Yus Kanta

Warí shiir awajkur kantampruátniuka wakerújamainti tura shíirmaiti.

 2 Uunt Yus Jerusaréṉkan je̱a̱mui.

Israer shuar tsakiṉmakarma ainia nunasha írumui

 3 tura enentáinium jaa ainia nunasha tsuáwiti

tura akaṉmári̱ncha jaanchji̱a̱i̱ pénuiniaiti.

 4 Yaancha nekapmawiti

tura ni náari̱n anaiyawai.

 5 Ii Yusri̱nkia úuntaiti tura ti kakarmaiti

tura Ni enentáimtairi̱nkia náṉkatkachuiti.

 6 Uunt Yus péejchachin yáiniaiti

tura Yusa umircha ainia núnaka nuṉká aju̱a̱nt péejchach awajniuiti.

 7 Uunt Yus yumiṉsajme tusar túrutai̱ji̱a̱i̱ kantampruata

nuyá̱ ii Yusri̱ṉkia árpaja̱i̱sha kantampruata.

 8 Níyaiti nayaimpin yuraṉmiji̱a̱i̱ nukúana nú tura nuṉká yumi yutuktinniasha Niṉki íwiarui.

Núnisaṉ naint tépepra ainia nui̱sha nupa̱n tsapamtikiui.

 9 Taṉku ainia nunasha

núnisaṉ shanashná uchirí̱ útainiakuisha áyureawai.

10 Warí, Yuska kawái kakarmari̱n tiikia enentáimtichiuiti

núnisaṉ áishmaṉka kakarmari̱ncha wararchaiti.

11 Antsu Nin ashamainiana nuja̱i̱ Uunt Yus waraawai

tura Ni waitnenkartutairi̱n nákainia nuna enentáimtuiniawai.

12 Maa, Jerusaréṉká Uunt Yus shiir awajsata.

Núnisaṉ Seuná ame Yúsrum shiir awajsata.

13 Ame wáitirmi jirurí̱sha kupiniakchamnia awajtúsuitme.

Ame uchiram Ámiji̱a̱i̱ init pujuinia nusha shiir pujut súsaitme.

14 Ame nuṉkemka aṉkant pujustin itiarniuitme

túram péṉker tríkiuja̱i̱ tí nukap nútsumtikraitme.

15 Ni chichame̱n nuṉká akupeawai

tura ni chichame̱nka tí warik wéawai.

16 Urea nútikia michan ikiuawai

tura yuṉkunmia nútikia michá ju̱yu̱ri̱n ukatak sanamtikiui.

17 Ni michari̱n paṉka ju̱yu̱ri̱ya̱ nútikia ajapui.

¿Yaki ni tsetsekrí̱ncha wajawaint?

18 Ni chichame̱ akupkam kuawai.

Ni naseri̱n umpuakui entsa ajawai.

19 Ni chichame̱n Jakupan paant awajtúsuiti.

Ni akupkámu umiktinian tura nekasa nuja̱i̱ métek jintíamuncha Israeran nékamtikiamiayi.

20 Chíkich nuṉka úunt matsatka ainia nuiṉkia jú̱ni̱ṉkia peṉké túrachuiti

tura Ni nekasa nuja̱i̱ métek jintíamuri̱ncha nekacharuiti.