Neemías
Akupin Artajírjis Neemíasan Jutanam akupma
2 Kame úunt akupin Artajírjis painti uwí akupin ajas pujái̱ Nisan nantutin úunt akupniu umutairi̱n umasa iisan súakun wajamiajai. Tumai̱ úunt akupin kúntuts enentáiji̱a̱i̱ súchatai asa nekara chichartak 2 “Warí ¿urukamtai timiá kuntutscha pujam? ¿Jáatsmek? Ame kúntuts enentáimmian nékajme” turutmiai. Túrutkui ti ashamkamjai.
3 Túmayatnak úunt akupniun chicharkun “Uunt akupniú, tuke iwiaaku pujú atá. Winia apar iwiarsamu péprusha emeskar ti yajauch awajsamu tura wáitiri̱nkia ashí ekemárma áiniawai tu ujatkaru ai̱sha ¿urukamtaik wisha kúntutscha pujuschattaj?” tímiajai. 4 Tura úunt akupin anintiuk “¿Warí wakeram?” túrutkui nayaimpinmaya̱ Yusan sean 5 úunt akupniun chicharkun “Ámiji̱a̱i̱ péṉkeraitkiuiṉkia tura ame takartámin péṉker enentáimtakmeka Jutá nuṉkanam winia apar iwiarsamu péprun iwiara ikiutaj akuptukta” tímiajai.
6 Tutai úunt akupniusha nuwe̱ja̱i̱ pujusár akuptúktinian tsaṉkatruk chichartak “Wéakmesha ¿urutmá tsawantak pujusam táintiam?” túrutkui nu tsawantin tátatjai tusan tsawantan tesamiajai. 7 Nu arant úunt akupniun chicharkun “Ámiji̱a̱i̱ péṉkeraitkiuiṉkia papí áaram ataktusta. Yúpratis entsa amaini̱ uuntri̱ matsatainia nuna iniaktusartaj katiṉtaj túran Jutanam jeatin tsaṉkatrukta” timiajai. 8 Tura chíkich papikia úunt akupniu kampunniuri̱n wáinin Asap áatrutrata. Kame Yusa Je̱e̱ wenuke̱n tura pepru wenuke̱n nuyá̱ wi pujustin je̱a̱n iwiarkatniun numin tsaṉkatrukat tusan núnaka seamjai.
Nuyá̱ winia Yusur waitnentrur yaintiu asamtai wi úunt akupniun seamaj núnaka ashí surusmai. 9 Nuiṉkia Yúpratis entsa amaini̱ katiṉkin uunt pujuiniamunam jean úunt akupniu papiri̱n súsarmajai. Kame úunt akupniusha wi wéakui suntara úuntri̱n nuyá̱ kawainium ekemtan unuimiátrancha nemartiarum tusa akuptúramiayi. 10 Túrasha Urun aents Samparát nuyá̱ ni takarniúri̱ Amun aents Tuwías nuna antukar yaaksha taar Israer shuarnan péṉkeran túrawara̱i̱n tusar peṉké nakitiáiniak kajearmiayi.
Wénuk sa̱a̱kmian Neemías iisma
11 Nuyá̱ Jerusaréṉnum jeamiajai. Túran nui̱ menaintiú tsawant iniaṉkasan 12 kashi nantakmiajai tura aents ishichik nemartukarmai. Jerusaréṉnum túratniun winia Yusur winia enentái̱rui̱ túrattaj núnaka peṉké ujakcharmajai. Kawái ekemkatniun wikia jukimjiai.
13 2:13-16 Jerusaréṉnum uunt pepru wenuke̱ sa̱a̱nakniuya̱ nuna téntaka ashí iisjai. Túrasha túratniun wakerimiaj núnaka uuntri̱ ainia núnaka ujakcharmajai.
17 Nuyá̱ iruran chicharainiakun “Jerusaréṉ péprusha ti yajauch awajsar wáitiri̱sha jiji̱a̱i̱ áeskamu wáintrume. Tuma asamtai winitiárum Jerusaréṉka wenuke̱sha iwiarkatai yajauchia nuke wishiktai̱ pujuara̱i̱j” timiajai.
18 Tura Yus winia péṉker túratniun yaintkiamia nuna núnisaṉ úunt akupin turutmia nu chichamnasha ujakármajai. Tura nuamtaik chichainiak “Ju̱ takat péṉkeraiti. Wárik takakmasartai” tunaiyarmai. 19 Tura Urun aents Samparát nuyá̱ ni takarniúri̱ Amun aents Tuwías aents núnisaṉ Arapianmaya̱ aents Jesem antukar iin nakitramainia ásar wishikramainiak “Jú̱tikiarum ju̱sha ¿warimpiait? Átumka úunt akupin ¿umirkashtaj tusarmechuk jú̱tikiarum?” turamarmaji. 20 Tu turamainiakrin wi chicharkun “Warí iikia nayaimpiniam pujana nú Yusa takarniúri̱ntji. Tuma asar iwiaratai tusar pujurji. Átumka ii takakmainiajnia ju̱ka íischatniuitrume núnisaṉ peṉké nérenchaitrume. Nu arant Jerusaréṉsha peṉké atumniachuiti” tiármajai.