Yus Kanta
Aṉkant ajasár Uunt Yus shiir awajma
146 ¡Naṉkamantuitme Uunt Yusá!
Winia wakantru Uunt Yus shiir awajsata.
2 Kame wi iwiaakjana ju̱i̱ṉkia Uunt Yusan shiir awajsattajai
túran winia Yúsrun pujajna ju̱i̱ṉkia kantampruáttajai.
3 Ju̱ nuṉkanmaya̱ akupin ainia nu enentáimtutsuk aentsush enentáimturairap
kame niinkia uwemtikkiarturtin atsawai.
4 Tuma ásar aents jákaṉka nuṉká ataksha waketainiawai
túrunawar ni túratin iwiaramuncha nú tsawantini̱ṉ umitsuk ikiuawai.
5 Jakupa Yusri̱n enentáimta nú aentsnaka Uunt Yus yaya̱kui nekas shíiraiti.
Kame Uunt Yus yaintkiat tusa nákasminiaiti.
6 Warí Uunt Yuska nayaimpincha nuṉkancha nayantsancha tura ashí nui̱ warí írunna núnaka Ni najankamu áiniawai
tura nekasa núnaka tuke wáinniuiti.
7 Wáitkiasma pujuinia nunasha niṉkia ashí núnisaraṉ nekasa nuja̱i̱ métek túriniaiti.
Tura tsukamainia nunasha yurumkan suawai.
Uunt Yuska chíkich nuṉkanam achirar yaruakma ainia nunasha aṉkant awajniuiti.
8 Uunt Yuska kusurú ainia nunasha íimtikniuiti.
Uunt Yuska kakarmachu ainia nuna inianniuiti.
Uunt Yuska péṉker enentáimkia ainia nuna anenaiti.
9 Uunt Yus yajaya̱ aents pujana nuna wainiui tura mitiaikiancha tura waje̱ncha achíakui.
Antsu Yusan umircha ainia nuna wekaamuri̱nkia emeṉkátui.
10 Uunt Yus tuke akuptiatui.
Maa, Seuná ame Yúsrum yamaisha tura ukunmasha tuke akupú pujutniuiti.
¡Naṉkamantuitme Uunt Yusá!