Istir

Israer shuar nupetmakar yapajmiamu

9 Kame tuse nantu Atar nantutin tsawantka tráisetin úunt akupin chichakma tura umiktin chicham najanamusha uminkiatniuyayi. Nu tsawantinkia Israer shuara nemasri̱ armia nuka nupetkartatji tu enentáimtusarmiayi. Túrasha nuka túmatsuk antsu Israer shuaran nakitiarmia nú aentsun Israer shuar tumá nupetkarmiayi. 2 Kame úunt akupin Asueru akupmanum nuṉka tesarármanum pepru iruniarmia nui̱ṉ Israer shuarka nin itiurchat awajsatai tu enentáimtiarmia nuyá̱ ayamprumaktaitsar ní pepruri̱ni̱ṉ ashí iruntrarmiayi. Warí ashí nuṉkanmaya̱ aents sapijmiakaru ásar Israer shuaran katsuntar wajatratniuka peṉké atsumiayi. 3 Nuyá̱ nuṉka tesarmánum anairamusha tura sátrapasha núnisaṉ pepru úuntri̱sha ántsaṉ úunt akupniu takatrí̱n wáitin armia nusha sápij eṉkemtuam Martukíun ashamainiak Israer shuarnaka naat awajiármiayi. 4 Kame úunt akupniu je̱e̱nkia Martukíuka tí uuntauyayi núnisaṉ ni páantniuri̱ncha ashí nuṉkanam etsernarmiayi. Túmak nuna naṉkaamas uunt ajakí̱ wémiayi.

5 Kame Israer shuarka ni nemasri̱nkia puya̱ja̱i̱ kajeṉkar emeskar núnisaṉ nin peṉké nakitrarmia nunasha ní wakeramun túrawarmiayi. 6 Pepru uuntri̱ Súsanmaṉ Israer shuarka kiniantu áishmaṉkan kajeṉ amukármiayi. 7 Kame mantamnawaruka Parsantáta tura Tarjun, Aspata, 8 nuyá̱ Purata, Atarías, Aritáta, 9 Parmasta, Arisái, Aritiái nuyá̱ Waisata ármiayi. 10 Nuka Ametáta uchirí̱ Aman Israer shuara nemasri̱ uchirí̱ tias armia nuna máwarmiayi. Túrasha ni wariri̱ takakmanka atantracharmiayi.

11 Nu tsawantini̱ṉ úunt akupniusha urutmá aentsuk Súsanam jákara núnaka nekaamiayi. 12 Tura úunt akupin Istiran chicharuk “Aya Súsanmaṉ Israer shuarka kiniantu áishmaṉkan tura Amana uchirí̱ncha tiásan máwar emeskaruiti. Tura úunt akupniu nuṉké̱ chíkich tesarma ainia nui̱sha nu arantcha ¿wariniak túrukaruit? Yamaisha ¿warí seameam? nuka sunastatme. Nu arantcha ¿warí wakeram? nusha tímiatrusaṉ túrunattawai.”

13 Tutai Istir úunt akupniun aya̱k “Kame úunt akupniu ámiji̱a̱i̱ péṉkeraitkiuiṉkia Israer shuar Súsanam pujuiniana nuka yamái umiktin chícham najanamua nuna kashincha tímiatrusaṉ umikiarti tura Amana uchirí̱ tias ainia nuna aya̱shi̱ncha kajemtiktai̱niam nenawarti” tímiayi.

14 Kame núnis uminkiati tusa úunt akupin akupkámiayi. Nú chicham najanamuka Súsanmaṉka ashí etsernakmiayi. Túrunamtai Amana uchirí̱ tias armia núnaka nenawarmiayi. 15 Nuyá̱ Israer shuar Súsanam pujuarmia nuka tsawant katursetincha Atar nantutin iruntrarmia nui̱sha Súsanmaṉka traisiantu áishmaṉkan máwarmiayi. Tura ni wariri̱ armia núnaka atantracharmiayi.

16 Núnisaṉ Israer shuar chíkich tesarmánum matsamin armia nusha ayamprumak ni nemasri̱ya̱ṉka aṉkant matsamsatai tusar iruntrarmiayi. Túrawar ni mui̱jiarmia nu aentsun sataintiséṉku míran máwarmiayi. Túrasha ni wariri̱ armia núnaka atantracharmiayi. 17 Tsawant tráisetin Atar nantutin jú̱nis naṉkaamasmiayi.

Tura nú nantutini̱ṉ tsawant katurse ayamainiak tí peṉker yurumkan najanawar yurumáiniak tí warasarmiayi. 18 Israer shuar Súsanam pujuarmia nu tráisetin núnisaṉ katursetincha iruntrarmiayi tura nú nantutini̱ṉ kínsetincha ayamainiak tí peṉker yurumkan iwiarkar yurumáiniak tí warasarmiayi. 19 Israer shuar wenuichmanum arantach matsamin armia nú tsawant katurse tura Atar nantutin tí peṉker yurumkan iwiarkar yurumáiniak warainiak ni írutkamuri̱n yurumkan ántrasha mái̱ sunai tura mái̱ ajamnai ajainiawai.

Purim tsawant wararsatin

20 Naṉkaamasua nuna Martukíu úunt akupin Asueru akupeamunam nuṉka tesarmánum ashí Israer shuar pujuarmia nui̱ tíjiu̱chisha tura yajasha papin aar akuprámiayi. 21 Tuke uwitin Atar nantutin tsawant katurse tura kínsetin aṉkant ajasma tsawantan enentáimtustinian umikiarti tusa papin akuptúkarmiayi. 22 Kame nu tsawantin Israer shuarka ni nemasri̱ji̱a̱i̱ aṉkantcha pujuarmia nuyá̱ aṉkant ajasármiayi. Warí kúntuts matsamtai̱ nantunka iniaisar íksaṉ ti shiir warasarti. Ántsaṉ ajakmámprar útaincha iniaisar tumá tí peṉker yurumkan iwiarkar warasar yurumáwarti. Tura ni írutramuri̱ji̱a̱i̱ mái̱ ajamnai ajainiak nuya̱sha atsumainia nunasha wariṉkish súsarti tusa umiktin chichaman aar akuptúkmiayi.

23 Israer shuar aṉkant ajasma tsawant enentáimtustin naṉkamamua nuka tuke enentáimtutai̱ atí tusa Martukíu papin akuprámia nuka umiktáji tiármiayi. 24 Warí Akaak shuar Ametáta uchirí̱ Aman ashí Israera nemasri̱ya̱ nu ashí Israer shuar ainia núnaka amú amustai tu enentáimiak imiaamtikrar emeskar amuktai tusa pur tutain nekapas nakurúsmiayi. 25 Nuya̱ṉka Istir úunt akupin pujamunam wantinkiamtai úunt akupniuka yajauch awajkartin Israer shuaran amuktaj tusa enentáimna nuka niṉki nuja̱i̱ tumá asutniáti tusa papinium tu áarman paant awajsámiayi. Nu uminiakui Amanan ni uchirí̱ji̱a̱i̱ sué̱nam jiṉkiá nenawarmiayi. 26 Kame nú tsawantan pur nakurúsma asamtai Purim tsawant anaikiarmiayi.

Nuiṉkia ju̱ papinium chícham áarman wainkiamuja̱i̱ tura ashí naṉkaamasmia nuka 27 Israer shuarsha tura ni uchirí̱sha tura iisha Israer shuar ajastatji tiarua nusha ju̱ tuke enentáimtutai̱ átin najanamua ju̱ka umiktatji tiármiayi. Nusha itiur áarmait ímiatrusaṉ tuke uwitin nú nantutini̱ṉ jimiará tsawant najantiatji tiármiayi. 28 Tura nu tsawantka tuke enentáimtuneak ni uchirí̱sha nuyá̱ uchirí̱ ártatna nusha ni shuari̱sha tura nuṉka tesarmánumsha tura pepru ainia nui̱sha jú̱naka tuke enentáimtuiniak iruntrar warasar naṉkaamasartatui.

Purimia tsawantri̱nkia Israer shuar tí peṉker warastin tsawant najanatniuṉka iniaisachartatui núnisaṉ Israer shuar ukunam akiiniawartatna nusha núnaka enentáimtustinniaka iniaisachartatui. 29 Nuyá̱ nuwa̱ akupin Istir Apijiáira nawantri̱ Martukíuja̱i̱ ni kakarmari̱ji̱a̱i̱ Purimian pachis ataksháa papin áararmiayi. 30 Martukíu ashí Israer shuar pujuinia nui̱ papin aar siantu paintisiáti nuṉka tesarma áiniana nui̱ Asueru akupeana ímianai akuprámiayi. Tura shiir matsamsatin chichaman tura nekas chichamnasha áarar akuptúrarmiayi. 31 Núnisaṉ Purim tsawant najanatin tesamu enentáimtustinian ní shuar umikiarat tusa Martukíu Israernumia̱ nu tura nuwa̱ akupin Istir papin ataksháa áararmiayi. Tura ju̱ enentáimtakur útkur kúntuts tura ijiarmár seakur pujusmaka iisha tura ukunam akiiniawartatna nusha kajinmáttsuk umiktáji tiarmia nunasha áararmiayi. 32 Istir Purim enentáimtustinkia tuke najanati tusa nú akupkámu aar papinium ikiusmiayi.