2 Akupin

Juran Israernum akupin ajasma

3 3:1-3 Jusapát akupin ajas tiasiúchu uwí Juánam pujamunam Juramsha Israernum akupin ajasmiayi tura tuse uwí pujusmiayi. Kame Juramka Paar enentáimtutai̱ kayan aparí̱ najanamia nuna jusamiayi. Tuma asa yajauchin túraksha ni uuntri̱ túrawarmia timianú yajauchinkia túrachmiayi. Túrasha nuja̱i̱ Israernaka yajauchin túrumtikiamiayi.

Muapka nupetkattarme tusa Iriséu étserma

4 3:4-8 Kame Muápnumia̱ úunt akupin Misaka sian mir murikiun tura sian mir murikiu ure̱n Israer shuaran súsatin ármiayi. Túrasha Akaap jakamtai Israer shuarka akikchartai tusa Muápnumia̱ akupin akiktinian nakitrámiayi. Túrunamtai Juramka Israernumia̱ suntaran iwiarak Jutanmaya̱ úunt akupniun chichaman akuptak “Muápan mesetan jurusjai amesha yaintkiattamek” tímiayi. Tutai Jusapátcha “Ee yáiṉtatjame” tímiayi.

9 3:9-12 Nuya̱ṉka úunt akupin Israernumia̱ Jutanmaya̱ nuyá̱ Etumnumia̱sha ashintiukar siati tsawant atsú nuṉkanmaani̱ yujasarmiayi. Túrasha suntar tura taṉkun yarumka armia nu umarartincha entsa amuukamiayi. Túrunamtai Israernumia̱ úunt akupin Muápnumia̱ aentsnum surutmaktaj tusan uuntka “Ju̱i̱ṉkia ikiatmakaj” tiármiayi. Nuyá̱ Jusapát chichaak “Ju̱i̱ tíjiu̱chikia Yúsnan etserniuka atsawak” tímiayi. Takui̱ Iríasa yaintri̱ “Iriséu ju̱i̱ tíjiu̱ch pujawai” tiármiayi. Tuíniakui Iriséun chichastai tusar weriarmiayi.

13 3:13-19 Nuya̱ṉka Iriséu Israernumia̱ úunt akupniun chicharuk “¿Wisha áminiuncha warinia íistiniaitiaj? Entá, atumí aparí̱ najanamu yúsnan etserin anintrútarum” tímiayi. Tutai akupin ataksha chichaak “Atsá nuka túrashtatji. Warí, Muápnumia̱ aentsnum surutmaktaj tusa Uuntka ikiatmakchajik” tímiayi. Takui̱ Iriséu chichaak “Uunt Yus íimmianum nekas tajai Jutanmaya̱ úunt akupin Jusapátan araantachkunka peṉké pachischaintjiame. Túrasha árpan tuntuin itiatárum” tímiayi. Tura árpan túntuiyakui Yusa kakarmari̱ Iriséun tarurmiayi. Túram chichaak “Paka ju̱i̱ entsa pajamkattawai. Pajamkamtai epenkatarum tura atumsha tura atumí taṉkuri̱sha umartatrume. Warí Yuska tujintkiachminiaiti tura Muápnasha atumín íkturmastatrume. Túrutmawakrumin péprusha emeskattarme túrarum numisha ajá ajá nuyá̱ yumirmatcha yutú yutú núnisrumek nuṉkasha aya káyak awajsattarme” tímiayi.

Muápnumia̱ aents nupetkarma

20 3:20-25 Nuya̱ṉka kashin káshik éntsaka Etumnumaani̱ taa patutukarmanum piákarmiayi. Kame Muápnumia̱ aentssha úunt akupin mesetan jurus káutkarmia nuna nekaawar nisha mesetan iwiarnatkarmiayi. Tura Muápnumia̱ aentska nuní̱ iimiainiaj tukamá etsa̱ entsanam wajamtai entsa numpa núninian wáinkiarmiayi. Tura chichainiak “Númpaiti. Warí úunt akupniuka nuamtak mániachariash” tiármiayi. Tura mániakur kuit utsaṉkar ikiukiarma júukartai tusar ashintiukarmiayi. Nuyá̱ matsamkamunam jeawarmatai Israer shuarka jiintiurar Muap aentsja̱i̱ mániawarmiayi. Túrawar pepru armia núnaka emé emesú najankar taurma yumirmatnasha yutú yutú numincha ajá ajá awajsarmiayi. Áyatik wenuke iwiartukar utúachmin awajsamu pepru Kirjaréset juákmiayi. Túrasha kaya eṉkeamun naṉkimtan unuimiátka armia nu nunasha jatekármiayi.

26 3:26-27 Tura Muápnumia̱ akupniúka Israer shuar awakmainiakui̱ Etumnumia̱ akupniuja̱i̱ iṉkiunia mániattsa siatisiántu suntaran jukí̱ werimiayi túrasha túratniunka tujintkiamiayi. Nuya̱ṉka uchirí̱ iwia̱i̱ri̱n achik pepru wenuke̱n maa ni ántar yusri̱ Kimiusan áestuamiayi. Túrunamtai Israer shuarnaka suira ka̱e̱ kaje̱ntukarmiayi. Tuma asamtai Israersha Jutasha núnisaṉ Etum aentssha aṉkant aṉkant ní nuṉke̱ni̱ṉ waketramiayi.