Istir

Uunt akupin Asueru nampermamu

1 Uunt akupin Asueru pujumia nui̱ ju̱ túrunamiayi. Kame Asueruka uunt nuṉka tépaku Íntianmaya̱ juárkin Itiupía tímianai ni nuṉké̱ tesarma siantu paintisiáti armia nui̱ akupmiayi. 2 Nu tsawantinkia pepru uuntri̱ Súsanam akupkur pujutai̱niam úunt akupin Asueru 3 akupin ajas menaintiú uwí pujus tí peṉker nukap yurumtai̱ namperan najanamiayi. Ashí chichaman iwiarin unuimiákaru tura akupniu yaintri̱ armia nusha núnisaṉ Pírsianmaya̱ tura Mítianmaya̱ncha suntara uuntri̱ tura aentsu peṉkeri̱ armia nusha núnisaṉ nuṉka tesarmánum uuntri̱ anaikiamu armia nusha úunt akupniui̱ ashí pujuarmiayi. 4 Kame ni akupeamuri̱n ni kuítri̱ji̱a̱i̱ tí naakmauyania tura urutmá kuitji̱a̱i̱ timiá uunt kakaram ajasuit nunasha siantu uchaintia tsawant iniaktusar pujursarmiayi. 5 Nu naṉkaamasmatai tí peṉker yurumtai̱ namperan akupniu je̱e̱n kuku̱j ajarí̱n úunt akupin siati tsawant najanamiayi. Kame pepru uuntri̱ Súsanam pujuarmia nuka nú aentska naṉkamantu tura péejchach armia nusha ashí ipiaamu ármiayi.

6 Kame nuiṉkia mármur ukuamunam kuít jiruja̱i̱ tenté najankar nenarmanum kapa̱a̱kuja̱i̱ riniu pachimprar yáraṉ najankamuja̱i̱ jiṉkiar riniu tarach puju tura samek núnisaṉ kiṉkia nenarma armai. Tura nuṉkanka tí shiirmach kaya únise núnisaṉ jasentu ántsaṉ arapástru tura mármur pújuja̱i̱ mukusa piniumár tí peṉker iwiarkar aepramunam tepesá ayamtai̱ kuriji̱a̱i̱ tura kuít jiruja̱i̱ najankamu pujuarmai. 7 Uunt akupin tsaṉkamkamia nuja̱i̱ métek úunt akupin umutai̱ wíniun kurí piniṉnum ukatiar jukí̱ jukí̱ aentsun suármiayi. Kame piniṉsha aṉkant aṉkant niisháa niisháa najankamu ármiayi. 8 Kame umartinkia aṉkant ámiayi. Tuma asamtai útsukchamuja̱i̱ umartin ármiayi. Warí úunt akupin ni takarniúri̱ úuntri̱n chicharainiak “Umartinkia yaaksha útsukairap antsu aṉkant aṉkant ni jeana nuja̱i̱ métek umararti” tímiayi. 9 Núnisaṉ úunt akupniu nua̱rí̱ Pástisha úunt akupniu Asueru je̱e̱n tí peṉker yurumtai̱ namperan nuwa̱n najatamiayi.

Úunt akupniu nuwe̱ Pasti ajapnamu

10 Kame nampermak pujus siati tsawant jeamtai úunt akupin wíniun umar nampek wará warat ajas ni takarniúri̱ nuatcha siati armia nuna Mejuman tura Wistan nuyá̱ Arpunan, Piktan, Apaktan, Setaran tura Kárkasan chicharainiak 11 “Uunt akupniu nua̱rí̱ Pasti etseṉkrutai̱ri̱ etseṉkrumtikiarum ashí péprunmaya̱ aents tura uuntri̱ matsatainia ju̱i̱ itiatárum” ni shíirmari̱n iniakmamsat tusa akuprámiayi. Warí niṉkia shíirmach íirkauyayi. 12 Túrasha úunt akupin nuatcha áishmaṉja̱i̱ chícham akuptúkmaitiat akupniu nua̱rí̱ Pástikia umiktinian nakitmiayi. Túramtai úunt akupin ti kajek suíran ka̱e̱ kaje̱ntkamiayi. 13 Túruna núnisaṉ tuke túrutai̱ asamtai akupkámu umiktin chichaman tura umikchamtaisha warí túratniua tsaṉkatkamuit tusa unuimiákaru armia nuna úunt akupniuka anintrúsmiayi. 14 Kame úunt akupniuka Karsenan, Setaran, Atmatan, Társesan, Mírisan, Marsenan tura Memukanan untsukarmiayi. Ju̱ chichaman iwiarin unuimiákaru siati armia nuka Pírsianmaya̱ núnisaṉ Mítianmaya̱ ármiayi. Kame úunt akupniuja̱i̱ áujmatsatniuṉka niṉkia aṉkant ármiayi. Núnisaraṉ akupeamunmaṉka nisha uuntri̱ náakam ármiayi. 15 Kame akupniu nuwé̱ Pasti úunt akupin Asueru chichame̱n nuatcha ainia nui̱ akatmamar akupkámun umikcha asasha akupkámu umiktin chichamsha warí itiurnakti tawa tusa úunt akupin anintrúsmiayi.

16 Úunt akupniuja̱i̱ pujuarmia nusha ashí pujuiniai̱ṉ^ki Memukan chicharuk “Pástikia aya úunt akupniui̱ṉ yajauchin túrachai. Antsu ashí uuntri̱ pujuiniamunam núnisaṉ ashí nuṉka tesarmánum uuntri̱ pujuiniamunam aents matsatainia nui̱sha yajauchin túrayi. 17 Warí úunt akupniu nuwé̱ Pasti chichame̱n ashí nuwa̱ antukar ni áishri̱n imiancha enentáimtusar nakitrartatui. Tura chichainiak ‘Warí, Pástisha akupniu imia núwe̱tiat úunt akupin Asueru untsuamaitiat werichmiayi’ tiártatui. 18 Núnisaraṉ Pírsianmaya̱ tura Mítianmaya̱ nuwa̱sha akupniu nuwé̱ chichamen antukaruka chichaman iwiarin unuimiákaru akupin anairamu matsatainiana nuna nisha núnisaraṉ tiártatui. Tuíniakuiṉkia muí̱jnaikiatin tura yajauch chicharnaisatin átatui. 19 Tuma asamtai úunt akupniu, ámiji̱a̱i̱ péṉkeraitkiuiṉkia akupkámu umiktin chicham úunt akupniui̱ya̱ jíinkiti. Tura Pírsianmaya̱ núnisaṉ Mítianmaya̱ akupkámu yapajchatai̱ya núnis yapajniáshti tusam yamaikia Pástikia úunt akupin Asueru pujamunam peṉké weantkashti. Antsu chíkich nuwa̱n níji̱a̱i̱ṉkia naṉkaamas péṉkeran akupniu nuwe̱ úunt akupin awajsati. 20 Akupkáttamna nuka ame akupeamuram nuṉka timiá uunt ai̱ṉ ashí akupeamurmin etsernakti. Núja̱i̱ṉkia ashí nuwá̱ peṉkeri̱ tura péejchach ainia nusha ni áishri̱n arantukartatui” tímiayi Memukan.

21 Nuna takui̱ akupniúsha tura chichaman iwiarin unuimiákaru pujuarmia nusha nekas péṉkeraiti tu enentáimsarmiayi. Tura akupin Asueruka Memukan timia núnaka tímiatrusaṉ túramiayi. 22 Tuma asa úunt akupin ni nuṉké̱ nakaarma armia nui̱ṉkia aṉkant aṉkant ní áakmatairi̱ji̱a̱i̱ṉ áatrar núnisaṉ péprunka ní chichame̱ja̱i̱ṉ áatar ashí akuptuiniak ashí áishmaṉ ni je̱e̱nkia akupkarti tu áarman akuprarmiayi.