Juup

Yus Satanásan ataksha tsaṉkatma

2 Ataksha chíkich tsawant Yusa suntari̱ Uunt Yusai̱ weanainiakui Satanássha nui̱ páchitkia Uunt Yusai̱ weantkamiayi. 2 Nui̱ Uunt Yus Satanásan anintrak “¿Tuyá̱ winiam?” tutai Satanás Uunt Yusan aya̱k “Nuṉkan wekatusan téntakan iyasuan winiajai” tímiayi. 3 Nuna takui̱ Uunt Yus Satanásan chicharuk “¿Winia takartin Juup wáinkiachumek? Nuṉkaṉka chíkich aents niji̱a̱i̱ métek péṉker enentáimin péṉkera túrin Yusan ashamak ímiatrusaṉ umíak yajauchinmaya̱ kanakniuka peṉké atsawai. Tura ame chichartakum ‘Wats ashí takakna nu emestukam nekapsata’ túrutkumin Wi peṉké antran ashí jurukmiasha niṉkia tuke umirtawai” tímiayi. 4 Nuna takui̱ Satanás Yusan aya̱k “Auka ni aya̱shí̱ antiṉcham ashí péṉker enentáimiui. Tuma asa ni iwiaakmari̱n uwemtikrataj tusaṉ ashí itiurchatnum wáitsatniuitkiusha katsunniuiti. 5 Wats yamaikia aya̱shí̱ tunamatkiarta. Nu túramka nekas ámin peṉké yajauch chichartamkattawai” tímiayi. 6 Nuna takui̱ Uunt Yus Satanásan chicharuk “Ayu ame warí itiurkattaj tusam wakeram nu túrata túrasha matka máwaip” tímiayi. 7 Uunt Yus tutai Satanás Yus pujamunmaya̱ jiinkí̱ wémiayi. Tura Júupan nawe̱nmasha muuknumsha ashí aya̱shnium kuchap kuchaprú awajsámiayi. 8 Túram Juupsha ni aya̱shí̱n téreer awajénam jakachji̱a̱i̱ kesamamiayi. Túmak yuṉkunminiam ajapén pujuyayi. 9 Tumá pujan ni nuwé̱ wainiak chicharuk “¿Ámeka tunaari̱ncha aya péṉkerkek enentáimiá ajatniuitiam? Yus yajauch chicharkam jarumkakia” tímiayi. 10 Takui̱ Juup ni nuwe̱n aya̱k “Nua̱ru, ¿urukamtai nékachu nuwa̱ ainia núnismesha chicham? Iisha Yusai̱ya̱ péṉkersha wáintsujik núnisrik itiurchatcha wáinkiatniuitji.” Nuní̱ chichareamsha Juupka tunaanka peṉké túrachmiayi.

Juupa amikrí̱ uyu̱ntsarmia nu

11 Tura Juupa amikri̱ menaintiuka ju̱ ármiayi, Temannumia̱ Eripiáska, Suánmaya̱ Pirtatka tura Naamatnumia̱ Supaarka. Juupna ashí túrunamun nuyá̱ jáamun anturkar ni nuṉke̱ya̱ káunkarmiayi. Nuyá̱ chichasar uyu̱sar shiir enentáimtikiur yaiṉtai tusar Júupan weriarmiayi. 12 Tura Júupan arantiaṉ wáinkiar níṉkiapitia tusar kakantar útainiak waa waa ajarmiayi. Túmainiak pushiri̱n já̱a̱rar yuṉkunmin yakiini̱ naṉkimiawar muuknum ukatmamkarmiayi. 13 Túrunawar siati tsawant tsawai̱sha káshisha niji̱a̱i̱ métek tsaniṉkiar nuṉká pujusármiayi. Tura ti najaimiak wáittiakui̱ áujtsuk aya íyarmiayi.