Neemías
Yúsnan pujurin tura Riwí shuar waketraru
12 Yúsnan pujurin tura Riwí shuar Saratiára uchirí̱ Surupapírja̱i̱ tura Jesúaja̱i̱ waketraruka ju̱ áiniawai: Serayás, Jirimías, Ístras, 2 Amarías, Maruk, Jatus, 3 Sekanías, Rejum, Mirimiút, 4 Itiu, Jinetu, Awías, 5 Mijiamín, Matíaj, Pirka, 6 Semayás, Juyaríp, Jetayás, 7 Sarú, Amuk, Irkías tura Jetayás. Ju̱ka Jesúa pujumia nui̱ Yúsnan pujurniu peṉkeri̱ ni shuarja̱i̱ ármiayi.
8 Tura Riwí shuar Jesúa, Piniuí, Katmiar, Serepías, Jutá tura Mataníaska Yusa náari̱n shiir awajuk kantamtukniuyayi ni shuarja̱i̱ métek. 9 Pakpukíassha Uniji̱a̱i̱ nu shuarak ármiayi tura niin eem wajasar aṉkant aṉkant ni takatrí̱n pujuarmiayi.
10 Jesúaka, Juyakímian yajutmarmiayi tura Juyakímka Iriasípian yajutmarmiayi tura Iriasípkia Juyatan yajutmarmiayi, 11 Juyataka Junatánan yajutmarmiayi tura Junatánka, Jatúan yajutmarmiayi.
12 Tura Juyakím pujumia nu tsawantinkia Yúsnan pujurin ni shuari̱ úuntri̱nkia ju̱ ármiayi: Serayásia̱ṉka, Meraíasauyi; Jirimíasia̱ṉka, Ananíasauyi; 13 Ístrasiya̱ṉka, Misurámauyi; Amaríasia̱ṉka, Jujanánauyi; 14 Marekúnia̱ṉka, Junatánauyi; Sepaníasia̱ṉka, Juseyayi; 15 Arimia̱ṉka, Atnauyi; Meriutia̱ṉka, Jirkaiyi; 16 Itiuya̱ṉka, Sakaríasauyi; Jinitiúnia̱ṉka, Misurámauyi; 17 Awíasaiya̱ṉka Síkriyi; Miniamín; Muatíasaiya̱ṉka, Pirtaiyi; 18 Pirkaya̱ṉka, Samúayi; Semayásia̱ṉka, Junatánauyi; 19 Juyarípia̱ṉka, Matenaiyi; Jetayásia̱ṉka, Úsiyi; 20 Saraya̱ṉka, Karayi; Amukia̱ṉka, Iwirauyi; 21 Irkíasia̱ṉka, Asapíasauyi; Jetayásia̱ṉka, Natanaérauyi.
22 Iriasíp, Juyata, Jujanán tura Jatúa pujuarmia nu tsawantin Riwí shuarka ni shuara uuntri̱ armia nuja̱i̱ métek áararmiayi. Núnisaṉ Yúsnan pujurniusha Pírsianmaya̱ Taríu úunt akupin ajas pujumam pémakarmiayi.
23 Riwí wea, ni shuari̱ uuntri̱ armia nuka, Iriasípia uchirí̱ Jujanán pujumia tímianai yaunchu túrunamu aatai̱ papinium aarma ámiayi.
24 Riwí wea peṉkeri̱nkia ju̱i̱ti: Asapías, Serepías, Katmiara uchirí̱ Jesúa tura ni shuar armia nuka naka wajas Yusan shiir enentáimtak tura Yusan yumiṉkias, Yusan enentáimtin áishmaṉ Tawit túratniun akupkámia nuja̱i̱ métek túrin armia nu ármiayi.
25 Antsu Matanías, Pakpukías, Aptías, Misurám, Tarmun tura Akup wá̱i̱ti̱a̱i̱ri̱n péṉker íistin apujsamu ármiayi. 26 Tura nui̱ takarmia nusha Jusatáka uchirí̱ Jesúa tura nuna uchirí̱ Juyakím pujumia nú tsawantauyi. Núnisaṉ nu tsawantin Ístraska Yúsnan pujurniuyayi tura papí aakmau nuyá̱ Neemías nui̱ uuntri̱ pujuarmiayi.
Jerusaréṉka tanishri̱ amukar námper nájatma
27 Jerusaréṉka wenuke̱ amukman námper najanatai tusar Riwí shuar ashí nuṉkanmaya̱n tui̱ matsamin armia ímianian e̱a̱karmiayi. Túrawar kantaja̱i̱ ke̱e̱rja̱i̱ kitiarja̱i̱ shakapja̱i̱ námper shiir awajsar iniaṉkastai tusar Jerusaréṉnum yaruakarmiayi. 28 12:28-29 Jerusaréṉka yantamén kantamin armia nu ni pépruri̱n najankaru ásarmatai ni uchirí̱sha Netup tura Pitjirkár nuyá̱ Kepa tura Asmawít nuṉkanmaya̱sha Jerusaréṉnum káunkarmiayi.
30 Yúsnan pujurniusha tura Riwí shuarsha imiatkincha ajasár nuya̱ṉka aentsnasha wáitincha tura wenukencha imiatkincha awajsarmiayi. 31 Nuya̱ṉka Jutanmaya̱ peṉkeri̱ armia nuna pepru wenuke̱n iwiakármajai. Túran untsurí kantamniun jimiará nakakma kantamámuja̱i̱ yumiṉsajme tusar apujsarmajai. Emka kantamin arma nuka wenuknum nuṉkaani̱ Umpuru Iruntai̱ wáitinmaani̱ wéarmai. 32 Nuna úkuri̱nkia Usayás tura Jutanmaya̱ peṉkeri̱ armia nu jímiapetek nakaak wéarmiayi. 33 Nuyá̱ Asarías Ístras Misurám 34 Jutá Piṉjiamín Semayás tura Jirimías wéarmiayi. 35 Kame Yúsnan pujurin kachun juarmia nuna uchirí̱ wárumchik Asapa uchirí̱ Sakur nuna uchirí̱ Mikiayás nuna uchirí̱ Matanías nuna uchirí̱ Semayás uchirí̱ Junatánka uchirí̱ Sakarías 36 tura ni a̱i̱ Semayás, Asarír, Mirarái, Kiraráij, Maai, Natanáir, Jutá nuyá̱ Ananiji̱a̱i̱ Yusna áishmaṉ Tawitian tuntuitiairi̱n yaruaki̱ wéarmiayi. Tura papí ain Ístraska ni wénamuna eem wémiayi. 37 Kame Tawitia Pépruri̱ watai̱nmaani̱ wenuknumaani̱ naint ana nuní̱ Yumirmat Wáitiniam nákak wákarmiayi. Tura Tawitia je̱e̱nkia naṉkaikiar etsa̱ tatainmaani̱ Entsa Wáitiya̱ tímianai jearmiayi.
38 Tura chíkich iruntramuka yumiṉsajme tusar kantamáiniaka arakaani̱ wéarmiayi. Nuna úkuri̱n wikia aents jímiapetek nakaakarun yaruakin wenuknumaṉ wéakun Iniartai̱ Kumpinia nuyá̱ juárkin waṉkaram wenuka tímianai jeamji. 39 Tura Eprain wáiti̱ya̱ nuní̱ naṉkaamakir Yaunchu waiti nuyá̱ Namak waiti núnisaṉ Ananéran tura Jamata Kumpintri̱ ántsaṉ Murik wáiti̱ya̱ tímianai jear Jintiá Iin wáitiya nui̱ wajasármai.
40 Nuyá̱ kantamin mái̱ iruntraruka Yusa Je̱e̱n setuawarmai tura wisha núnisnak uuntri̱ arma nu jímiapetek nakaakaruja̱i̱ nui̱ setuawarmaji. 41 Tura Yúsnan pujurin Iriakím, Masías, Miniamín, Mikiayás, Eriunái, Sakarías nuyá̱ Ananíassha kachun takaku pujuarmai. 42 Núnisaṉ Masías, Semayás, Iriasár, Usi, Jujanán, Markías, Iram nuyá̱ Esersha kantamin asar Israjías jintíakui nisha kantan kantamáwarmai.
43 Nu tsawantai̱kia untsurí taṉkun áestuawarmiayi túrawar warastin Yus súsarma ásar ti warasarmiayi. Núnisaṉ nuwa̱sha uchisha warasarmiayi tura Jerusaréṉnum waramuka jeachat antuimiayi.
44 Nu tsawantinkia kuit ikiutai̱niam takakmastinian aentsun apujsarmiayi. Kame nu aentska kuit Yus súamun tura emka nereku súamun nuyá̱ tiásnumia̱ chikichik súamun núnisaṉ aents ikianainiamu tura péprunmaya̱ncha achikiar irumprar akupkámu tana nuja̱i̱ métek Yúsnan pujurniun tura Riwí shuarnasha anaikiamu ármiayi. Warí Yúsnan pujurin tura Riwí shuaran takatan takakmarmia nuja̱i̱ Jutanmaya̱ shuara warastintri̱ṉkia tí uuntauyayi.
45 Núnis Ni Yusri̱ akupkámuri̱nkia tura imiatkincha ajastin tusar akupkámuncha umikiarmiayi. Núnisaṉ kantamniusha tura waiti wainniusha Tawit tura ni uchirí̱ Saramúṉ akupkámia nuja̱i̱ métek túrawarmiayi. 46 Warí Tawit tura Asap pujuarmia tímianaisha tura núna yaunchusha Yus shiir awajkur kantampruátniun tura yumiṉsajme tusar Yus kantampruátniun kantamniu úuntri̱sha iruniarmiayi. 47 Kame Surupapír tura Neemías pujumia tímianian kantamin tura waiti wáinin armia nunasha ni súsatniua núnaka Israer shuarka tuke suu ármiayi. Núnisaraṉ Riwí shuar súsatniuncha niṉki akantu wéarmiayi ántsaṉ Riwí shuarsha Arauna uchirí̱ súsartinniasha nisha akantu wéarmiayi.