Istir

8 Nu tsawantini̱ṉ úunt akupin Asueru Israer shuara nemasri̱ Amanai̱ irunmia núnaka nuwa̱ akupin Istiran ashí susamiayi. Tura Istirsha Martukíuka wí shuaraiti tusa ujakma asa Martukíuka úunt akupniui̱ támiayi. 2 Uunt akupin ni uwejnum awetai̱n Amannan uwejé̱n ikiursamia nuna jurukí̱ Martukíun susamiayi. Túramtai Amana je̱e̱n ni warirí̱ irunmia núnaka Istir Martukíun ashí íktusmiayi.

Israer shuar yáiṉtin papí najanamu

3 Nuya̱ṉka ataksha Istir utki̱ úunt akupniu nawe̱n pujuras Akaak shuar Aman, Israer shuar amuukatin chicham najanamu asakátrurta tusa seamiayi. 4 Nuya̱ṉka Istir túmakui̱ úunt akupin akupkur takutai̱ kuriji̱a̱i̱ najanamun iwiaintiukmiayi. Túram Istir úunt akupniun wajatki̱ 5 chicharuk “Úunt akupniuja̱i̱ iisam péṉkeraitkiuiṉkia tura winiasha waitnentrakmeka wi seajmena nusha núnisaṉ tájamna nusha túramniaitkiumka uminkiati. Núnismek winiasha shiir enentáimturkumka Akaak shuar Ametáta uchirí̱ Aman Israer shuarka ashí amuukarti tusa papí najana ashí nuṉka tesarma ainia nui̱ akuprarma nuka uminkiashti tusam yamaram chicham ataksha najanata. 6 Kame wí shuar itiurchat matsataisha wisha ¿itiurak katsuntrataj? Tura wí shuar takamtsuk amuukartinnium matsatainiai̱sha ¿itiur enentáimsanak katsuntrataj?” tímiayi. 7 Nuya̱ṉka úunt akupin Asueru Istiran Martukíuja̱i̱ chicharainiak “Nekaata. Amanan Israer shuaran amuktin chichaman najatamtai kajemtikra mátai̱nian nenawarmai. Nuna je̱e̱nka wariri̱ntiuk wi Istiran súsarjai. 8 Nui̱ṉkia átum úunt akupniu náari̱ji̱a̱i̱ áakrum Israer shuar amuktai tusar papí najanamu asakártai tusarum átum wakeramuja̱i̱ aartarum. Tura áarum winia aniyurja̱i̱ kuchaat kuchaat apujtuatarum. Warí úunt akupniu náari̱ji̱a̱i̱ núnisaṉ ni aniyuri̱ji̱a̱i̱ kuchaat kuchaat apujturma papikia yapaji̱áchminiaiti.”

9 Tura nu chichamaik úunt akupniunu papí ain armia núnaka nántuka menaintiunam tura tsawantka paintitráistin untsukarmiayi. Kame Martukíu timia ímiatrusaṉ Israer shuarnaka tura sátrapancha nuyá̱ uuntri̱ armia nunasha nuṉka tesarmánum uuntri̱ anaikiamu armia nunasha Íntianmaya̱ juarki̱ Itiupía ímianai papí áarman akuprarmiayi. Tura ashí siantu paintisiáti nuṉka tesarmánum pujuarmia núnaka ní aatai̱ri̱ji̱a̱i̱ métek tura ashí aentsnasha aṉkant aṉkant ní chichame̱ja̱i̱ṉ áatkarmiayi. Tura Israer shuarnaka ní aatai̱ri̱ji̱a̱i̱ṉ tura ní chichame̱ja̱i̱ métek áatkarmiayi. 10 Nú papinkia úunt akupniu Asueru náari̱ji̱a̱i̱ áakar aniyuri̱ji̱a̱i̱ asaka apujturarmiayi. Nuna tura úunt akupniu kawairi̱ peṉkeri̱ kakaram wekain armia nuyá̱ akiiniawarua nú kawaiji̱a̱i̱ chichaman etserniun papin atakas akupkarmiayi. 11 Nú papiniumka ashí péprunam Israer shuar matsamármia núnaka, suntar tú peprunmaya̱ṉsha núja̱i̱nchuka nuṉka tesarma armia nuya̱ṉsha atumín amutmaktaj tusa káutramkakrumni̱ṉkia iruntrarum ayamprumakrum nú aentska uchiimiak tura nuwa̱imiak emeskarum kajeṉkrum amuktárum túrarum niniu wariṉkish írunna nuka atantrarum nérentin ajastarum tusa úunt akupin Israer shuaran tsaṉkatkarmiayi. 12 Kame ashí úunt akupin Asueru akupeamunam nuṉka tesarma armia nui̱ tsawant traise ámanum nantu tuse Atar nantutin chikichkí tsawantini̱ṉ túrunatniuyayi. 13 Kame chicham najanamu papinium aarma amia núninniak chikichnasha najanawar nuṉka tesarma armia nui̱ṉkia akupkámu umiktin chichama núnis najanatin ármiayi. Núnisaṉ Israer shuar iwiarnakar ni nemasri̱ya̱ ayamprumakar nisha yapajmiákarat tusa ashí aents matsatainiamunam nu chichamka etsernartiniuyayi. 14 Kame chichama juíniaka úunt akupniu kawairi̱ wárikmas wekain armia nui̱ ekemprar úunt akupniu chichame̱ja̱i̱ wárikmas ashinkiarmiayi. Nu chichamka pepru uuntri̱ Súsanam najanamiayi.

15 Tura Martukíusha akupin entsatái̱ pushin wiṉkiaja̱i̱ pújun entsar, uunt tawaspancha kuriji̱a̱i̱ najanamun etseṉkraku pátatkesha yamakáimpramun entsaru úunt akupin pujamunmaya̱ jiinkimiayi. Túrunamtai Súsanam pujuarmia nuka tí warainiak charaatum ajarmiayi. 16 Nuyá̱ Israer shuarka nuna nekaawar ashí péṉker ajakí̱ wénakui warasar shiir enentáimtuiniak yumiṉsarmiayi. 17 Kame nuṉka tesarma armia nui̱sha tura aṉkant aṉkant pepru armia nui̱ úunt akupniu chichame̱ jeamia nuiṉkia Israer shuarka ti warainiak shiir tsawant nájanji tusar tí peṉker núkap yurumátniun najanawarmiayi. Tura Israer shuaran ashamainiak untsurí aents nu nuṉkanmaya̱sha iisha Israer shuaraitji tiármiayi.