Yus Kanta

tura winia nemasur ainia nu wararsarat tusam tsaṉkatkacharu asakmin

Amiin shiir awajsattajme.

 2 Uunt Yus winia Yusru Ámin untsukmajme tura tsuaramame.

 3 Uunt Yusa winia wakaniur jaka matsamtainmaya̱ ji̱i̱rkimiame.

Túram jaka iwiartai̱niam akaiki̱i̱ṉ tusam aṉkant awajtúsmame.

 4 Ashí Yusna awajsamu árumna nu Uunt Yus kantampruátarum.

Núnisrum Niṉkia nekas tunaarincha nu enentáimtusrum shiir awajsatarum.

 5 Warí ni kajetáiri̱ṉkia wárik naṉkaamasminiaiti

antsu Ni waitnenkartutairi̱ṉkia aents iwiaaku pujana ímianai awai.

Kame útuka kashi takamtsuk útminiaiti

tura tsawa̱a̱na nui̱kia warasminiaiti.

 6 Tí peṉker pujakun wi chichaakun

“Ju̱ya̱ṉka peṉké muchittianash muchitkiashtatjai” tímiajai.

 7 Warí Ámeka Uunt Yusa Ame waitnentruram winia naintrui̱ kakaram ajas pujusat tusam túraitme.

Túram Ame yapim ú̱kmame túrunawakmin nusháa enentáimpramjai.

 8 Amiin Uunt Yusá untsuktatjame

túran Uuntá seattajme.

 9 Wi jakancha ¿warí peṉkerak ati?

Tura jaka iwiartai̱nium wi jákaitkiuisha nui̱ṉkia nuṉká ju̱yu̱ri̱yash Ame náarmin ¿shiir awajsattuak tura nekasaitmena nunash etserturmaktatuak?

10 Uunt Yusá antukta túram winia waitnentrurta.

Uunt Yus Ame winia yainniua nu ajatrusta.

11 Wi útmarka jantsemátniunmaani̱ Ame yapajtiúrame.

Útkur entsatái̱ pushikia jurutsám waratái pushí áentsrurume.

12 Tuma asamtai winia wakantruka Ámin kantamprútmati tura takamat pujuschati.

Uunt Yus winia Yusru tuke shiir awajtiatjame.*