Yus Kanta
Ashí najankamuri̱ Yusan shiir awajáiniamu
148 ¡Jiuwá shiir awajtai̱ atí!
Nayaimpinmaya̱tirmesha Jiuwá shiir awajsatarum
núnisrumek yakiya̱tirmesha shiir awajsatarum.
2 Ashí Yusa suntari̱ árumna nútirmesha Ni shiir awajsatarum,
ashí Ni suntartirmesha Yus shiir awajsatarum.
3 Etsá̱ tura nantú shiir awajsatarum.
Ashí yaa keen árumna nútirmesha Ni shiir awajsatarum.
4 Nayaimpir nayaimpitirmesha Ni shiir awajsatarum
núnisaṉ nayaimp áawini̱ya̱ entsá Ni shiir awajsatarum.
5 Jiuwáa naari̱ shiir awajsatarum.
Warí Ni chichaak ju̱ní̱ turunati takui̱ tímiatrusaṉ najanakmiayi.
6 Nusha tuke amuukashtin árat tusa Ni ashí najanamiayi.
Tura nunasha yapaji̱áshtinian akupkámun ni umiktinian apujtusmiayi.
7 Nuṉkaya̱tirmesha tura nayantsanmaya̱ uunt yajasmatirmesha
tura uunt wá̱a̱nmaya̱tirmesha Jiuwá shiir awajsatarum.
8 Núnisaṉ peemsha yumi kátsuram ajasusha tura michasha nuyá̱ yuraṉkim nuṉká utsantrumna nútirmesha Ni shiir awajsatarum.
Uunt nase Ni chichame̱n umiria nusha Ni shiir awajsata.
9 Nuyá̱ naintcha naint tépeprasha
núnisaṉ numí nere̱n ainia nusha nuyá̱ sétrusha,
10 kampunniunmaya̱ yajasma ainia nusha
núnisaṉ taṉku ainia nusha japinias yujá ainia nusha,
nanamtin áiniatirmesha Yus shiir awajsatarum.
11 Nuyá̱ úunt akupniusha tura uunt nuṉka mátsatka ainia nusha nuṉkaya̱ uunt ainia nusha
núnisaṉ jú̱ nuṉkanam akupin ainia nusha
12 tura áishmaṉsha nuwa̱sha natsasha
núnisaṉ úuntchisha ashí nuṉkaya̱ matsatutirmesha Jiuwá shiir awajsatarum.
13 Jiuwáa naari̱ shiir awajsatarum.
Warí aya Niṉki naṉkamantu awajsamuiti
tura Ni páantniuri̱ṉkia nayaimpinmasha nuṉkasha ashí awai.
14 ¡Ashí Nin nekas umirainia nuka Jiuwá shiir awajsarti!
¡Israer shuarsha Ni shuar ayamach pujuinia nuka Nin shiir awajsarti!
¡Ni shuari̱n kakarmari̱n súsaiti!
¡Jiuwá shiir awajtai̱ atí!