Istir
Asueru chíkich nuwa̱n e̱a̱mu
2 Uunt akupin Asueru kajekmári̱n iniaṉkas pujus Pasti túramia nuna núnisaṉ úunt akupniui̱ṉkia atakka peṉké táchati tu chichaman najanawarmia nuna ti enentáimturmiayi. 2 Tura ímia akupniun yain pujuarmia nu chichainiak “Nuwa̱ natsa áishmaṉja̱i̱ tsaniṉcha péṉker iira úunt akupin e̱a̱tnakti. 3 Tura úunt akupin ni akupeana nui̱ ashí nuṉka tesarmánum takarniúri̱ uuntri̱ pujuarmia nu nuwa̱ natsa áishmaṉja̱i̱ tsaniṉcha ashí shíirmach iirka ainia nuna e̱a̱tkarti tiármiayi. Tura irur pepru uuntri̱ Súsanam akupniu nua̱ri̱ya nútikias irurar apujsamunam Jekái nuatcha áishmaṉ nuwá̱ wáinin pujamunam júkiarti. Túramtai kuṉkuinji̱a̱i̱sha tura aya̱sh iwiartai̱ yakamatai̱ji̱a̱i̱sha ni iwiarmamtikrarti. 4 Túramtai úunt akupin iis ni wakeruka nú nuwa̱ Pasti pujumia núnisaṉ akiniak pujusti” tiármiayi. Nuna antuk úunt akupniuka ti shiir waras nútiksaṉ túramiayi.
5 Nu pepru uuntri̱ Súsanam áishmaṉ Israer shuar Martukíu náartin pujuyayi. Nisha Jaira uchirí̱yayi Semái tiraṉki̱ nuyá̱ apachrí̱ṉkia Kish tura nuka Piṉjiamín wea ármiayi. 6 Papirúnianmaya̱ akupin Napukutunusúr Martukíusha chikichji̱a̱i̱ métek achirar Jutanmaya̱ akupniun Juakinkian* misá yaruakarmiayi. 7 Istira aparí̱sha nukurí̱sha jákaru ásarmatai Martukíuka kaná aparí̱ nawantri̱ asamtai jukí̱ ni nawantri̱ya tímiatrus tsakatmarmia nuka shíirmach íirkauyayi. Nú nuwa̱chikia Jatasaiti kame Jatasa támaka Istir támaiti.
8 Uunt akupin túrunati tu chichakmatai pepru uuntri̱ Súsanam nuwa̱n natsan Jekái wainkiati tusa nuwa̱ irumtai̱ tesamunam úunt akupniu je̱e̱n ikiankarmiayi. Núnisaṉ Istirsha nui̱ páchitkia Jekái nuwa̱n wáiniuya nu iisma wémiayi. 9 Nu nuwa̱ ti péṉker shiir enentáimtusmin asamtai Jekái ti shiir enentáimtusmiayi. Túmak wárikmas kuṉkuinji̱a̱i̱sha tura aya̱sh íwiarkur yakamatai̱ji̱a̱i̱sha péṉker iwiaratarum tura yurumkari̱sha iwiarturtarum tusa akupkámiayi. Nu túrarum siati nuwa̱ natsa juurma úunt akupniu je̱e̱n pujuinia nu ni yaintri̱ ártí tusarum Istir anaitiuktarum tímiayi. Tura nuwa̱ matsamtai̱niam chíkich tesamuja̱i̱ naṉkaamas péṉkernum júkiar apujsarmiayi. 10 Istirka Martukíu etserkaip timia asa nisha ¿tuyá̱ áentskiya? tura ni shuari̱sha ¿ya we̱a̱k armia? núnaka etserkachmiayi. 11 Martukíuka Istir ¿péṉkerash pujá? tura ¿urukawak? tusa nekaattsa tuke tsawant nuwa̱ matsamtai̱niam taa a̱a̱ wekaasua waket wémiayi.
12 Tsawant jeamtai úunt akupin Asueru pujamunam nuwa̱ natsa chikichik chikichik taritin ármiayi. Kame nuwa̱nu chichakma amia nuka chikichik uwí jeamtai tímiatrusaṉ uminkiatniuyayi. Nuka sais nantutinkia aya mira asuitiji̱a̱i̱ iwiaramu tura chíkich sais nantutinkia kuṉkuinji̱a̱i̱ tura chíkich kuṉkuin yakamatai áiniana nuja̱i̱ iwiaramu pujustin ármiayi. 13 Nuna túruna nuwa̱ nátsaka úunt akupin pujamunam taa wéarmiayi. Uunt akupin pujamunam wéakur iwiarmampratniun nuwa̱ natsa seamainiakuiṉkia ni seamna núnaka mash suu wéarmiayi. 14 Tura niṉkia kashi we nuyá̱ tsawa̱r nuwa̱ chíkich matsamtai̱niam nuatcha Saaskas náartin akupin apujsamu nuwá̱ wáinin pujumia nú je̱a̱nam waketkimiayi. Nui̱ pujuska úunt akupin wakerak náari̱n anaitiukka untsúachmaka taa wéchamiayi.
15 Nuya̱ṉka Apijiáira nawantri̱ Istir Martukíu ni íichri̱niun ni nawantri̱ya nútikias tsakatmarmia nu úunt akupniunam wétintri̱ jeamiayi. Niṉkia warinkish júkitniun enentáimsachmiayi. Antsu áyatik nuatcha Jekái wáinin timia nunak jukimiayi. Tí peṉker shiir enentáimtusmin asamtai Istirnaka ashí wainiarmia nusha shiir enentáimtiarmiayi. 16 Uunt akupin anaikiamu siati uwí jeamtai nantu tiástin Istiran úunt akupin Asueru je̱e̱n júkiarmiayi. 17 Istirka tí peṉker enentáimkia asamtai úunt akupin ashí nuwa̱ natsa áishmaṉja̱i̱ tsaniṉcha armia nuja̱i̱ naṉkaamas wakerukmiayi. Tura asa úunt akupin etseṉkrutai̱n muuknum etseṉkrumtikiamiayi. Tura nuik Pasti pujumia núnisaṉ yamaikia nuwa̱n akupin awajsámiayi. 18 Nuya̱ṉka Istiran páantin awajeak tí peṉker yurumtai̱ namperan najatamiayi. Túrak ashí ni takarniúri̱ úuntri̱ncha tura ni akupeamuri̱n takarin armia nunasha ipiaawarmiayi. Uunt akupin kuit akiktin amia nunasha nuṉká itiarmiayi. Kame úunt akupniusha ni tsaṉkari̱n iniakmak ni warirí̱ncha ántar súsarmiayi.
Martukíu úunt akupniun uwemtikma
19 Nuwá̱ natsan ataksha irurarmia nuiṉkia Martukíuka úunt akupniu wáitiri̱n pujumiayi. 20 Istirka Martukíu etserkaip timia asa ya weait nunasha etsertsuk tura tuya̱uya̱ nunasha peṉké etserkachmiayi. Kame Istirka Martukíu tsakatmak chicharkamia tímiatrusaṉ umikmiayi. 21 Martukíu úunt akupniu wáitiri̱n pujumia nú tsawantai̱ jimiará áishmaṉ, nuatcha wáitiniam wajáu, Wiktanja̱i̱ Téres kajekar úunt akupniun mátaj tusa chichaman jurusármiayi. 22 Martukíu nuna nekáa Istiran ujakmiayi. Nuya̱sha Istir Martukíu etserkayi tusa úunt akupniun ujakmiayi. 23 Nuya̱ṉka inintrus nekáa nekasaitkiui jimiará áishmaṉ nuatcha armia nuna yakí̱ nenawar máwarmiayi. Kame túrunawarma papinium úunt akupniusha pujai̱ṉki áararmiayi.