Yus Kanta
Nemasnumia̱ aṉkant awajkartusu asamtai Yus shiir awajma
Ju̱ kantan Tawit kantamtikniun áatraiti.
21 Jiuwaá úunt akupniuka Ame kakarmarmi̱i̱n enentáimturmas waraawai.
¡Tura Ame uwemtikkiartutairmin enentáimtus urutmatsuk warartama!
2 Akupniu enentái̱ wakeramu Ame súsaitme
tura ni seatmana nuka suritkiachmame. (Séraj)
3 Tí shiir enentáiji̱a̱i̱ iṉkiuṉtajtsam weriniaitme.
Túram tawasap péṉker kuriji̱a̱i̱ najanamu etseṉkrumtikiamame.
4 Iwiaakman seatmakui tí nukap tsawant pujutai̱ súsaitme
tura jáchatai̱ tuke pujutai̱ susamame.
5 Aents Ame uwemtikkiartutairam susam arantumai̱ awajsaitme
tura naṉkamantu péṉker enentáimtutai̱ awajsámame.
6 Péṉker yumiṉji̱a̱i̱ tuke shiir awajsaitme
túram Ame pujurkum waramtiksame.
7 Úunt akupniuka Jiuwá nekas enentáimtawai
tura Ashí Naṉkamantu waitnenkartutairi̱nkia peṉké umuchkiachmin átatui.
8 Ame uwejém ashí nemasrum ainia núnaka jeartiatui.
Núnisaṉ Ámin nakitramainia nunasha untsuur uwejém jeariártatui.
9 Tura kajektintrum tsawantinkia Ame nemasrumka ji ti keek naṉkaamas tsuwé amúa nútikiattame.
Nui̱ Jiuwá kajek nemasri̱n emesrartatui tura ji aesak amukártatui.
10 Nemasrumi uchirí̱ nuṉká matsatainia nuka emestukartatme. Tura ni wea uchirí̱ ukunam akiinkiartatna nusha nútiksamek amukártatme.
11 Warí emestamkataj tusa chichaman jurutrámsarai. Tura Ámin emeskataj tusa chichaman jurutrámainiayat tujintramkartatui.
12 Ame nemasrum yapiniam tukurtaj tusam tíshimkiuram iwiarattame. Túram úkumur ipisrartatme.
13 Jiuwáa, kakarmarmiji̱a̱i̱ Amek uunt awajmamsatá.
Kantamátaji túrakur Ame kakarmaram ti shiir paant awajsattaji.