2 Akupin

8 8:1-6 Iriséu uchirí̱n iniantukmia nu nuwa̱ Iriséu timia nuna umik nuiṉkia tsukamnatin asamtai yajá wémiayi. Tura siati uwí naṉkaamasmatai ataksha waketki̱ taa úunt akupniun chichareak nuṉkar awaṉturkitia tutai úunt akupniuka nu nuṉkanam urutmá kuitnia jí̱i̱kiarmia nuja̱i̱ irur mash awaṉtukmiayi.

Jasaér úunt akupin ajastinian Iriséu étserma

7 8:7-15 Nuya̱ṉka Sírianmaya̱ úunt akupin Piniatát suṉkurmak pujus ni suntari̱ úuntri̱n akupeak ántrar súsatniuncha sura “Winia jáamurui̱ya̱ péṉker ajastájash” anintrústa tusa Jasaéran Iriséui̱ akupkámiayi. Tutai Iriséu chichareak “Ee, péṉker ajastatui túrasha ni suntari̱ uuntri̱ nin máattawai akupin ajastaj tusa” tímiayi. Nuya̱ṉka Iriséu timia nuka tímiatrusaṉ uminkiamtai Jasaér úunt akupin ajasmiayi.

Jutanmaya̱ úunt akupin Juram

16 8:16-24 Kame Jusapáta uchirí̱ Jirupuámka Jutanam úunt akupin ajas pujus Uunt Yus iismasha tí yajauchin túramiayi. Nuya̱ṉka Etumsha Jutanmaya̱ aṉkant ajastaj tusa ni akupniúri̱n anaikiamiayi. Túrunamtai Etumnumia̱ suntarja̱i̱ mesetan pujuras úunt akupniuka jakamiayi. Kame Jirupuáman chíkich túrawarmari̱ṉkia Jutanmaya̱ Úunt Akupin Túrawarma Aatai̱ papinium aakma áiniawai.

Jutanmaya̱ úunt akupin Ukuséas

25 8:25-29 Tura Jirupuám jakamtai ni uchirí̱ Ukuséas úunt akupin ajasmiayi Jutanmaṉka. Ukuséas núnisaṉ Uunt Yus iismasha tí yajauchin túramiayi. Nuyá̱ Ukuséaska Sírianmaya̱ úunt akupniun mesetan najata maanai pujus Sírianmaya̱ suntar aya̱shi̱ emesturam jaa ajasmiayi. Tura péṉker ajastaj tusa Jisriir péprunam waketkimiayi. Nui̱ Israernumia̱ úunt akupin Ukuséasan íistaj tusa jearmiayi. Túram nuya̱ṉka nawamnaikiarmiayi.