Neemías
Neemías ni shuari̱n Yusan seatmia
1 Ju̱ka Akaríasa uchirí̱ Neemías áarmaiti. Tura chichaak “Wikia pepru úuntri̱n Súsanam pujái̱ Artajírjis akupeamu painti uwí jeamunam Kisríu nantutin 2 winia yatsur armia nuyá̱ Anani Jutanmaya̱ shuarja̱i̱ wi pujamunam táarmiayi. Túrunawarmatai Jerusaréṉnan tura Israer shuar achirar yaruakma iwiaaku juákaru waketrarmia nunasha anintrúsmiajai. 3 Tutai achirar yaruakma juákaru ni nuṉke̱n waketrarua nuka tí waitkiasma wishiktai̱ pujuiniawai. Tura Jerusaréṉka wenuke̱sha sá̱a̱rmaiti núnisaṉ wáitiri̱sha áestukmaiti” tu ujatkarmai.
4 Nu chichama antukan kúntuts enentáimkiun núkap tsawant úttsan pujusmajai. Túmakun ijiarmán nayaimpinmaya̱ Yusan seakun 5 “Maa, Uunt Yusru, nayaimpinmaya̱ Yusá, Ámeka ti naṉkamantu kakaram ashammai Yúsaitme. Tura shuar Ame akupkámu umiktin chichaman tura Ame aentsja̱i̱ chícham najanamun uminiaka aneakum waitnenniuitme. 6 Kame wi nuyá̱ wí shuarsha Amiin yajauch túraitji. Ame takartámin tsawai̱sha tura káshisha seatmana nu anturkata. Warí Israer shuaran Ame takartámin ainia nuna wi niin seatajme. Tura Israer shuarti Amiin yajauch túrawaruitiaji wi ujajmena nui̱ waitneasam tsaṉkurkarturta. 7 Ame takartámin Muisais Yus akupkámu umiktin chicham susamamna nusha umitsuk Amiin timiá yajauch túraitji. 8 Ame tímiam nu waitneasam enentáimturta. Kame Ame takartámin Muisais chichareakum ‘Winia chichamur umíachkurmiṉkia ju̱ya̱ṉka ji̱i̱ran yajá chíkich nuṉkanam tsakiṉmaktatjarme. 9 Antsu Wini̱i̱n waketkirum ataksha akupkámu chicham umíakrum péṉker túrakrumni̱ṉkia awakeartatjarme. Kame nayaim náṉkatrana timianú yajá pujarmini̱ṉ Winia naar shiir awajtai̱ atí tusan anaikiamiaj nú nuṉkanam ataksha iruran matsastatjarme’ tíchamkiam. 10 Warí nisha Amé shuar tura Ámin takartámin Ejiptu nuṉkanmaya̱ Ame kakarmarmiji̱a̱i̱ jí̱i̱rmiam nu áiniawai. 11 Uunt Yusá, wi seattajam nu anturtukta. Tura Amé shuarsha Ame náarmin shiir awajsataj tusar wakeruinia nusha enentáimturta. Nuyá̱ wi úunt akupniun jearin títiatjana nusha waitnenkartutai̱ enentái̱ susata” tu seamjai.
Warí wikia úunt akupniu umutairi̱n umasa iisan súuyajai.