Neemías
Jerusaréṉnum matsatainia nu
11 Pepru kapitiántri̱nkia Jerusaréṉnum matsamsarmiayi. Tura chikichniaka nekapsar iisar tiásnumia̱n chikichik awakmakunka Yusna akantúkma pepru Jerusaréṉnum apujsarmiayi. Tura nuiwi juákarua nuka chíkich péprunam matsamsarmiayi. 2 Tura ashí áishmaṉ Jerusaréṉnum ní wakerus pujustaj tusa wakeruiniantka ti shiir enentáimtusarmiayi. 3 Tura Jerusaréṉnum nuṉka yáirach tesamunam uuntri̱ ní wakerus pujusármiayi. Antsu Jutá pepru armia nui̱ṉkia Israer shuar, Yúsnan pujurin, Riwí shuarsha, Yusa Je̱e̱n takarniusha tura Saramúṉka takarniúri̱ wea aṉkant aṉkant ni pujutái̱ri̱ni̱ṉ pujusármiayi. 4 Antsu Jerusaréṉnumka Jutá tura Piṉjiamín weaka wárumchik pujusármiayi.
Ju̱i̱ti Jutá weaka: Ataíaska Usíasa uchirí̱, ju̱ka Sakaríaska uchirí̱, ju̱ka Amaríasa uchirí̱, ju̱ka Sejatíasa uchirí̱, ju̱ka Mararíra uchirí̱, Páres weanmaya̱, 5 tura Masías Paruka uchirí̱, ju̱ka Kurjusé uchirí̱, ju̱ka Jasaíasa uchirí̱, ju̱ka Atayása uchirí̱, ju̱ka Juyarípa uchirí̱, ju̱ka Sakaríasa uchirí̱, ninkia Siruní uchirí̱yayi. 6 Páres wea Jerusaréṉnum ashí matsamsarmia nuka 468 áishmaṉ kakaram ármiayi.
7 Piṉjiamín weaka ju̱ áiniawai: Sarúka Misuráma uchirí̱, ju̱ka Juitia uchirí̱, ju̱ka Pitiayása uchirí̱, ju̱ka Kuriasa uchirí̱, ju̱ka Masíasa uchirí̱, ju̱ka Itiara uchirí̱ ninkia Jesayása uchirí̱yayi. 8 Tura Sarú úkuri̱nkia Kapaiji̱a̱i̱ Saray ashikia 928 armai. 9 Nu irutkamunam takatan chichampriṉkia Sikri uchirí̱ Juir tura nuna pátatkari̱ Senuá uchirí̱ Jutauyayi.
10 Yúsnan pujurniunka ju̱ áiniawai: Jetayás Juyarípia uchirí̱ tura Jakin, 11 Serayáska Irkías uchirí̱, ju̱ka Misurám uchirí̱, ju̱ka Satuk uchirí̱, ju̱ka Miriuta uchirí̱, niṉkia Ajitiúpa uchirí̱ Yusa Je̱e̱n peṉkeri̱ya̱yi ámiayi, 12 tura ni shuar Yusa Je̱e̱n takakmarmia nuka 822 armai. Tura Atayás Jirujáma uchirí̱, ju̱ka Piraríasa uchirí̱, ju̱ka Amsi uchirí̱, ju̱ka Sakaríasa uchirí̱, ju̱ka Páshura uchirí̱, ju̱ka Markíasa uchirí̱ṉkia 13 aṉkant aṉkant ni shuari̱ uuntri̱ armia nuka 242 armai. Tura Amasai Asaríra uchirí̱, ju̱ka Asai uchirí̱, ju̱ka Mesirimuta uchirí̱, ju̱ka Imira uchirí̱, 14 tura ni shuar kakarmak kakarmak armia nuka 128 armai, nuna akupénaka Jituríma uchirí̱ Saptierauyayi.
15 Riwí weaka ju̱ áiniawai: Semayás Asupa uchirí̱, ju̱ka Asrikiama uchirí̱, ju̱ka Asapíasa uchirí̱, ju̱ka Puni uchirí̱. 16 Riwí shuarai̱ya̱ peṉkeri̱ Yusa Je̱e̱n á̱a̱ri̱n takamtikniuka Sapetai tura Jusapát ármiayi.
17 Tura Matanías Mikía uchirí̱, ju̱ka uchirí̱ Sapti, ju̱ka Asapa uchirí̱ níyayi peṉkeri̱ kantamár yumiṉsar Yus seatniunka ni jintinniuyayi tura ni shuarnum patatkari̱ṉkia Pakpukíasauyayi nuyá̱ Apta Samúa uchirí̱, ju̱ka Karara uchirí̱, ninkia Jetutúna uchirí̱. 18 Ashí Riwí weaka Yus akantúkma péprunmaṉka 284 juakarmai.
19 Wá̱i̱ti̱a̱i̱n wáinniuka ju̱ armai: Akup, Tarmun tura ni yachi̱ wá̱i̱ti̱a̱i̱n iin armia nuka 172 armai.
20 Tura Israer shuar chíkichkia núnisaṉ Yúsnan pujurniusha ántsaṉ Riwí shuarsha Jutanam ashí pepru irunmanum aṉkant aṉkant ni nuṉka sunasmanumaṉ pujusármiayi. 21 Yusa Je̱e̱n takarin Upernum pujuarmia nuka Yúsnan takarin Seja tura Jishpa akupma pujuarmiayi. 22 Jerusaréṉnum Riwí wea úuntri̱nkia Úsiyayi, ju̱ka Pani uchirí̱, ju̱ka Asapíasa uchirí̱, Mataníasa uchirí̱, ju̱ka Mikía uchirí̱, niṉkia Asapa uchirí̱ armia nuna uchirí̱yayi, Yusa Je̱e̱n takakmamun kantamprin ármiayi. 23 Warí, ni itiurkartiniait nuka úunt akupin akupkámu ámiayi. Nu akupkámuka kantamin armia nu tuke tsawant warí túrawartiniait nu akupkámuyayi.
24 Antsu Pitiajíaska Misesapira uchirí̱, Jutá uchirí̱ Tserá shuarnumia̱nka úunt akupniu náari̱ji̱a̱i̱ aentsu ashí itiurchatri̱ iwiaratin anaikiamuyayi.
Jutanam chíkich írutkamu
25 Kame uchich pépruch irunmia nuka núṉke̱ntuk tura Jutá shuar chíkichkia Kiriat Árpanam tura nui̱ uchich pépruch írunmanum matsamkarmiayi, núnisaṉ Tipiunnum tura nui̱ uchich pépruch írunmanum, Jekapsiirnum tura nui̱ uchich pépruch írunmanum, 26 nuyá̱ Jesúanam, Muratanam, Pitpirétnum, 27 ántsaṉ Jasar-suárnum, Pirshiwianam tura nui̱ uchich pépruch írunmanum, 28 áitkiasaṉ Sekraknum, Mikunanam tura nui̱ uchich pépruch írunmanum, 29 tura Intrimúnnum, Súranam, Jarmutnum, 30 Sanuanam, Aturamnum tura nui̱ uchich pépruch írunmanum, Rákisnumka núṉke̱ntuk, Asekanam tura nui̱ uchich pépruch írunmanum matsamkarmiayi. Kame Pirshiwianam juarki̱ Jinium paka tímianai matsamkarmiayi.
31 Tura Piṉjiamínkia shuarka Képanam juarki̱, Míkmasnumsha, Aíanmasha, Pitirnumsha tura tura nui̱ uchich pépruch írunmanum, 32 núnisaṉ Anatútnumsha, Núpnumsha, Ananíasnumsha, 33 Ásurnumsha, Ramanmasha, Jitiaimnumsha, 34 Jatitnumsha, Sepuimnumsha, Neparátnumsha, 35 Ruutnumsha, Únunmasha, warinkish najanin matsamtai̱ paka tímianaisha matsamkarmiayi. 36 Riwí shuar chíkichkia Jutá tura Piṉjiamín wea nuṉke̱n pujusármiayi.