2 Akupin

Iriséu Naamanan kuchaprúkun tsuarma

5 Tura áishmaṉ Naaman náartin ámiayi. Nisha Siria nuṉkanmaya̱ úunt akupniu suntari̱ úuntri̱yayi. Niji̱a̱i̱ Siria aents nupetmaktinian Uunt Yus tsaṉkatkamiayi. Tuma asamtai ni akupniúri̱nkia ti anenuyayi. Túmaitiat nu áishmaṉsha kuchaprúkuyayi. 2 Nuyá̱ Sírianmaya̱ mesetan unuimiátraru iwiarnarar wéarmiayi tura Israer nuṉkanmaya̱ nuwa̱ch misatak itiamu Naamana nuwé̱ takarniúri̱ ajasu nui̱ pujuyayi. 3 Tura nu nuwa̱ch misatak itiamu pujumia nu Naamana nuwe̱n chicharuk “Samaria nuṉkanam Yúsnan etserin pujana nuna weriṉkia kuchaprí̱ṉkia tsuámarainti” tímiayi. 4 Nuyá̱ Naaman Israernumia̱ nuwa̱ch timia nuna ni akupniúri̱n werí ujakmiayi.

5 Túram Siria nuṉká akupniúri̱ aya̱k “Péṉkeraiti iyuta. Wi Israer nuṉka akupniúri̱n papin áatratjai. Túramtai jukim wetá” tímiayi. Tutai nui̱ wéak traintia mir jirú kuítian tura sais mir kurí kuítian nuyá̱ tias pushin yamarman jukimiayi. 6 Nuya̱ṉka Israer nuṉka akupniúri̱n papí jú̱nis áatramun jukimiayi. “Ju̱ papí akuptajmena jú̱ áujsam nekaata. Winia takarniúrun Naamanan kuchaprúkua ju̱ tsuarturai tusan akupeajai.” Tu áarmauyayi. 7 Tura nuya̱sha Israer shuara úunt akupniuri̱ papí áujas pushiri̱n ja̱a̱k chichaak “Antsu ¿wi Yúskaitiaj iwiaakma susa tura jurana núkaitiaj papin akuptúruk áishmaṉ kuchaprúkua ju̱ tsuárturta turuttinia? Enentáimsakua anaṉkrak túkeneaschak túruta” tímiayi. 8 Tura Iriséu Yúsnan etserin Israer shuara úunt akupniuri̱n pushiri̱ já̱a̱kmán antuk chichaman akuptak “¿Urukamtai pushirmesha ja̱a̱kum? titiarum tura nu áishmaṉ winitriti nui̱ nekas Israer nuṉkanam Yúsnan etserin pujan nekaattawai” tímiayi.

9 Nuyá̱ Naaman ni káruri̱ji̱a̱i̱ tura kawairi̱ji̱a̱i̱ Iriséu pujamunam je̱e̱n taa wáitiniam wajasmiayi. 10 Túrunamtai Iriséu aentsun akatar akuptak “Jurtan entsanam wínchuma ataksha wínchuma ajá ajakua siati ejeti, túruna kuchaprúkua núnaka tsuámar péṉker ajastatui túramui titiá” tímiayi. 11 Támaitiat Naaman kajek wéak chichaak “Wikia jíintiurkintsuk Uunt Yusan áujturas kuchaprun antiṉtruk péṉker awajtustia tu enentáimprajai” tímiayi. 12 Tura nuna tinia antsu “Tamasku nuṉkanmaya̱ entsa Apana nuyá̱ Parpar Israernumia̱ entsaja̱i̱ṉkia naṉkaamas péṉker íruntsuk. Nui̱ wena nijiamarnaka péṉker ajaschamniakaitiaj” tinia kajek waketmiayi. 13 Nuyá̱ ni takarniúri̱ chicharainiak “Uuntru, Yúsnan etserin ¿Nu itiurchatan túramkuisha túrutskeash iniaisaintiam? ¿Jú̱kú timiá yúpichuchin entsá nijiamaram péṉker ajastatme túramka? ¿Nuka umikchamniakaitiam?” tiármiayi. 14 Nu tuíniam, Naaman Jurtan entsanam jeá wínchuma ataksha wínchuma ajá ajakua siati ejé Yúsnan etserin timia núnisaṉ ni kuchaprukmari̱ péṉker ajak uchí aya̱shí̱ya̱ tímiatrus ajasmiayi.

15 Túruna Naaman ni yarumkamuri̱ji̱a̱i̱ Iriséun waketruki̱ jearí naka wajatas chicharuk “Yamaikia wisha nekaajai ashí nuṉkanmasha Israera Yusri̱ji̱a̱i̱ métekka atsawai tajai. Tuma asamtai wi ame takarniúram asan warichinkisha amastatajna ju̱ jurumkitia” tímiayi. 16 Túrasha Iriséu aya̱k “Iwiaaku Uunt Yus íimmianum pujá asan peṉké jukishtatjai” tímiayi. Tura Naamanka nú arant wariṉsha jurumkitia támaitiat peṉké nakitrámiayi. 17 Nui̱ṉkia Naaman chichaak “Núnisaitkiuiṉkia ame takarniúram Israer nuṉkanmaya̱n nuṉkan jimiará umpurunam áentskan jurumkichmiṉkiaitiaj tsaṉkatrukta. Yamaikia ámin takarniuitjiamna jú̱naka nekas Uunt Yusan taṉkú maan súakun enentáimtustatjai. Túrakun ántar yus taṉku maar sútai̱ṉkia iniaisattajai. 18 Tura Yus tsaṉkurturat tusan jú̱chiniak seajme. Winia akuptin ántar yus Rimiun enentáimtutai̱ je̱a̱nam wayá̱ ni uwejé̱ja̱i̱ kunturui̱ awantrukmatai wi tikishmátramtaisha nu túramunam Uunt Yus tsaṉkurturti” tímiayi. 19 Nuyá̱ Iriséu chicharuk “Shiir wetá” tutai wémiayi. Tura Naamancha waketki̱ ajapén ajasmanum 20 Iriséu Yúsna aishmaṉka takarniúri̱ Kejase nuna iis “Winia úuntur Sírianmaya̱ Naaman itiama núnaka jurutsuk wetí tusa akupkáyi. Uunt Yus íimmianum ti nekas tajai ni úkuri̱n pataatukan amayá̱ṉkan warinkish nin seatjai” tu enentáimsamiayi. 21 Kejasesha Naamanan pataatukmiayi. Tura Naaman úkumur tseke winian wainiak áujsataj tusa kárunmaya̱ akaikímiayi tura inintrak “¿Ashí péṉkerak pujam?” tímiayi. 22 Tutai ni aya̱k “Ee, túrasha winia úuntur chichaak ‘Ju̱ ujaka ikiuta tusa akuptúkai. Yamaichik jimiará natsa Yúsnan etserniu uchirí̱ naintiar naintiar nuṉka Eprainniumia̱ taarai. Tuma asamtai chikichik tarentu kuítian tura jimiará entsatai̱ yamarma nuna nin súsartaj akuptúrkati’ tawai” tímiayi. 23 Nuya̱ṉka Naaman chichaak “Antsu jimiará tarentu kuítian amaajna ju̱ achikchaintmeash” tímiayi. Nisha nu arant awajeam jimiará kuítian tura entsatai̱ yamarman jímiaran nuyá̱ jimiará kustarnum eṉkea jiṉkiamiayi. Tura Naamana takarniúri̱ jímiar pujuarmia nuna jukí̱ ésarat tusa akupkarmiayi. 24 Naint tépepranam ejem jimiará kustaran jurukiar je̱e̱n ikiú waketki̱ taa nu áishmaṉkan amikmáwar awakeararmiayi. 25 Nuya̱ṉka nisha wayá̱ ni uuntri̱ pujamunam eem wajasmiayi. Túrunamtai Iriséu inintrak “Kejaseá, ¿tuyá̱ winiam?” tutai nisha áimiuk “Ame takarniúrmeka tuí̱ṉkish wéchayi” tímiayi. 26 Nuyá̱ Iriséu chichaak “Áishmaṉ ámin iṉkiunmaktaj tusa ni káruri̱ya̱ jiinkí̱ tarutrama nui̱ winia enentái̱rja̱i̱ wáinkiachjamek. Kame ju̱ka kuítian tura entsatáincha uriwiu tura uwa ajancha murikniasha waakancha áishmaṉ nuyá̱ nuwa̱ takarin ainia nunasha achikiártaj tame nu ¿yamaikik enentáimpratniuit? 27 Tura asakmin Naamana kuchapri̱ ámin achirmáktatui. Tura ame tiraṉmisha tuke achimiáki̱ wéartatui” tímiayi. Tura nuya̱i̱k Iriséu pujamunmaya̱ micha pujua tímianun kuchapruk jiinkimiayi.