Juup

 2 “Tímianu chicháa nu ái̱kchamusha áwak.

Kame aents ti chicháa núja̱i̱ṉ nekasapi tawa tutaint.

 3 Timia chichamna nuja̱i̱ ámeka aents ái̱rkacharat tamek,

yanaksha iniatsá̱ran wishikrartaj tuuk enentáimiam.

 4 Ámeka wi jintíajna nu nekasaiti tau asam,

áme íimiasmeka tunaari̱ncha enentáimtumame.

 5 Chaaj, Yus ámin itiurak chichartamka.

 6 Tura kuítriniatniuja̱i̱sha naṉkaamas asa nekatai̱ nekaachminia nuna paant awajtúrmasmatai

antsu nuiṉkia tunaarumji̱a̱i̱ métek Yus asutiámachainia nu nekaamawaintme.

 7 ¿Yus nekaachminji̱a̱i̱ itiurchat túrutma nu nékamek

tura Ashí Tujintkiachu Yusa timianú nékakuk ámeka ajastatam?

 8 ¿Nekatai̱ nayaim ti yakiya̱ ímianaitkiuisha amesha itiurkaintmek?

Tura náṉkatkachu jaka matsamtaiya̱ ímianaitkiuisha amesha ¿itiur nekaawaintmek?

 9 Nekatai̱ esantí̱sha nuṉkaja̱i̱ naṉkaamasaiti,

tura nayantsaja̱i̱ naṉkaamas waṉkarmaiti.

10 Tura Yus winiak emettama

nekasa nuja̱i̱ irutmar súmamtikramkuisha

¿yaki suritkiaint?

11 Yuska ántar ainiancha nékawai

núnisaṉ tunáa túruiniancha wainiui ¿nú aentsnaka pachischattuak?

12 Aents umpurunmaya̱ akiiniamtai

ántar aents ainia nu neka áminiaiti.

13 Yus naka enentáimtusam

tura niní̱ weankam,

14 ame tunaaruminia̱ kanakim

amiin yajauch itiaachkumka,

15 shiir enentáiji̱a̱i̱ sapijmiatsuk

kakaram ajasam paṉkaim íimiakum,

16 ame wáitsamurmesha

entsa naṉkaamasua núnis enentáimtustatme.

17 Ame iwiaakmarmeka etsa̱ tutupin ajas tsáapniana nú naṉkaamasaiti,

kiritiaitiataṉ tsawa̱a̱na núniktatui.

18 Wats, enentáimtakum nákasta,

ashí nupetmakam péṉker kanartatme.

19 Tura ayamprattame nuiṉkia atakka yaaksha aitkia awaktámkamnia atsuttawai.

Núnisaṉ untsurí aents ámin yáintmainia táartatui.

20 Tura yajauchin túrinkia amukártatui.

Núnisaṉ ú̱mkatniuncha tujintkiartatui,

niṉkia aya jákatniuk áiniawai”