Yus Kanta
Kuítrincha ainia nuna ayamprinkia Úunt Yusaiti
Kantamtikniun súak ju̱ kanta Tawit áaruiti.
12 Maa Uunt Yusá, uwemtikrurta, warí Yusan umirin ainia núnaka amukcharaik.
Núnisaṉ chichak tímiatrusaṉ umikmin ainia nu aentska ju̱ nuṉkanam pujuinia nusha meṉkararai.
2 Tí peṉker chichainiayat aṉkant aṉkant ni írutramuri̱nkia anaṉkenawai.
Warí tuuka enentáimiainiachiat núnis chichainiawai.
3 Tí peṉker chichainiayat
ántar chichainia núnaka Uunt Yus emesrartatui.
4 Tura chichainiak “Warí íi chichame̱ja̱i̱ṉ iwiaakenatsjik.
Tura íi chichame̱ṉ iinkia ayamprútmarni̱sha nuya̱sha ¿yaki ii úuntri̱sha ati?” tuíniawai.
5 Tura Uunt Yus chichaak “Kuítrinchasha wáitkiainiamu asamtai núnisan atsumainiasha útainia asamtai Wi wajatrattajai.
Túran wáitkiainiak wishikiainia nuya̱ṉka uwemtikrartatjai” tawai.
6 Warí Uunt Yusa chichame̱ṉka kuit jíruk awajsatai tusar jinium siati awenar unuikiar kuit aya jíruk awajsamua tímianuiti.
7 Túrasha Uunt Yusá ame wáinkiartatme.
Túram ju̱ aents ainia nuya̱ṉka tuke ayamprúkarta.
8 Yajauchin túramtai warartai áiniak
netse ainia nusha téntakní̱ yujáu áiniawai.