Yus Kanta
Yus enentáimtusar weamkatin
Ju̱ kantan Tawit kantamtikniun áatraiti.
31 Jiuwaá wikia Ámin enentáimtusan pujá asamtai wíniaka natsan awajtúkam imiamtikruraip.
Nekas túrutairmiji̱a̱i̱ aṉkant awajtusta.
2 Apajá̱sam íirsam anturtukam wárik aṉkant awajtusta.
Ámeka winia ejamtai̱r muchiṉkia núnis ai̱ tusan wakerajai. Tura wíniaka wénuk péṉker iwiartuka utúachmin awajsamua núnis ejatkam uwemtikrurai tusan wakerajai.
3 Ámeka muchiṉ ejatna núnisam wíniaka ejateame.
Ame náaram arantúkma ati jintintruam ewekáttsata.
4 Nekan u̱u̱k aepruttsarainia nuyá̱ jurusta.
Warí Ámeka winia ejatniuitme.
5 Winia wakantrunka Ame waitrukai tusan Amiin ikiuajai.
Jiuwaá Ámeka nekas Yus asam winia sumarkaitme. *
6 Najankamu ántar yusan enentáimtuinia nu aentsnaka muí̱jiainiajai
antsu wikia aya Jiuwan enentáimtusan nákajai.
7 Winia wáitiamur nekartua asaakmin wikia Ame waitnenkartutairmin shiir enentáimsan warastatjai.
Núnisaṉ winia wakaniur jakamnia enentáimmia nekartuaitme.
8 Tura winia nemasrui̱ surutkam iniaitiuschame
antsu aṉkantniunam apujtusmame.
9 Jiuwaá waitnentrurta jakamnia nekapeajai.
Tuma asan nú kuntutsja̱i̱ winia jí̱rusha enentái̱rsha aya̱shrusha amuturkini̱.
10 Winia iwiaakmarka aya najaimiatja̱i̱ṉ amuiki̱ wéawai. Núnisnak núkap uwí úttsanak pujajai.
Winia kakarmarka wi yajauch túrutairja̱i̱n amuiki̱ wéawai. Tuma asa winia ukunchruka kakarmachu ajasárai.
11 Wikia nemasri̱ wishiktai̱ ajasjai.
Núnisnak winí̱ ayamach matsatna nu ashamtai ajasjai núnisaṉ wi nekatai̱ armia nuka ashampruiniawai.
Tura winia wáitin ainia nusha wini̱ya̱ṉka pisainiawai.*
12 Túrasha wikia jakáa núnisnak peṉké kajinmatkimiujai.
Kame muits jakurka ántar ajatsuk núnikmajai.
13 Untsurí aents yajauch áujmatruinian anturmammiajai
túmainiak mantuatai tusar iruntrar chichaman najatruiniakui sapijmiamjai.
14 Túmaitkiuisha Jiuwaá wikia Amiiniak nekas enentáimtajme.
“Winia Yúsruka Ameketme” tájame.
15 Winia iwiaakmaru tsawantri̱nkia Ame ashí wainme.
Tuma asamtai winia nemasur apapétainia nuyá̱ aṉkant awajtusta.
16 Ame takartámin Ame péṉkerumji̱a̱i̱ iisam yaiṉtá
núnismek Ame waitnenkartutairmiji̱a̱i̱ uwemtikrurta.
17 Maa, Jiuwá wi natsan ajaká̱i̱j tusan Ámin untsukjame.
Yusan enentáimtichu ainia nu natsan ajakarti túrawar jakáa matsamtai̱niam Seúrnum wear mitia wáinkiarti.
18 Waantu enentáimtuma ainia nuka péṉker túrin ainia nuna yajauch chicharas nakitín tura tsanumprin ásarmatai nú wait ainia nuka muut awajsarta.
19 Ame waitnenkartutairam naṉkaamas uunta nu Ámin arantúrmainia nuka súsaitme.
Ámin nákarmainia nusha aents iimiainiamunam waitnenkartutairam iniaktusuitme.
20 Áishmaṉ yajauch awajkartustasa chichaman najanainia nuya̱ṉka Áminiuka Ame pujamna nui̱ ejakam ápujeame.
Tura ejamtai̱ je̱a̱nam apujsattame nuyá̱ yajauch chichamtin ainia nuya̱sha péṉker wainkiattame.
21 Pepru wenuke̱ utúachmin awajsamu amuktai tusar áreṉkar pujurmanumia̱ aents túrachminian tura aṉkant awajtus winia waitnentrurmiayi.
¡Tuma asamtai Jiuwá shiir awajsamu atí!
22 Wáurkin chichaakun “Ame íimmianumia̱ ajapamuitjiai” tímiajai.
Tiniu ai̱ṉki wi seamajmena nu anturtukmame.
23 Átum ashí Yusna árumna nútirmeka Jiuwá aneatarum.
Núnisaṉ tímiatrus umin ainia núnaka Jiuwá wáiniawai.
Tura waantu enentáimtuma ainia núnaka ni túramuri̱ji̱a̱i̱ métek asutiáttawai.
24 Átum ashí Jiuwá nákasa pujarmena nútirmeka kakaram ajastarum.
Túrarum atumí enentái̱ ikiaká̱rum wampu enentáimtikratarum.