉ Jerusaréṉnasha chicharainiak ‘Aya Jerusaréṉnum jú̱ áestutai̱niam Yus shiir awajsatniuitrume’ timia nú yuschakait. 23 Antsu yamaikia winia úuntur ‘Asirianmaya̱ akupniuja̱i̱ mániktajai titiá’ tákurminkia kawainium ekemak mániktinian atumínia̱ suntar unuimiáku ákuiṉkia wikia tus mir kawain amastajrume. 24 Ejiptunmaya̱ karu tura kawainium mánitian unuimiátka enentáimtu pujarmini̱ṉ winia uuntru yaintri̱ páantniuchuitiat atumniaka mesetja̱i̱ṉkia nupettamkartatui. 25 Nu arantcha Úunt Yusja̱i̱nchu ju̱i̱ ¿táukaitiaj emeskataj tusana? Uunt Yus chichartak ‘Ju̱ aents pujuinia ju̱ werim emeskata’ turutmiai” úunt akupin Sarmanasár túramui titiá’ turutmiai” tímiayi Rapsases.
26 Nuiṉkia Iriakím Irkíasa uchirí̱ Sepna nuyá̱ Juash Rapsasesan chicharainiak “Waitneasam, ame takartámin Aram chichamja̱i̱ áujsata. Warí iikia nékaji. Íiji̱a̱i̱ṉkia Ipríu chichame̱ja̱i̱ṉkia chichasaip, aents wenuknum wajainia nu antukara̱i̱ṉ” tiármiayi. 27 Tura Rapsases chichaak “Warí aya atumniakek tura atumí úuntri̱nkek ju̱ títinian winia úuntur ¿akuptúkuit? Antsu ashí aents wenuknum wajainia nunasha atumji̱a̱i̱ ni íji̱niak yuat tusa tura ni shikiniak umarat tusa atumniaka túramjanta” tímiayi. 28 Nuyá̱ Rapsases wájasaṉ Ipríu chichamja̱i̱ kakantar chichaak “Asiria nuṉka úunt akupniuri̱ chichame̱ antuktarum. 29 Niṉkia chichaak ‘Esekías anaṉkramawairap. Warí winia kakarmarui̱ya̱ṉka niṉkia uwemtikramprachminiaitrume. 30 Nu arantcha Esekías Uunt Yus enentáimtustarum tusa chichartamuk “Yus enentáimtustarum. Niṉki uwemtikramprattaji tura ii nuṉke̱ncha Asirianmaya̱ akupniúsha akintrukat tusa peṉké tsaṉkatkashtatui” takui̱ anturkairap. 31 Núnisaṉ Esekías tana nuka peṉké pachisairap. Asiria nuṉka akupniúri̱ chichaak “Atumji̱a̱i̱ aṉkant atí tusarum iiní̱ surumaktarum. Túrakrumka atumí nuṉke̱n tsapana nu yurumak yurumáttarme. Núnisrumek atumí nuṉke̱n péṉker entsa táurar iwiaramua nuya̱ṉ umartatrume. 32 Nuyá̱ atumí nuṉké̱ urukua núnis trikiu, uwa, paṉ najantaisha winiu najantaisha núnisaṉ uriwiu asuitiri̱sha tura ashí arak ainia nu tsapatai̱ nuṉkanam wi tana atumín yarummam átumka nui̱ṉ péṉker pujuttarme.” Tura Esekías chichaakka “Uunt Yus aṉkant awajtámsattaji” taku anaṉkramprumna nuka peṉké ántar tau asamtai anturkairap. 33 Wats, chíkich nuṉka mátsatka ainia nuna yusri̱ ni nuṉke̱n Asiria akupniúri̱ kakarmari̱ya̱ ¿uwemtikraruk ainia? 34 Kame Amat tura Arjat nuṉkan yusri̱sha ¿tui̱ pujuinia? Núnisaṉ Separwáim, Ena tura Ipia nuṉka yusri̱sha ¿tui̱ pujuinia? Nu yussha ¿urutáimpia Asiria kakarmari̱ya̱ Samaria nuṉkancha uwemtikrarma? 35 Tura ashí nuṉka yusri̱ ainia ju̱ winia kakarmarui̱ya̱ ¿uwemtikrarmaka? ¿Urukamtai Jerusaréṉ nuṉka Uunt Yusri̱ uwemtikrattawai tu enentáimprum?’ úunt akupin tawai” tímiayi. 36 Túrasha úunt akupin Esekías peṉké ái̱kiairap takui̱ aentska mitia ajasármai. 37 Nuiṉkia Irkíasa uchirí̱ Iriakím úunt akupniu je̱e̱n wáinniuya nu tura Sepna papin áiniuya nusha nuyá̱ Asapa uchirí̱ Juash úunt akupin túrunamu áatniuya nu pushiri̱n já̱a̱kar Rapsasesa chichame̱n ujaktaj tusar Esekíasai̱ wéarmiayi.