Neemías
Nemasri̱ itit awajainiamaitiat takakmasarma
4 Tura Jerusaréṉ pepru wenuke̱ ataksha íwiareamun Samparát antuk tí kajek suíran ka̱e̱ kaje̱e̱nak Jutá shuaran wishikrarmiayi. 2 Nuya̱ṉka Samarianmaya̱ aents ainia nusha tura Samarianmaya̱ suntarsha ántuiniamunam Samparát chichaak “Kakarmachu Jutá shuar, ¿warí jú̱tikiainia? ¿Ataksha Yusai̱ áestuatniun súsawartata? ¿Chikichik tsawantinkitsuk ashí mash amukártata? ¿Tímiau kaya esakútsuk najankartatuak?” timiai. 3 Tura Amun aents Tuwías nui̱ wajá chichaak “Átum kayá wénuk najantrumna jú̱naka ti ku̱janchmaketiat yakí̱ warukka sá̱a̱kminian jú̱tikianiawai” timiai.
4 Neemías chichaak “Maa, ii Úunt Yusri̱yá, anturkartukta. Warí ii nemasri̱ ainia nu peṉké nakitramainiaji. Tuma asamtai ni chichame̱ja̱i̱ṉ itiurchat najanawaru ásarmatai nú itiurchatka níini̱n iniarti núnisaṉ yajá nuṉkanam achirar yaruakma ártí. 5 Warí takakmainiajnia jú̱tin itit awajtámainiaji. Tuma asamtai ni yajauchiri̱sha tura ni tunaarí̱sha tsaṉkuraraip” Neemías tu Yusan seamiayi.
6 Tura aents shiir enentáiji̱a̱i̱ iruntrar kakaram takakmainia ásar pepru wenuke̱ncha kayá ekentrar yakiri̱ náṉkatkamunam ejetniun ajapén awajsarmaji. 7 Tura Jerusaréṉka wenuke̱ takasar amustatuk awajsarin Samparát, Tuwías, Arapianmaya̱, Amunnumia̱ nuyá̱ Astutnumia̱ aentscha nekaawar ti kajearmiayi. 8 Tura Jerusaréṉja̱i̱ mániar emestuktai tusar iruntrar chichaman jurusármai. 9 Tuma asamtai ii Yusri̱ seamji. Túrar ii nemasri̱ winian wáinkiarat tusar jintiá iin tsawai̱sha káshisha awajsarmaji. 10 Tura Jutanmaya̱ chichainiak
“Takakmainia nusha pimpikiárai
tura emeskarma ainia nusha ti núkapete.
Tuma asamtai iik takasar wénuitniuka jeatsji”
tiármiayi. 11 Tura ii nemasri̱ nuamtak chichainiak “Ni matsatmanum pachiniar nekamainiachuk máwartai. Túram takatan nui̱ṉ iniaṉnakarat tiarmai” tímiayi.
12 Israer shuar ni matsatáiniamunam ayatka matsamin armia nu iin ujá ujatmainiakua tias ejewar chichartamainiak “Atumín kajertamainia nuka átum tui̱ waketra pujustatrum tímianaisha jatetmaktatrume” tiármiayi. 13 Nuiṉkia tanish á̱a̱wini̱ wénuk ti nuṉkach ayamprumakchamnia armia nui̱ṉkia aentsun ni shuari̱ji̱a̱i̱ aṉkant aṉkant puya̱ncha naṉkincha tura tíshimkiuncha atakraran awajrarmajai. 14 Iisan wajaki̱n úuntri̱ncha tura akupniúncha núnisaṉ ashí aentsun chicharainiakun “Ii nemasri̱ iimiainiamunam sapijmiakairap. Warí Uunt Yus tí uunt ashamainia nusha enentáimtustarum. Atumí yachi̱ tura atumí uchirí̱ ántsaṉ atumí nawantri̱sha nuwe̱sha tura ashí atumí je̱e̱ ayamprúktarum” tiármajai.*