Neemías
Pataká akikmaktinian Neemías surimkiámu
5 Nuya̱ṉka ashí aents nuartiuk itit nekapáiniak ni shuar Israer shuaran kajerainiak charaatun ajarmiayi. 2 Kame chíkichkia chichainiak “Iikia ii uchirí̱ji̱a̱i̱ tura ii nawantri̱ji̱a̱i̱ untsurítji. Tuma asar iwiaaku pujustai tusar trikiu awaṉtukmijiam tusari seamniuitji.” 3 Tuíniakui chíkichkia chichainiak “Tsuka asamtai yurumak súmakur ii nuṉke̱sha ii uwa ajarí̱sha tura ii je̱e̱sha amastáji tíniuitji” tímiayi. 4 Tura chíkichkia chichainiak “Ii nuṉke̱ tura ii ajarí̱sha amastai tiri kuit ikiamsar úunt akupin akiktinia nú súsaruitji. 5 Túrasha nekaatarum, ii yachi̱ ii shuar áiniawai tura ni uchirí̱sha ii uchirí̱ya núnisar áiniawai. Tuma aak yamaikia ii uchirí̱sha tura ii nawantri̱sha iniatai̱ árat tusar súruiniaji. Kame ii nawantri̱ṉkia untsurí iniatai̱ ajasáruiti túrasha yamaikia akikmatkar aṉkant awajsatniusha peṉké jeainiatsji. Warí ii nuṉke̱sha tura ii uwa ajarí̱sha chikicha uwejé̱n yamaikia pujuiniawai” tiármiayi.
6 Kame charaatum ajainiamun tura jú̱ chichaman antukan tí kajekmajai. 7 Núkap enentáimpran peṉkeri̱ tura uuntri̱ ainia nunasha enentáimtikrartaj tusan chicharainiakun “Átumka aṉkant aṉkant atumí yachi̱ tí nukap patakrum jurarme” tiármajai. Tíaran uunt iruntratniun najatawaran 8 chicharainiakun “Iikia, ii yachi̱ Israer shuar Yusan enentáimtichu aentsnum surukma arma nuka ii jeajnia nuja̱i̱ métek akikmatkar ii yachi̱ṉkia aṉkant awajsaruitji. Túrasha átumka iik ataksha sumakmi tusarum atumí yachi̱ṉ súrarme” tiármajai. Tútaisha tákamtak wariniak tiarat peṉké ai̱rkacharmai. 9 Tura wi chichaakun “Túrarmena nuka péṉkerchaiti. Kame ii nemasri̱ uunt nuṉka mátsatkamu ainia nuyá̱ wishiknara̱i̱j tusarmeka ¿ii Yusri̱ṉkia ashamkashtinkiaitrum? 10 Wisha núnisnak tura winia yatsursha nuyá̱ winia takarniúrsha kuítniak tura araka nere̱sha ikiasaruitji. Kame nú tumash tí nukap patakar jurukiartinkia waitneasar iniaisartai. 11 Tura waitneasrum ju̱ tsawantak ni nuṉke̱sha ni uwa ajarí̱sha uriwiuri̱sha nuyá̱ ni je̱e̱sha yamaik awaketratarum. Túrarum kuitcha tura araka nere̱ya̱ nuyá̱ wíniunam núnisrumek asuitinmasha tí nukap pataká juruktin wakerarmena nuka awaṉturtarum” tiármajai.
12 Tutai nisha aimiainiak “Awaṉtukiartatji túrarsha atakka peṉké seachartatji. Ame támena nuka tímiatrusrik túrawartatji” tiármiayi. Tuíniakui Yúsnan pujurniun untsukaran tuinia nuja̱i̱ métek túrawarat tusan Yus íimmianum nekas túrattaji taji tumamtikiarmajai. 13 Nuya̱ṉka pushirun pe̱a̱ran chichaakun “Yá aentskesha ju̱na umíachkuiṉkia ni je̱e̱ncha tura nuṉke̱ncha Yus jú̱tikias pe̱a̱tkati. Túram pe̱a̱kma núnis aya jú̱nik juaktí” timiajai. Takui̱ ashí aents nui̱ iruntraru chichainiak “Núnis túrunati” tiármiayi.
14 Jutanam uuntri̱ ajasta tusa úunt akupin Artajírjis akuptúkma nuyá̱ naṉkaman úunt akupin Artajírjiska akupin ajas painti uwí pujamunam juárkin úunt akupin Artajírjiska akupin ajasmaka traintitús uwí ejemam tuse uwí wisha tura winia yatsur arma nui̱m uunta yurumkari̱ṉkia yúacharmaji. 15 Tura wikia uuntri̱ ajatsa̱i̱ṉ emka uuntri̱ arma nuka ashí aentsun tí itiurchat awajsarmiayi. Túruiniak kuít jirun kuaraintia sikru jean tura páṉnasha núnisaṉ wíniuncha jurukiarmiayi. Núnisaraṉ ni takarniúri̱ armia nusha nin akupniua núnisaraṉ ajarmiayi. Antsu wikia Yusan ashama asan núnaka túrachmajai. 16 Núnisnak wenuke̱n takakmainiakuisha wisha pachinkiamjai. Antsu nuṉkaṉka sumakchamjai núnisaṉ ashí winia takartin armia nu nui̱ matsamárma nuímiak iruntrar takakmasarmaji. 17 Kame uunt nuṉka iiní̱ ayamach áiniana nuyá̱ iin káuniarmia núnaka nekapmatsuk aya Israer shuarak tura suntara uuntri̱ armia nuke siantu seṉkuintia winia ekentsa yurumtairui̱ wiji̱a̱i̱ yurumiarmiayi.
18 Tuke tsawant chikichik waakasha nuyá̱ sais murik juurma armia nuna núnisaṉ nanamtinniaka maa iwiartur wéarmiayi. Tuke tias tsawant naṉkaamasmatai wíniun nuapnum uwamun tí nukap itiá wéarmiayi. Nu túramun yurumu asan uunta yurumke̱ncha surustarum tusan seamchamjai. Kame ju̱ aents peṉké takurmakcha ásar uuntan akiktinian tujintiarmai. 19 Maa, winia Yusru, wi jú̱ aentsnan ashí péṉkeran túraitjiana nuja̱i̱ enentáimturata.