2 Akupin
23 Nuya̱ṉka úunt akupin wiji̱a̱i̱ iruntrarti tusa Jutanmaya̱ nuyá̱ Jerusaréṉnumia̱ úuntnasha ashí untsukarmiayi. 2 Nuyá̱ úunt akupin Uunt Yusa Je̱e̱n wéak Jutanmaya̱ áishmaṉkan tura Jerusaréṉnumia̱ matsamármia nunasha núnisaṉ Yúsnan etserniuncha ántsaṉ Yúsnan takarniuncha nuyá̱ ashí aentsun uchichinmaya̱ juarki̱ úuntnasha yaruakarmiayi. Tura nu aentska ashí ántuiniamunam Chícham Najanamu papí aarma Uunt Yusa Je̱e̱n aan wáinkiarmia nuna ashí áujsamiayi. 3 Nuya̱ṉka úunt akupin wajaki̱ páunam ayamach wajas, yamaikia Uunt Yus wakera nuja̱i̱ métek túrakun nekas enentái̱rja̱i̱ tura ashí wakantruja̱i̱ Ni akupkámu tura Ni chichame̱ ju̱ papinium chícham najanamu aarma ana núnaka umiktatjai tusa Uunt Yussha íimmianum chichaman najanamiayi. Nuna túrakui ashí aents nui̱ matsamármia nusha nuka nekas umiktatji tusar ashí wajakiarmiayi.
Najankamu yus ainia nuna Jusías emeskarma
4 23:4-6 Kame úunt akupin Jusíaska Yúsnan pujurniu uuntri̱ Irkíasan tura chíkich Yúsnan pujurin armia nunasha chicharainiak Uunt Yusa Je̱e̱n Paarna tura Aseranu núnisaṉ yáanusha wariṉkish írunna nuka ashí ji̱i̱rtarum tusa akupkámiayi. Túram núnaka ashí ji̱i̱rar Jerusaréṉnumia̱nka arant ekemákarmiayi túrawar yuṉkunmiri̱ṉkia Pitirnum júkirmiayi. Núnisaṉ najankamu yus ainia nuna takarin Páaran tura etsa̱ncha núnisaṉ nantuncha nuyá̱ nayaimpiniam írunna nunasha ántsaṉ yaan kuṉkuinian áestin armia núnaka ashí jí̱i̱rmiayi. Nuna tura Asera enentáimtutai̱ numi Uunt Yusa Je̱e̱n amia nunasha ji̱i̱ki̱ Jerusaréṉnumia̱ṉka arant jukí̱ áesamiayi. Tura yuṉkunmiri̱ṉkia aents iwiarsarma armia nuna uká ukatú awajsarmiayi.
7 23:7-9 Ántsaṉ nuamtak áishmaṉkak tsanirmatai Uunt Yusa Je̱e̱n irunmia nunasha tesawarmanum Asera áentsratniun nuwa̱ apakmatai akatúrar tsairarmiayi. Áitkiasaṉ úunt akupin Jusíassha péprunmaya̱ najankamu yúsnan takarin armia núnaka ashí ji̱i̱r tura naint kuṉkuin áestutai̱ amia núnaka ashí emeskamiayi. Núnisaṉ pepru uuntri̱ Jusuí wá̱i̱ti̱a̱i̱ri̱ tutainiun áestutai̱ pujuarmia nunasha emeskamiayi. Tura Yúsnan pujurin Uunt Yusan takarcharmia nusha ni ái̱ji̱a̱i̱ṉkia paṉ karin eṉketáchman tuke yúarmiayi.
10 23:10-14 Núnisaṉ Jusíaska yaaksha uchirí̱n tura nawantri̱nkisha Murukan áestuawara̱i̱ tusa Tupitniasha emeskamiayi. Nuya̱n uunt je̱a̱ Etsa̱ íktusma kawái matsamtai̱ armia nunasha jusa káruri̱ncha áestukarmiayi. Núnisaṉ Uunt Yusa Je̱e̱n á̱a̱ri̱n áestutai̱ najankamu armia nunasha emesak tsainiakaruri̱nkia Kitrun pakanam utsaṉkarmiayi. Tura Jerusaréṉnumia̱ṉka etsa̱ akatainmaani̱ najankamu mui̱jmiai̱ Setunnumia̱ yus Astarte nuyá̱ Muápnumia̱ yus Kímius núnisaṉ Amunnumia̱ Mirkum* áestutai̱ najankamu naint iruniarmia nunasha ashí emeskarmiayi. Nuya̱ṉka Jusíaska kaya najankamu yus enentáimtutai̱ armia núnaka tsaik núnisaṉ Asera enentáimtutai̱ numi armia nunasha ajar nui̱ṉkia aentsu ukunchí̱n utsaṉtawarmiayi.
15 23:15-20 Núnisaṉ Pitirnum Jirupuám áestutai̱n najanamia nunasha áesak emesak yuṉkunim awajsámiayi tura Asera numiri̱ncha áestuamiayi. Áitkiasaṉ aents iwiarsarma naint irunmia nuna Jusías wainiak ukunchniaka jura áestutai̱ armia nuna mui̱jmiai̱ awajkartaj tusa nui̱ áeskamiayi. Tura Jusíaska najanamu wajana ¿ausha warimpiait? tusa anintrúsmiayi. Tutai chicharainiak “Auka Jutanmaya̱ Yusan enentáimtin áishmaṉ ame yamái túrukumna nuna mash etserkamia nu iwiarsamuiti” tiármiayi. Tutai “Yaaksha nú ukunchniaka antiṉchati ánik iniaisatarum” tímiayi. Kame Jusíaska Samarianmasha najankamu yus enentáimtutai̱ Uunt Yusan akajkarmia nunasha Pitirnum itiurkamia núnisaṉ mui̱jmiai̱ awajkámiayi. Kame Jusíaska najankamu yus enentáimtutai̱niam takakma armia nuna máwar ni ukunchí̱ncha nuiṉ áestukarmiayi. Nuna túruk ikiuak Jerusaréṉnum waketkimiayi.
Jusías Yusa namperi̱ najatamu
21 Nuyá̱ úunt akupin ashí aentsun chichaman akuptuiniak “Chícham najanamu papí aarma tana tímiatrusrumek paṉ karin eṉketáchma yutai̱ Paskua namper Uunt Yus atumí Yusri̱ najatatarum” tu akupkámiayi. 22 Kame Israer shuara chichamprin Israernum yaunchu akupkarmia nui̱sha tura Israernum nuyá̱ Jutanam akupin akupkarmia nui̱sha paṉ karin eṉketáchma yutai̱ Paskua namper tímiajtiksar Uunt Yus najatamuka atsumiayi. 23 Jú̱ nampernaka Páskuanka akupin Jusías tiasiúchu uwí akupin ajas pujamunam Úunt Yusnaka Jerusaréṉnum najatawarmiayi.
Jusías yajauch aentsu waitnentrachma
24 Núnisaṉ akupkámu chicham najanamu papí áarman Yúsnan pujurin Irkías Uunt Yusa Je̱e̱n aan wainkiamia nuna umíak uwishniuncha jaká wakaní̱n untsuuncha tura nekamniuncha ántsaṉ aents chikichik chikichik ni yusri̱n takaru armia nunasha nuyá̱ najankamu yus ti yajauch ásar mui̱jmiai̱ armia nunasha Jusíaska ashí amukmiayi. 25 Kame akupkámu chichaman Muisais aarmia nuna Uunt Yus wakera nuja̱i̱ métek túrak nekas enentáiji̱a̱i̱ tura takamtsuk wakaní̱ji̱a̱i̱ núnisaṉ ashí ni kakarmari̱ji̱a̱i̱ úunt akupin Jusías umikmia tímiatrus umikiuka yáunchusha tura ukunmasha chikichík akupniuksha peṉké atsumiayi. 26 Túmaitkiusha Uunt Yuska Manasés ti yajauchin mui̱jmiai̱n túrak akajkamu asa Jutanka kajerkámunka peṉké tsaṉkurachmiayi. 27 Tuma asamtai Uunt Yus chichaak “Israeran túramaj nútiksanak Jutancha Wi íimmianumia̱ṉka yajá akupkáttajai. Tura Jerusaréṉ péprun Winia atí tusan anaikiamaj nunasha tura ‘ju̱ je̱a̱nam Winia naar tuke átatui’ timiaj nunasha peṉké pachischartatjai” tímiayi Yus.
Jusías jakamu
28 Nuyá̱ Jusías chíkich takatan nuyá̱ ashí ni túramuri̱sha Jutanmaya̱ Úunt Akupin Túrunamu Aatai̱ papinium áarchamukait. 29 Kame Ejiptunmaya̱ akupin Parauṉ Nikiau Asirianmaya̱ akupniuja̱i̱ mániattsa waruk Yúpratis entsanam ayamach jeamiayi. Nuna wainiak úunt akupin Jusíassha jiintiukmiayi túrasha Mikitiunam wainiak Parauṉ mámiayi. 30 Tura ni takarniúri̱ armia nusha ni aya̱shi̱n kárunam eṉkerar Mikitiunmaya̱ Jerusaréṉnum júkiar ní iwiarnastinniumaṉ iwiarsarmiayi. Túrawar nú nuṉkanmaya̱ aents Jusíasa uchirí̱n Juakasan asuiti ukatkar apái̱ ame náamkata tusar akupin awajsarmiayi.
31 Juakas akuptan naṉkamamia nuiṉkia paintitráis uwí takakuyayi tura menaintiú nantu Jerusaréṉnum akupkámiayi. Ni nukurí̱ṉkia Jirimíasa nawantri̱ Amutar náartiniuyayi. Nisha Rípnanmaya̱uyayi. 32 Tura nisha ni we̱a̱trí̱ yajauch túrawarmia núnisaṉ túrak Uunt Yus íimmianumsha ti yajauchin túramiayi. 33 Túrasha Jerusaréṉnum akupka̱i̱ṉ tusa Amatnum Ripra péprunam Parauṉ Nikiau Juakasan achik sepunam eṉkeamiayi. Tura nuṉkanka kuit sian tarentu tura kúrikia chikichik tarentu jeá akikmakti tu chichaman najatamiayi Parauṉ Nikiau. 34 Tura Parauṉ Nikiau Jusíasa uchirí̱n Iriakímian ni aparí̱n úunt akupin anaikiamiayi. Túrasha ni náari̱nkia yapajtiua Juasim anaikiamiayi. Antsu Juakaska Ejiptunam jukimiu nui̱ jakamiayi. 35 Juasim kuítian tura kurin Parauṉkan akikmiayi. Túrasha Parauṉ súsatniun nu nuṉkanmaya̱ aents kuítian akikmakarti tu chichaman najatamiayi. Parauṉ akupmiania nuna ímiatrusnak kuítian sútaj tusa túramiayi. Aents nui̱ pujuarmia nuka takaku armia nuja̱i̱ métek kuítniasha tura kurincha urutmak akikmaktiniait nu akikmaktarum Parauṉ Nikiau súsatin tusa kakarmaja̱i̱ seawarmiayi.
Juasim Jutanam akupin ajasma
36 Nuyá̱ Juasim painti seṉku uwí takaku akupin ajastinia juárkimiayi. Nisha aunse uwí Jerusaréṉnum akupkámiayi. Tura ni nukurí̱ṉkia Pitiayása nawantri̱ Seput náartin Rúumanmaya̱ núwa̱uyayi. 37 Tura nisha ni we̱a̱tri̱ yajauch túrawarmia núnisaṉ túrak Uunt Yus íimmianumsha ti yajauchin túramiayi.