Yus Kanta
Péṉker enentáimkia tura Yusan enentáimtichu
1 Ti shiir átatui ju̱na ánturna nu.
Yajauch ainia nuna jintíamuri̱n tura yajauch túrin shuarja̱i̱ iruntrataj tusa wéatsna nu,
núnisaṉ Yusan wishikin ainia nui̱ pachinchaitkiuṉka nu aentska nuna túrichu asa warastatui.
2 Antsu Uunt Yus akupkámu chicham umiktinian tí enentáimtaku waraawai.
Túmak tsawai̱sha tura káshisha ti enentáimtawai.
3 Kame entsá yantam numi araamu wajas neretáiri̱ jeamtai tí nukap nereana tura nuke̱sha kákeatsna núnis áiniawai.
Núnisaṉ Yus shuara túramuri̱sha nerektinia ántsaṉ ashí péṉker jukittiawai.
4 Túrasha Yusan enentáimtichu ainia núnaka núnischa áiniawai.
Antsu niṉkia nase wampuishin umpuí júana núnis áiniawai.
5 Tuma ásar Yus aentsun sumamtikiattana nui̱ṉkia yajauchin túrin ainia nuka tariarchartatui.
Nekas tunaan túrin ásar péṉkera túrin ainia nuja̱i̱ iruntratniun tujintkiartatui.
6 Warí péṉkera túrin ainia núnaka Uunt Yus nemarkawai.
Antsu Yusan enentáimtichu ainia nuna wekaamuri̱ṉkia amukatniunmaani̱ júawai.