Yus Kanta
Tawit itiurchat pujayat pisatsuk Yusan enentáimtamu
Kantamtikniun súak ju̱ kanta Tawit áaruiti.
11 Uunt Yuska wi ejamtai̱ ai̱sha
¿itiurak winia chichartuiniak “Chiṉkich nainnium nanak u̱mna núnikta turutiarat?”
2 Wats nekaata, Yusan enentáimtichu ainia nu ni tíshimkiuri̱n iwiararai.
Túrawar nenak ú̱mpruk pujursar naka enentáimkia ainia nuna naṉkía tukutaj tusa naṉkin ikiusarai.
3 Aeprukmari̱ emestukmaitkiuisha
péṉker túrin ainia nusha ¿warí itiurkaintiak?
4 Uunt Yuska Uunt Je̱e̱ akantúkma nui̱ pujawai. Uunt Yusa pujutái̱ri̱ṉkia nayaimpinmaiti.
Tura Ni ji̱ṉkia aentsnasha tura aentsu uchirí̱ncha wainiainiawai.
5 Péṉker túrin ainia nuna Uunt Yuska nekapas iyawai.
Tura yajauch shuar ainia nuna wakaní̱nkia nakitniuiti
tura yajauchin turuujat nekapin ainia nunasha muí̱jniuiti.
6 Yusan enentáimtichu ainia nuna jinia kaí̱ri̱n
núnisaṉ ji kean tura asuprin nuyá̱ kakaram nase iniantar ashí áeskartatui.
7 Uunt Yuska péṉkeran túriniaiti tuma asa péṉkeran anenaiti.
Tuma asamtai naka enentáimkia ainia nuka Niji̱a̱i̱ métek íiniaisar pujusártatui.