2 Akupin

7 7:1-2 Kame Iriséuka “Kashin ju̱ni̱ ai̱ trikiu tí peṉker nekeṉma chikichik nekapmamu chikichik kuitji̱a̱i̱ tura sewataka jimiará nekapmamu chikichik kuítji̱a̱i̱ṉ Samaria pepru wá̱i̱ti̱a̱i̱ri̱n surunkattawai tawai Uunt Yus” tímiayi. Takui̱ suntara uuntri̱ Iriséun chicharuk “Uunt Yus nayaimpin áaṉkamtaisha nuka túrunachainti” tímiayi. Takui̱ Iriséu chicharuk “Amesha nu túmaka wainkiattame túrasha yútaka yúashtatme” tímiayi.

Samaria téntaka matsamtúkma amuukaiti

3 7:3-7 Kame kuatru aents kuchaprukaru pepru wá̱i̱ti̱a̱i̱ri̱ pujusár “Ju̱i̱ pujusrisha tura péprunam waya̱rsha métek tsukái jákartatji. Tuma asamtai Sírianmaya̱ aents matsamkar matsatainia ai̱ wéartai tura tsaṉkurtámainiakrinkia iwiaaku ártatji antsu mantamainiakrinkia nui̱sha ántsarik jákartatji” tiármiayi. Nuna tiar Sírianmaya̱ aents matsamkarmanum wéarmiayi. Túrasha chikichík aentsnaksha wáinkiacharmiayi. Warí nú matsamkamunam untsurí karu tura kawái núnisaṉ ti untsurí suntar wininiak téter ajainian Uunt Yus ántumtikiarmiayi. Túmakui̱ Sírianmaya̱ aents chichainiak “Jú̱naka Jet aentsu úunt akupniuri̱n tura Ejiptunmaya̱ úunt akupniu ipiaawar Israer shuar uuntri̱ iin amutmaktaj tusa winitrámainiaji” tusar pisainiak ashí ikiukiarmiayi.

8 7:8-10 Tura kuchaprukaru aents matsamkamunam jeawar jutai̱ je̱a̱ pujamunam waya̱war yurumá umar pushin kurin nuyá̱ kuítian yaruak ú̱karmiayi. Chíkich je̱a̱nmasha nútiksaṉ túrawarmiayi. Tura chichainiak “Péṉker túratsji, warí yamaikia péṉker tsawantchakait tura iikia etsertsuk pujatsjik tura tsawa̱rti tusar nákakrikia yajauch jeartámattaji túmawa̱i̱j tusa waya̱r úunt akupin ujaktai” tiármiayi. Nuya̱ṉka wéar waiti wáinniun ujakármiayi.

11 7:11-16 Nuya̱ṉka waiti wáinin úunt akupniun werí ujakármiayi. Tutai úunt akupin chichaak “Sírianmaya̱ aentska ii tsukái kají̱ari̱n nekarmainiaji tuma ásar yurumkan jiintiurarmatai achirar iisha péprunam waya̱warmi tusar matsamkamunmaya̱ṉka jíintrar u̱mprutmararji” tímiayi. Úunt akupin takui̱ ni takarniúri̱ chichaak “Kawái seṉku émtikia akupeakur kawái juákaru uku akupratai tura nuka uku wésar untsurí aents ashiniua núniartatui. Túrawarar íisartai warí urukatin” tímiayi. Nuya̱ṉka jimiará kárun kawainiu nenakman itiar úunt akupin chichaak “Werum iyuutarum” ti akuprarmiayi. Nuya̱ṉka pataatukar Jurtan entsa tímianai ejewarmiayi. Túrasha pisainiak jintiaṉka mámush tura mesetnum mánitiai utsaṉman tepetar ajainian wáinkiarmiayi. Tura waketkiar úunt akupniun ujakármiayi. Nuya̱ṉka aents jíintiurar ashí yaruakarmiayi. Nuya̱ṉka Uunt Yus timia núnisaraṉ Samaria pepru wá̱i̱ti̱a̱i̱ri̱n trikiu péṉker nekeṉman chíkich nekapmamun chikichik kuitji̱a̱i̱ tura sewatanka jimiará nekapmamun chikichik kuitji̱a̱i̱ súriarmiayi.

Suntara uuntri̱ jakamu

17 7:17-20 Kame Iriséu chichaak “Kashin ju̱ni̱ ai̱ Samaria pepru wá̱i̱ti̱a̱i̱ri̱n trikiu tí peṉker nekeṉma chikichik kuitji̱a̱i̱ tura sewataka jimiará nekapmamu chikichik kuitji̱a̱i̱ surunkattawai Uunt Yus tawai.” Takui̱ suntara uuntri̱ “Uunt Yus nayaimpin áaṉkamtaisha nuka túrunachaintia” takui̱ Iriséu suntara úuntri̱n chicharuk “Ámeka wainkiayatmek yúashtatme” timia nuka tímiatrusaṉ uminkiamiayi. Suntara úuntri̱nkia wa̱i̱ti̱a̱i̱ wáinkiata tusa awajsámun aents jiiniainiak chanúa máwarmiayi. Iriséu timia núnisaṉ waintiaṉka wainkiayat yútanka yúachmiayi.