Neemías

Neemías ataksha íwiarma

13 Nu tsawantin aents ántuiniamunam Muisaisa papiri̱ áujnasmiayi. Tura nuna aujú pujusár Amun aentska tura Muap aentssha Yusna iruntrarmanumka peṉké waya̱chartiniaiti tu áarman wáinkiarmiayi. 2 Warí yaunchu paṉja̱i̱ entsan júkiar Israera uchirí̱n iṉkiuṉtai tusar jíintsuk Paraaman yumiṉkrutrai tusa kuítian akikiármiayi. Tura ii Yusri̱ yajauchiji̱a̱i̱ yumiṉtsuk antsu péṉkernum yumiṉkramiayi. 3 Tura akupkámu áujman antukar yajaya̱ aentsja̱i̱ Israer shuarja̱i̱ pachiniair matsamin armia nuya̱ṉka kanakármiayi.

4 Nú papikia wáinniatsa̱i̱ṉ Yúsnan pujurin Iriasíp ii Yusri̱ Je̱e̱n wariṉkish ikiutai̱n wáinkiat tusa anaikiamuya nu Tuwíasan ni shuari̱ awajsámiayi. 5 Tura awajsámtai Yusa Je̱e̱n uunt tesamunam Tuwías pujustinian iwiarturmiayi. Nu tesamunam nuik wariṉkish ikiusma irunmia nuka ju̱ ármiayi. Israer shuar súsarma árak nuyá̱ kuṉkuin núnisaṉ Yusa Je̱e̱n takakmatai̱ ántsaṉ Riwí shuar nuyá̱ kantamin tura wáitin wáinin súsartinian tiásnumia̱ akanák chikichkiniak Israer shuar ikiankarman araka nere̱n tura yamaram wíniuncha núnisaṉ asuitincha nuyá̱ Yúsnan pujurin ainia nu ántar súsatniuncha nú ikiutai̱niam ikiusma ármiayi.

6 Nu túrunamia nuiṉkia wikia Jerusaréṉnumka pujuchmajai. Tura Artajírjis úunt akupin ajasmaka traintitús uwí ai̱ úunt akupin pujamunam wémajai. Nuyá̱ ukunam akupniun aṉkant surusta títiaj tusan werimjiai. 7 Jerusaréṉnum waketki̱ tana Iriasíp yajauch túramun nekaajai. Yusa Je̱e̱n Tuwíasa je̱e̱n pujutái̱ri̱n najatauyi. 8 Nuna peṉké nakitrámjai túran Tuwíasa je̱e̱ya̱n ashí niniu arma nunasha a̱a̱ utsantkamjai. 9 Nuya̱ṉka pujutai̱ japimkiatarum tusan akupkámjai túran ataksha Yusa Je̱e̱n takakmatai armia nuna tura Yus ántar susamuncha núnisaṉ kuṉkuinniasha nui̱ṉ awakearan ikiusármajai.

10 Jú̱nisnak wainkiamjai. Riwí shuar ántar súsartin armia nunasha súsachman nekaamjai. Kame Riwí shuarsha tura kantamniusha takakmau áiniayataṉ niniu ana nuna súsachma ásar aṉkant aṉkant ni nuṉke̱ni̱ṉ pisaráru armai. 11 Nuya̱ṉka nui̱ anairamu matsamárma nuna chicharkun “¿Urukamtai Yusa je̱e̱sha ajapamu pujá?” tímiajai. Tura iruran ni takatrí̱n awakearmajai. 12 Tura ashí Jutá shuar tiásnumia̱ chikichkiniak araka nere̱ncha wíniuncha tura asuitincha ikiankarmai. 13 Nuiṉkia nuna wainkiat tusan úuntri̱n anaitiukmajna nuka ju̱ armai. Yúsnan pujurniu Seremíasan tura papí aakmau Satukan nuyá̱ Riwí shuar Pitiayásan anaikiamjai. Núnisaṉ ni takasártinian Mataníasa uchirí̱ Sakur nuyá̱ uchirí̱ Ananan ashí péṉker enentáimkia ásar ni yachi̱n nakar súsartin armai. 14 Winia Yusru ju̱na túraitjiana ju̱ja̱i̱ winia enentáimtursata. Nuya̱sha winia Yusru Je̱e̱ncha ni takatrí̱n péṉker tura ímiatrusnak túran umikmajna nu japiraip.

15 Nu tsawantai̱sha Jutanam Sáwar tsawantin uwa yumiri̱n jusatai tusa nájarmai. Tura trikiu tsupir jiṉkiá kawain áentskar juíniak tura wíniuncha úwancha íkiuncha kawain áentsak Sáwar tsawantai̱ Jerusaréṉnum juínian wainkiajai. Tura ¿urukamtai Sáwar tsawantcha átum takakmaasha ikiankarum súrarum? tusan chicharkamjai. 16 Núnisaṉ Tírunmaya̱ aents nui̱ matsamin armia nu namakan ikianiarmiayi. Tura surutai ainia nuna Jutanam matsamin armia nu Jerusaréṉnum Sáwartin súriarmiayi. 17 Núnisnak Jutanmaya̱ shuar páantin armia nuna chicharainiakun “Ju̱sha ¿urukamtai atumsha ayamtai̱ tsawantcha yajauch awajrum? 18 ¿Atumí uuntri̱ jú̱tiksaraṉ túracharmaka? Túramtai ¿ii Yusri̱ atumín yajauchin wáitsatniun tura jú̱ peprunam akuptúrmakchamkia? Tura átum Sáwar tsawant mui̱jmiai̱ awajrume túrakrum Israer shuartirmeka Yus ákajearme” tiármajai.

19 Kí̱akui̱ ayamtai̱ tsawant jeatsa̱i̱ṉ Jerusaréṉ waiti epenmia atí tura ayamtai̱ tsawant naṉkaamasmatai uraimiu atí tusan akupkámjai. Tura winia takartin ainia nuya̱n ayamtai̱ tsawantai̱ kijin awayá̱tniun iniaisarat tusan chikichkiniak anaikian wáitiniam apujsamjai. 20 Kame súrin tura warí wariṉkish suma armia nuka Jerusaréṉka á̱a̱ri̱n matsamkar chikichkiksha núja̱i̱ṉchuka jimiaráksha káunkar káshisha nui̱ṉ matsam wéarmiayi. 21 Túmainiakui kakantáiniakun “Káshisha ¿urukamtai wenuknum a̱a̱ni̱ eemsha matsatrum? Atak ániakrumni̱ṉkia achikián eṉkeattajrume” tiarmajai. Nu tutai atakka peṉké kaunkacharmai ayampratin tsawantinkia.

22 Tura Riwí shuaran mátrachu ajastarum tímiajai túrunarum waiti wáinkiatarum. Ayamtai̱ tsawant akantúkma atí. Winia Yusru núnismek winiasha ju̱ja̱i̱ enentáimturata tura Ame waitnenkartutairam ti uunta nuja̱i̱ tsaṉkurturta.

23 Nu tsawantin Israer shuar Astutnumia̱ nuwa̱n Muápnumia̱ncha tura Amunnumia̱ncha nuatrarmiayi. 24 Tura uchirí̱ armia nuka ajapén Astut chichaman chicharmiayi. Tura Israer shuara chichame̱n chichastinian nékachu ásar antsu aṉkant aṉkant ní chichame̱nak chichasarmiayi. 25 Tura chicharkan yajauchí yumiṉkrarmajai. Túran chikichnaka asutrarmajai túran intiashín japirkin uwerarmajai. Túran Yus íimmianum etsermamtikiainiam chichainiak “Ii uchirí̱sha nawantri̱sha Israer shuarchaja̱i̱ nuatmamtikiachartatji” tumamtikiarmajai. 26 ¿Kame Israernumia̱ úunt akupin Saramúṉsha jú̱ja̱i̱nchuk tunaan túrama? Uunt nuṉka mátsatkamu untsurí ainia nui̱sha úunt akupin niya núnin ni Yusri̱ anetai̱ṉkia peṉké atsumiayi. Warí Yúskechuk ashí Israernum úunt akupin awajsama. Núnaka ashí túramu áunak yajaya̱ nuwa̱ tunaanka túrumtikiawarmiayi. 27 ¿Tura iisha nú antukarar núnisrik ii Yusri̱ṉkia umirtsukek ashí timiá yajauch ainia nú túruiniakur yajaya̱ nuwa̱ nuatkartatajⁱ?

28 Kame Yúsnan pujurniu uuntri̱ Iriasípia uchirí̱ Juyata nuna uchirí̱ chikichik Urun aents Samparáta áwe̱yayi tuma asamtai wini̱ya̱ṉka árantak awajsámjai. 29 Maa winia Yusru nú aents enentáimturarta. Warí, Yúsnan pujurniuncha tura Yúsnan pujurniuja̱i̱ nuyá̱ Riwí shuarja̱i̱sha chícham najanamiamna nunasha mui̱jmiai̱ awajkaruiti.

30 Kame Yúsnan pujurin ainia nunasha tura Riwí shuarnasha yajaya̱ aentsu túrutairi̱ya̱ṉka imiatkincha awajsarmiajai. Tura aṉkant aṉkant ni takatri̱ túrawarat tusan apujsarmiajai. 31 Tura Yus susamu áesatin jiniasha tsawant tesamua nui̱ ikiaatiarti tusan iwiarturarmajai. Tura araka neré̱ peṉkeri̱ ainia nunasha tuke súsartinian iwiaramjai. ¡Maa, winia Yusru, winia péṉker enentáimtursata!