Yus Kanta
Wáitiakur Yus untsuamu tura wararkur kantampramu
Kantamtikniun ju̱ kanta Tawit áaruiti.
22 Yusru, Yusruá, ¿urukamtai ajapa ikiurkiniam?
¿Urukamtai uwemtikrutskesha tura wi untsumaj nu anturtutskesha imiá arantcha ajaprua iniaitiusum?*
2 Tsawai̱sha tura káshisha untsúakun “Winia Yusru” tájamna nui̱sha peṉké ái̱rtsume.
¡Tura winia ayampratniurka peṉké atsawai!
3 Túrasha Ámeka tunaarinchaitme.
Tuma asam Israer shuar ti shiir awajtámainiamunam pujame.
4 Ii uuntri̱ armia nusha aya Amiiniak nákarmasar enentáimturmainiakui
Amek aṉkant awajsarmiame.
5 Aya Amiiniak yaintkiai tusa seatmainia ásar aṉkant awajnásarmiayi.
Tura Amiiniak enentáimturmainia ásar natsa̱a̱rcharmiayi.
6 Wikia áentschaitjiai antsu aka núnisketjai.
Araantushtaintjiai tura ashí aentsush nakitrámuitjiai.
7 Winia iiriarma nuka wishikrurarmai.
Túrutawar naṉkatuiniak wene̱ja̱i̱ chúchutmasaraṉ muuke̱n pe̱a̱rar chichainiak *
8 “¿Uunt Yusan nekas enentáimtichmaka? Nuke aṉkant awajsati.
Tura shiir enentáimtimia nuke uwemtikrati” turutiarmai.*
9 Tura Ámetme nukuru wake̱ya̱ jurusmiam nu.
Winia nukur tiṉkiamprua takurkauya tímianiaṉ aya Amiin enentáimtikruruitme.
10 Akiiniamiaj nuiṉ Amiin íktusmaujai.
Nukuru wake̱ya̱ṉ Ámeka winia Yúsruitme.
11 Wini̱i̱ya̱ṉka kanakip. Warí winia wáitsatniur ishichik ajasái
tura winia yáintkiatin chíkichkia atsawai.
12 Pasannumia̱ turu kajena núnisar winia nemasrusha kajertuiniak tenta eṉketáwarai.
13 Winia kajertuiniak úunt ya̱wa̱ kajeak
waṉka shiniana núnis waṉka winitruiniawai.
14 Entsa ukartinia núnisaṉ winiasha ukatrarmai.
Winia ukunchur íkiatrainiamusha ukuí ukuiniá ajasármai.
Winia enentái̱rsha mikia núnis initiaṉ kuarmai.
15 Winia kakarmarsha muits iniarámua núnis ju̱ju̱ptin ajatrúsmai.
Winia iniai̱rsha kayakpátrui̱ nujamamai.
Warí jakar ju̱yu̱jyun ajatainiam ikiursamame.
16 Yajauch túrin ainia nu aents ya̱wá̱ núnisar téntatkar eṉketáwarmai.
Túrutawar winia nawernasha tura uwejruncha ajintruawar chiṉkiarturawarmai.
17 ¡Túramu asan Winia ukunchruncha ashí nekapmarminiaitjiai.
Warí peṉké iniaitiutsuk jaka iiru wajarmai!
18 Núnisaṉ winia pushirnasha nuamtak akantrarmai.
Túruiniak pushirun áintkiar yaki jukit tusar nakurúsar awakmáktinian nui̱ nakurúsarmai.*
19 Túrasha Uunt Yusá, Ámeka winia ikiakátniuitme. ¡Wini̱ya̱ṉka arant weep.
Yaintkiamnium wárik taruttia!
20 Puya̱ja̱i̱ mantamnatniunmaya̱ṉka aṉkant awajtusta.
Taṉkú ya̱wá̱ esati mantuawara̱i̱ṉ tusam tsaṉkamprukaip.
21 Úunt ya̱wa̱ wene̱ya̱
tura kampuntin waaka ainia nuna kachurí̱ya̱sha uwemtikruram aṉkant awajtusta.
22 Túruta asakmin Ame náarmin winia yatsurun ujakártatjai.
Kame Yusru, iruntramunam kantampruáttajme.*
23 Uunt Yus ashí arantarmena nútirmeka aya Niṉki shiir awajsatarum.
Kame ashí Israer shuar Jakupa shuari̱tirmeka “aya Amek naṉkamantuitme” tákuram
aya Niṉki nekas umirkatarum.
24 Warí wáitias pujumia nuna
wáitiamuri̱n muí̱jiak nakitiar íitskeka iniaisachmai.
Antsu Ni untsummia núnaka Nisha anturkamai.
25 Ti untsurí iruntramunam wi shiir awajmaka Áminiuiti.
Nuna túrakun Ámin arantúrmainia nu iimiainiamunam “nekas túrattajai” tímiaj núnaka umiktatjai.
26 Túrakui wáitnenmai ajaarma nusha núkap yurumáwar shiir enentáimsartatui.
Tura Uunt Yusan e̱a̱inia nuka Nin shiir awajsártatui.
¡Maa, kame tuke iwiaaku pujusuk tusan wakerajai!
27 Ashí nuṉka náṉkatra tímianaiya̱ Uunt Yusan enentáimtustai tusar weankártatui.
Kame ashí aents ainia nu irunturmarar tikishmátramprartatui.
28 Warí Uunt Yúskete Akupniúka.
Niṉki ashí nuṉkanam akuptiatui.
29 Kame ju̱ nuṉkanam ashí naṉkamantu ainia nusha yurumpruawar Yusan shiir awajsártatui.
Núnisaṉ ashí péejchach jákatniun nérencha ásar niji̱a̱i̱ métek tikishmátrartatui.
30 Kame ukunam pujuartatna nusha nuyá̱ ni tiraṉki̱sha Uunt Yusan umirin ártatui.
Nuyá̱ tuke ujakma átatui.
31 Tura ukunam akiiniawartatna nunasha ujainiak
Uunt Yus uwemtikrampramar nekas péṉkeraitrume turamaji tu ujakártatui.
“¡Maa, Yus mash túrachaik!”*