2 Akupin
Iriséu tura wajé̱ asuitiri̱ kaweṉma
4 Yúsnan etserniu uchirí̱ nua̱rí̱ armia nuyá̱ chikichik nuwa̱ Iriséun ujak “Ámin takartámin winia áishruka jákaiti. Ámeka Yusa ashamak shiir umirniuya nu nékame. Tura iin kuítian ikiatmasua nu jimiará uchirun jurutkí̱ winia takartin pujurtusarat tusa tayi” tímiayi.* 2 Nuyá̱ Iriséu anintrak “¿Warí itiurtukai túrutmea? Je̱e̱mincha warí takakam ujatkata” tímiayi. Tutai nuwa̱ aya̱k “Ámin takarniuitjiamna jú̱naka je̱a̱rui̱ṉkia peṉké takurmaktsujai. Aya chikichik ichiṉnachinmaṉ asuiti awai” tímiayi. 3 Nuyá̱ Iriséu chicharuk “Nuiṉkia ashí ame írutramurmin weme untsurí ichiṉnach aṉkant ainia nu ikiamsarta. 4 Túram ashí uchirmiji̱a̱i̱ je̱e̱min waya̱m epemitia. Nuyá̱ ichiṉnach aṉkant ainia nui̱ asuiti yaram áimnakmatai niisháa aṉkant apujkar awajmata.” 5 Tutai Iriséun ikiukí̱ nuwa̱sha je̱e̱n waketki̱ uchirtiuk wayá̱ epemimiayi. Nuyá̱ ni uchirí̱ ichiṉnachin ikiankar awajénakui asuitin yarakar awajmiayi. 6 Tura ichiṉnach ikiamsamunmaṉka mash áimpramiayi. Túrayat uchirí̱n chicharuk “Chikitcha ichiṉnach itiata” tutai “Ichiṉnaka atsawai” takui̱ nu chichamaik asuitisha yaramu meṉkakamiayi. 7 Nuna tura nu nuwa̱sha Yúsnan etserniun werí ujakmiayi. Túram chicharuk “Yamaikia nu asuitisha surukam tumashrum akikmaram nuyá̱ ampiniártatna núja̱i̱ṉkia ashí uchirmiji̱a̱i̱ wáinmamkata” tímiayi.
Iriséu tura Súnem nuṉkanmaya̱ nuwa̱ja̱i̱
8 Nu tsawantai̱ Iriséu Súnem nuṉkanam naṉkamakui nuyá̱ nuwa̱ kuítrintin winí̱ yurumam naṉkaama wetá tusa nekasa nuja̱i̱ ipiaamiayi. Túramu asa nu je̱a̱nam naṉkaamakka Iriséu nui̱ṉ yurumniuyayi. 9 Tura nu nuwa̱ ni áishri̱n chicharuk “Íimsakia, yamaikia nekaajai. Jú̱ aishmaṉ ii je̱e̱n naṉkaamak tuke iirma wéajnia ju̱ka Yusna tunaarincha áishmaṉkaiti. 10 Tuma asamtai ni pujustintri̱ yakí̱ tesarár iwiarturtai túrar peakri̱sha awa̱sar áakmatairi̱sha pujustintri̱sha nuyá̱ shiripkiri̱sha ikiursatai. Nui̱ iin íirmak taaksha kanimi” tímiayi.
11 Tura chíkich tsawantai̱ ni pujutái̱ri̱ yakí̱ tesarámuya̱ nui̱ taa kanarmiayi. 12 Nuyá̱ ni takarniúri̱ Kejasen chicharuk “Súnemnumia̱ nuwa̱ untsukta” tímiayi tura nuwa̱sha untsukam támiayi. 13 Támatai Iriséu Kejasen chicharuk “Ju̱ nuwa̱sha nekas waitneakuiti. Tuma asamtai nisha nútiksarik yáiṉchatjiash. Kame Súnem nuṉka akupniúri̱ji̱a̱i̱ tura nuíchuka suntara akupniu úuntri̱ji̱a̱i̱ yaiṉkiai tusa chichamprukchatjiash” takui̱ nuwa̱sha áimiuk “Wikia winia áentsruja̱i̱ṉ péṉker pujajai” tímiayi. 14 Nuyá̱ Iriséu chichaak “Nuiṉkia ju̱ nuwa̱sha ¿itiurak yáiṉtaj?” tutai ni takarniúri̱ Kejase chichaak “Jú̱ nuwa̱ka ni aishri̱ úuntach asamtai uchirmachuiti” tímiayi. 15 Tutai Iriséu ni takarniúri̱n chicharuk “Nu nuwa̱ untsukta” tutai untsukam wáitiniam taa wajasmiayi. 16 Nuyá̱ Iriséu chicharuk “Ju̱ uwí jeattana ju̱i̱ṉkia uchi takustatme” tímiayi. Tutai nuwa̱ aya̱k “Atsá winia uuntru, Yusna nu etserin asam, ámin shiir enentáimturmana nu ántram wishikiakum tiipia” tímiayi. 17 Tura Iriséu timia nuja̱i̱ métek tímiatrusaṉ ajapruk tsawantri̱ jeamtai uchin takusmiayi.
18 Nuyá̱ uchisha tsakarmiayi. Tura chíkich tsawantin ni aparí̱ araka juu armia nuja̱i̱ pujan uchi tarimiayi. 19 Nui̱ ni aparí̱n chicharuk “¡Muukarua muukarua!” awajmiayi. Tímiateakui ni aparí̱ takarniúri̱n chicharuk “Nukurí̱n jukitia” tímiayi. 20 Tutai nukurí̱ pujamunam jukimiayi. Uchisha nukurí̱ tikishin awa̱mas tutupin ejé jakamiayi. 21 Nuya̱ṉka nisha waka áishmaṉ Yúsnauya nuna peakri̱n áepas ikiuak waiti epeni jiinkimiayi.
22 Nuyá̱ ni áishri̱n untsúak chicharuk “Umpuruja̱i̱ akuptakum chikichik takarniuk akuptúrkata. Túrutawakmin wisha tseke wena Yúsna aishmaṉ pujana nui̱ waketutaj tusan seajme” tímiayi. 23 Tutai áishmaṉ chicharuk “¿Urukamtia yamaisha iyutam? Yamaram nantuchuiti Sáwarnash Sáwarchaiti” tutai nuwa̱ aya̱k “Shiir atí” tímiayi. 24 Nuya̱ṉka umpurunam ekemkar wétinian tí warichik iwiaramiayi tura ni takarniúri̱n chicharuk “Eṉkesam wárik éstá. Tura wi chichaachkuiṉkia awajtúsaipia” tímiayi. 25 Kame nisha we Yúsna aishmaṉ pujumia nui̱ Karmiriu nainnium jeamiayi. Yúsna aishmaṉsha arant winianak wainiak ni takarniúri̱n Kejasen chicharuk “Súnemnumia̱ nuwa̱chukait, iisiana. 26 Wats, tséken ajasam weme iṉkiuṉkam chicharkum ‘¿Péṉkerak pujam?’ titiá. ‘Ame áishrumsha ¿péṉkerak pujá. Uchirmesha péṉkerak pujá?’” tutai nuwa̱ áimiuk “Ashí péṉkerak pujuiniaji” tímiayi. 27 Tura nainnium pujan jearí Iriséun nawe̱nam achikmiayi. Túrakui Kejasesha akupkat tusa weantúkmiayi. Túrakui Iriséu chicharuk “Iniaisata. Tí kuntuts enentáimiuk áiniawai. Núnisaṉ Yuska ni itiurchatri̱n paant awajtúrsachai” tímiayi. 28 Nuyá̱ nuwa̱ chicharuk “¿Uuntá, wi uchin seammiakaj? Winia anaṉkruawaipia ¿tíchamkajam?” tímiayi.
29 Nuyá̱ Iriséu Kejasen chicharuk “Kakaram ajasta, túram winia wai̱r achikiam wetá. Yáakesh íṉkiuakmesha amikmáwaip. Núnismek yáakesh amikmátmakuisha ai̱kiaip. Tura jeam uchí yapi̱n winia wai̱r awantsata.” 30 Uchi nukurí̱ chichaak “¡Yus íirmanum tura ámiji̱a̱i̱sha nekas tajai, amiya̱ṉka kanakchattajai!” tímiayi. Nu tutai nisha nemarki̱ wémiayi. 31 Tura Kejase émak we wai̱n uchí yapi̱n awantsamiayi. Túrasha chichachmiayi tura muchitchamiayi. Tuma asamtai Kejase Iriséun waketruki̱ iṉkiuṉ chicharuk “Úchikia shintiarchai” tímiayi. 32 Nuyá̱ Iriséu nú je̱a̱nam jeá wayá̱ uchi peaknum jaka tepan wainkiamiayi. 33 Nuya̱ṉka wayá̱ niiṉki uchiji̱a̱i̱ṉ wáitin epenmi Uunt Yusan áujtusmiayi. 34 Nuna tura uchin peaknum waruk awamtuk uwejnumsha ni uwejé̱n awantás wenunam apá̱ ji̱nium ii awajmiayi. Túram uchí aya̱shí̱sha tsue̱r ajasmiayi. 35 Túrunamtai Iriséusha ikiuak nui̱ṉ ju̱ní̱ we atú we ajamiayi. Tura ataksha emka túramia nútiksaṉ túramiayi. Túram uchisha siati jachitiak nuya̱ṉka íimmiayi. 36 Tura nuyá̱ Iriséusha Kejasen untsuk chicharuk “Súnem nuṉkanmaya̱ nuwa̱ untsukta” tutai untsukam wáitiniam waya̱kui chicharuk “Ju̱á uchiram jukitia” tímiayi. 37 Tutai nuwa̱sha Iriséu jearí nawe̱n tikishmar nuṉká antiastatuk tsuntsumpruá nuya̱ṉka ni uchirí̱n jukí̱ jiinkimiayi.
Páinkiamunam tséas eṉkeamun Iriséu péṉker awajsamu
38 Nu nuṉkanam tsuka amia nui̱ Iriséuka Jirkarnum waketki̱ Yúsnan etserniu uchirí̱ji̱a̱i̱ pujuarmiayi. Nuyá̱ ni takarniúri̱n chicharuk “Yúsnan etserniu uchirí̱ yurumáwartin ichiṉkian uunta nui̱ tumpruawarta” tímiayi. 39 Nui̱ pujuarmia nuyá̱ chikichik yutai̱ nukan júuktaj tusa kampunniunam wémiayi. Tura tsápatra ánin nerek aan wainiak ni pushiri̱ji̱a̱i̱ weṉkuk juuk je̱á̱ itiá tsupir túmnium utsamiayi. 40 Nuyá̱ Yúsnan etserniu uchirí̱ yurumáwarat tusa ukati apujtusarmiayi. Túrasha túmpin yurumu matsamás nisha kakantar untsumainiak “Maa, Yusa enentáimtin áishmaṉka, ju̱ ichiṉnanmaṉka tséas eṉkeamuiti” tiar yurumátniun tujintkiarmiayi. 41 Nuyá̱ Iriséu chichaak “Arinia itiatárum” takui̱ arinian itiarmatai ichiṉnanam eṉkea “Ukái susatarum yurumáwarat” tímiayi. Kame nu túram ichiṉnanmaṉka yajauchikia peṉké atsumiayi.
Iriséu páṉkan ti núkap awajsamu
42 Nuya̱ṉka Paarsarísanmaya̱ áishmaṉ kustarnum emka arakma nere̱n juuk Yusa enentáimtin áishmaṉkan tura painti paṉ sewataja̱i̱ najanamun tura trikiu yamái tsupirnancha itiarmiayi. Túramtai Iriséu ni takarniúri̱n chicharuk “Aents yurumáwarat súsarta” tímiayi. 43 Tutai ni takarniúri̱ aya̱k “Ju̱ sian aentsnasha jú̱chiji̱a̱i̱ṉsha ¿itiura ejettaj?” tutai atak chicharuk “Aents súsarta yurumáwarat. Warí Uunt Yus chichaak ‘Yurumkaka tiártatui’ tíniuiti” tímiayi. 44 Nuya̱ṉka ni takarniúri̱sha matsattsaram yúawarmiayi. Túrasha Uunt Yus timia nuja̱i̱ métek yurumkasha tiaru juákmiayi.