Juup
Juup Yusan enentáimtus peṉké ejetuachma
7 Jú̱ nuṉkanmaṉka aents takat kakarman ¿wáitkiachartatuak?
Ni tsawantri̱sha aents takakma nu akirkat tusa nákana ¿núnischakait?
2 Takarin kakarmachu ajas mikintranam ejamna nuíchuka takakma nu akirkat tusa nákana
3 núnisaṉ nantur nantur jaa pujakun,
imiankaska kashi wáitsatniun surusmai.
4 Tepaknasha káshikia mai̱ áyanta ajá ajakuan tsawa̱wá̱ ajakun
¿urutáik nantaktiaj? tu enentáimjiai.
5 Ashí aya̱shrui̱ akarkan pukumanch nuṉkaja̱i̱ pachimnair nujamar káartukmatai pushí entsarua núnikjiai.
Tura nuaprui̱sha kupiniaran mui̱jmiai̱n ajasjai.
6 Winia tsawantrusha tarach apakmatai tsak tsak wéana núnis ti wárik naṉkatuiniakui
kashinkia péṉker ajastatjapi tu nekapeatsjai.
7 Yusru, winia iwiaakmarka umpuitniua áintsaiti
tura warastinniaka peṉké wáinkiashtiniaitjiai.
8 Tura yamái winia wáitiainia nuka atakka wáitkiachartatui
tura ame íirkumnisha wikia atsuttajai.
9 Yuraṉkim meṉkaana núnis
shuar jakamtai iwiarsamunmaya̱ atakka nantaki̱ táchatainti.
10 Nuya̱ṉka ni je̱e̱nkia atakka waketki̱ táchattawai
tura ni pujutái̱ri̱nkia peṉké wainniakchattawai.
11 Tuma asan najaimiakun ti wáitiajna nuja̱i̱ tákamtakka pujuschattajai.
Antsu winia wakaniur tí waitiakui chichastatjai.
Wakantrusha tí yapá núnin nekapeakui tákamtakka pujuschattajai.
12 ¿Warí wikia nayantsakaitiaj tura entsaya̱ uunt yajasma áintsaṉkaitiaj,
wáinkiata tusam apujtitnia?
13 Peaknum tepesan áyameakun,
kanarnapi najaimiamursha nentemturartatua tú takui̱sha
14 mesekranam tsuumai̱ iniakturkum sápij eṉketruam wáitkiarame.
15 Ju̱ aya̱shruja̱i̱ wáitsan iwiaakjana jú̱ja̱i̱sha naṉkaamas kajempran jákatniun wakerajai.
16 Winia iwiaakmarun muí̱jiajai. Warí tuke iwiaaku pujú ajatniukaitiaj.
Antsu iniaitiusta, winia iwiaakmarka ántraiti.
17 ¿Áishmaṉsha warí uruku asamtai náakam awajsam imiá enentáimtam?
18 ¿Warí urukamtai ashí tsawantin tuke káshik iyam
tura iniaṉnatsuk nekapniuitiam?
19 Urutáik winia íirsatin iniaitiusakmin usukrun najekataj.
20 Aentsun wainniu ¿tunaan túraknasha amincha warí itiurajmea?
¿Urukamtai aya winiaksha ame naṉkirmiji̱a̱i̱ ijiutkum imiá wáitkiaram?
Nu túrutakmincha wáitsan iwiaakjai.
21 ¿Urukamtai wi tunáa túramu tura yajauchin túraitjiana nusha tsaṉkurtatsum?
Yamaikia jakattsan yuṉkunminiam pujajai.
Tura ti e̱a̱tkumnisha atsuttajai” Juup tímiayi.