2 Akupin
24 Tura Juasim úunt akupin pujumia nui̱, Papirúnia úunt akupniuri̱ Napukutunusúr kakarmaja̱i̱ nu nuṉkan eṉkemtuamiayi. Tura Juasimnaka menaintiú uwí nin umirin awajsámiayi. Túramaitiat Juasim ataksha enentáimiar íksaṉ akupniun kajerkámiayi. 2 Túrasha Uunt Yus ni etserniuri̱ armia nuja̱i̱ timia nuna umíak Jutanmaya̱n ashí amukarat tusa Kartíanmaya̱sha, Sírianmaya̱sha tura Muápnumia̱sha núnisaṉ Amunnumia̱ suntarnasha akuptúrarmiayi. 3 Tura Jutanam túrunamia nuka, Manasés ti yajauchin túrawarmia nuja̱i̱ Uunt Yus Jutanka ni íimmianumia̱ emeṉkáktaj tusa Uunt Yus akupkámu asa túrunamiayi. 4 Warí shuar warinkish túracharu numpe̱ uputúrar tura Jerusaréṉ péprunmasha nu numpan ipiakamtai Uunt Yuska tsaṉkuratniunka peṉké nakitrámiayi. 5 Juasima ashí túramuri̱ṉkia Jutanmaya̱ Úunt Akupin Túrunamu Aatai̱ papinium áarchamuk ainia. 6 Tura Juasimka ni we̱a̱trí̱ ayamuwearmia nui̱ṉ nisha ayamumiayi. Túrunamtai ni uchirí̱ Juakin úunt akupin ajasmiayi. 7 Nuya̱ṉka Ejiptunmaya̱ akupniúka ni nuṉke̱ya̱ṉka atakka jíinkichmiayi. Warí Ejiptu entsanmaya̱ juarki̱ Yúpratis entsa tímianai Ejiptunmaya̱ akupniu nuṉke̱ya núnaka Papirúnianmaya̱ úunt akupin ashí atantrámu asa túrunamiayi.
Juakinji̱a̱i̱ peṉkeri̱ armia nuja̱i̱ Papirúnianam achira yaruakma
8 Juakinkia tiasiúchu uwí takaku menaintiú nantuchik Jerusaréṉ péprunam akupin pujusmiayi. Nukurí̱nkia Jerusaréṉnumia̱ Nijiustauyayi Irnatána nawantri̱. 9 Tura nisha ni aparí̱ yajauch túramia núnisaṉ túrak Uunt Yus íimmianumsha ti yajauchin túramiayi.
10 Nú tsawantin Papirúnianmaya̱ úunt akupin Napukutunusúra suntari̱ Jerusaréṉja̱i̱ mániatai tusar káutkar péprun téntakar matsamtúkarmiayi. 11 Tura ni suntari̱ péprun téntakar matsamtúkar pujurainia úunt akupin Napukutunusúrsha támiayi. 12 Túrunamtai Jutanmaya̱ akupin Juakinkia nukurtiuk tura yaintri̱ núnisaṉ suntara uuntri̱ nuyá̱ takarniúri̱ armia núurtiuk úunt akupin Napukutunusúrai̱ surumakmiayi. Tura Juakinkia uchu uwí akupin ajas pujamunam Papirúnianmaya̱ akupin Juakinnaka achik jukimiayi.
13 Nuyá̱ úunt akupin Napukutunusúr Uunt Yusa Jé̱e̱nia̱n núnisaṉ úunt akupniu je̱e̱n kuit irunmia nunasha mash jusamiayi. Nuna tura Saramúṉ Israernum úunt akupin pujus Yus Je̱a̱nam takatai̱ṉ kuriji̱a̱i̱ tí shiirmachin najankamia núnaka mash tsái̱kmiayi. Nu túrunamtai Uunt Yus timia nuka tímiatrusaṉ uminkiamiayi. 14 Tura Jerusaréṉ nuṉkanmaya̱ aentsnaka ashí yarumainiak péṉkeri̱ uunt armia nunasha tura suntar mesetan umumiatka kakaram armia nunasha núnisaṉ úweje̱ja̱i̱ṉ wariṉkísha shíirmach najanin armia nunasha nuyá̱ jiruja̱i̱ takakma armia nunasha ashikia tias mir aentsun achirar yaruakarmiayi. Túrunamtai yaaksha juákchamiayi antsu áyatik aents peṉké kuítri̱ncha armia nuke juákarmiayi.
15 Núnisaṉ úunt akupin Napukutunusúrka Juakinnaka nukurtiuk tura ashí nua̱ri̱miak nuyá̱ ni yaintri̱ armia nunasha ántsaṉ nu nuṉkanam péṉkeri̱ kakaram armia nuí̱miak Jerusaréṉnumia̱n achirar Papirúnianam yaruakarmiayi. 16 Tura aents mesetan unuimiátka Papirúnianam achira yaruakmaka siati mir ármiayi. Tura úweje̱ja̱i̱ṉ wariṉkish shíirmach najanin armia nu jiruja̱i̱ takakma armia nu irurmaka mir aents ármiayi. Kame mesetan unuimiátkaru kakaram áiniaṉka Papirúnianam ashí yaruakarmiayi. 17 Nuna tura Papirúnianmaya̱ akupniúka Juakinkia kaná aparí̱ Mataníasan úunt akupin awajsámiayi. Tura ni náari̱nkia yapajtiua Setekías anaikiamiayi.
Setekías akupkámu
18 Tura Setekíaska painti unu uwí takaku Jerusaréṉ péprunam úunt akupin ajas aunse uwí pujusmiayi. Ni nukurí̱ṉkia Jirimíasa nawantri̱ Amutar Ripna nuṉkanmaya̱uyayi. 19 Kame nisha Uunt Yus iismasha Juasim ashí túramia nuja̱i̱ métek ti yajauchin túramiayi. 20 Tuma asamtai Uunt Yussha Jerusaréṉnaka Jutaja̱i̱ íitian nakitiáiniak tí kajerak iniaisarmiayi. Nuyá̱ Setekíaska Papirúnia nuṉka akupniúri̱n umirtan nakitiak kajerkámiayi.