Yus Kanta
Yusan enentáimtichu emesnarat tusar Yus seamu
10 Uunt Yusá ¿urukamtai winia wáitsatniur tarutín
ai̱sha íkiaṉ ajatrakum ú̱mpruttam?
2 Nekasaiti. Yajauch aents ainia nu emeskatin enentái̱ji̱a̱i̱ wekainia ásar kuítrincha ainia nuna apapénawai.
Túrasha ní iwiaramunmaṉ eṉkemkartatui.
3 Warí yajauch aentska aya ni túratniun wakerana nuna naṉkamantu enentáimtuiniawai.
Núnisaṉ núkap takustinian wakeruinia nusha Úunt Yusnaka nakitiáiniak yajauch chicharainiawai.
4 Ántsaṉ yajauch aentska ni naṉkamantu enentáimtumamuja̱i̱ Yúsnasha e̱a̱iniatsui.
Yúsnaka ishichkisha peṉké enentáimtuiniatsui.
5 Tuma ásar tuke tsawant ni jinti̱sha tuníaru áiniawai.
Núnisaṉ péṉkera nuna tura yajauchia núnaka enentáimtuiniatsui.
Ántsaṉ ni nemasri̱nkia imianchach enentáimtuiniawai.
6 Warí wikia tuke tarimiat ajasan pujustatjai.
Kame itiurchatcha peṉké inkiuṉkashtatui, tu enentáimtumainiawai.
7 Núnisaṉ aya yájauchinmaṉ yumiṉmartinian, anaṉmatniun tura chíkich yajauch awajsatniunak áujmatin áiniawai.
Tuma ásar itit awajkartin tura yajauch chichamtin áiniawai.*
8 Tuma ásar péprunam a̱a̱ch ú̱mprukar umitmákchan máiniawai
tura ayamprumakchamnia ainia nunasha nákainiawai.
9 Kame aents ayamprumakchamnian aya aneachma eṉkemkamtai mainia nuka
úunt ya̱wa̱ ni wa̱a̱ri̱ya̱ jiinkí̱ nákamak esakratna núnis áiniawai.
10 Túmak yapajmiákchamnia ainia núnaka maṉkartin tepé teperat ajasár achik emetawar máiniawai.
11 Kame ni enentái̱ji̱a̱i̱ṉkia “Yuska kajinmátramkiniaitji.
Warí peṉké nekarmashtatji” tu enentáimiainiawai.
12 Uunt Yusá túruinia nusha íisarta.
Túram wáitnenmai ajainia nu kajinmatkiaraip.
13 Yajauch aentsua nusha ¿urukamtai Yusan nakitiáinia?
Kame ni enentái̱nkia yajauch túramunmasha pachitmaschattaji tu enentáimtumainiawai.
14 Nekaska itit awajainiak wáitkiainia nuka Ame wainiainiame.
Tura wainkia asam ni túramuja̱i̱ métek sumamtikiawartatme.
Kame ajapamu ainia nuka Amiin weanainiawai.
Núnisaṉ mitiaik ainia nu yáiṉtinkia Ameketme.
15 ¡Yajauch aents ainia nuna kunturi̱ kupirkarta!
¡Ni túrutairi̱ yajauch ainia nuna awaiṉki̱ túracharat tusam asutiáwarta!
16 Uunt Yuska tuke akupniuiti.
Tuma asa ni nuṉke̱ya̱ṉka ashí najankamu yusa umirin shuarnaka jí̱i̱kiar akupkartatui.
17 Kame Uunt Yusá, péejchach ainia nu seatmainiakui anturkam atsaṉkraram ikiakáiniame.
18 Túram aents nuṉkaja̱i̱ najanamuitiat ti yajauch awajki̱ wéara̱i̱ṉ tusam mitiaikiasha
tura péejchach ainia nusha ayamprame.