Neemías

Wénuk iwiara amukma

6 Kame pepru wenuke̱n wi iwiartukan amukmatai túram wenuknumsha wa̱a̱ka atsá ajasármatai túrasha wáitinkia ikiuiniatsa̱i̱ṉ ii nemasri̱ Samparát tura Tuwías nuyá̱ Arapianmaya̱ Jesem nuna nekaawar 2 Samparát Jesemja̱i̱ “Unu pakanam tú peprunmaṉsha iiji̱a̱i̱ iruntrarmi winití” turuttiai tusar chichaman akuptúrkarmai. Kame yajauch awajkatai tu enentáimias niṉkia turutiarmai. 3 Nuya̱ṉka chichaman etserniun akatrá akupeakun chicharkun “Wikia uunt takatan nájankun pujurjai. Tuma asan winichminiaitjiai tura wi atumín winittsan nú takatan ikiuakuiṉkia nu takat naṉkankattawai” tiármajai. 4 Tura nu chichamja̱i̱ṉ winia chichaman kuatru akuptúrkarmai tura wisha núnisnak ái̱kiarmajai.

5 Nuya̱ṉka Samparát ni takarniúri̱n nú chichamnak seṉku awaiṉki̱ akatar akupeak papí áarman uratak atakas akupkámai. 6 Jú̱nis áarmauyi “Uunt nuṉka mátsatka áiniasha antukaruiti tura Jasmu chichartamuk Ámeka tura Israer shuarja̱i̱ umiktin nakitiakrum kajektin enentáimprume tuma asarum pepru tanishri̱ iwiartukurme túramui. Ju̱na tawai tama chícham ántuwana núja̱i̱ṉkia ámeka akupin ajastin wakerame. 7 Túram Yúsnan etserin anaikiaitme. Kame áminiun Jerusaréṉnum étseruk ‘Jutanam úunt akupin awai’ tiarat tusam tura úunt akupniuiti tama chícham yamaikia antuntiatui. Tuma asamtai yamaikia winim iiji̱a̱i̱ chichasta” tú aarmauyi. 8 Nuiṉkia timi ikiuta tusan akupkámjai “Ame támena nuka atsawai antsu ame enentáimji̱a̱i̱ṉ enentáimsam tame.” 9 Warí niṉkia tu tutai “Nakitkiar takatan iniaṉnak iniaisarat” tu enentáimias sapijmiamtikiartaj tusar turamainiaji. Tuma asamtai maa Yusá, enentáimtikruram kakaram awajtusta.

10 Nu ukunam Mijitiapíra uchirí̱ Terayan uchirí̱ Semayásai̱ wémajai. Warí niṉkia nui̱ epentmia pujumai tura chichartak “Yusa Je̱e̱n waya̱r init iruntratai túrar wáitikia epentratai. Warí mantamataj tusar kautramkartatui. Ee nekasaiti, mantamatai tusar kashi kautramkartatui” turutmiai. 11 Nuyá̱ túrutkui wi ayakun “¿Áishmaṉ wía jú̱nin úmkaintiak? Wía jú̱ni̱nkia Uunt Yusa je̱e̱n waya̱waintiak uwemprataj tusa waya̱shtatjai” tiarjai. 12 Yus akupkachua nuna nuní̱ nekamjai antsu áyatik ukunam túrunattana nuna winia kajertak turutmiayi. Warí Tuwías Samparátja̱i̱ akikiárma ásar ashamtikiatai tusar núnaka turutiarmai. 13 Akikma ásar nuní̱ tiri ashamtikiatai tura tunáa túrumtikiatai tusar turutiarmai. Tura umimtikna nuna umimtikcharat tusa turutiarmai. 14 Maa, winia Yusru, Tuwías nuyá̱ Samparát ashí yajauchin túrawarua nu kajinmátkip. Tura nuja̱i̱ métek Yúsnan etserin nuwa̱ Nuatía náartin tura chíkich Yúsnan etserin ainia nuja̱i̱ sapijmiamtikruktai tusar wakerutainiawai.

15 Tura wenuknaka aya seṉkuintitús tsawant takasar Erur nantu paintiséṉkutin amukármai. 16 Tura ii nemasri̱sha nu takat amukman antukar Yus iin yaintmakmiaj nuna nekaawarmiayi. Túrawar nú nuṉkanam tíjiu̱ch pujuarmia nusha ti sapijmiakar jú̱naka nekas Yus yáiṉkiam jú̱tikiawarai tusar waantu enentáimtumainiamun iniaisar péejchach ajasármiayi. 17 Nu tsawantin Jutanmaya̱ shuara uuntri̱ Tuwíasan untsurí papin akuptiarmai. Núnisaṉ Tuwíassha nincha akuptiarmai. 18 Warí Tuwíaska, Ara uchirí̱ Sekaníasa áwe̱yayi. Tura Tuwíasa uchirí̱ Jujanámsha Pirikíasa uchirí̱ Misuráma nawantri̱n nuatkauyayi. Tuma asamtai Tuwíasja̱i̱ chichaman métek iruntiarma nuka Jutá nuṉkanmaṉka untsurí armai. 19 Tuma asamtai nu aents Tuwías péṉker takat túramuncha ujat wéarmai. Nuyá̱ nincha áitkiasaṉ winia chichamprun ujarmai. Tura Tuwías sapijmiamtikruktaj tusa papin akuptúrkamai.