Yus Kanta
Uunt Yus ni takarniúri̱n shiir wáiniamu
Tawit kantamtikiatniun áaruiti.
40 Wikia Úunt Yusrunka wí neasan enentáimtusan nákasmajai
túram wini̱ni̱ tsuntsumá wi untsukmaj nui̱ṉ anturtukmai.
2 Maa, wá̱a̱nam init tsakusnum pujustinia ántsan ju̱sha itiurak jiinkitiaj tú enentáimpramjai tura wi pujumaj nuyá̱ jurusmai.
Tura kayanam iwiarak atajkiniar iniara̱i̱ tusa initiuschamai.
3 Nuna túruta ii Uunt Yusri̱ shiir awajsatniun yamaram kantan kantamtikruamai.
Túramtai untsurí nuna wáinkiar Uunt Yusan ashamkar enentáimtusartatui.
4 Nin enentáimtus pujana nuka naṉkamantu enentáimtumainia
tura waitniumaani̱ enentáimtiktanash pachincha asa núnaka Uunt Yus waramtikiaiti.
5 Winia Uunt Yusru tí naṉkaamas enentáimkiartusuitme.
Kame aentsti túrachmincha tí untsurí najanaitme.
Warí ashí nu túrunamun etserkattsan wakerimjiai
túrasha étsereakrisha peṉkesha iniaṉnakchamniaiti.
Maa, Ámiji̱a̱i̱ métektakuka chíkichkia peṉké atsawai.
6 Taṉku tura yurumak áestamsha waraatsme.
Warí, ashí áestamusha tunaanka asakárchamnaiti.
Kame umirtukat tusam ántin awajtúsmame.
7 40:7-8 Winia Yusru Ame pénuimiu papirumin Ame akupeamuram winia enentái̱rui̱ aa asamtai nuna umiktinian wakerukuitjiai tu áarmaiti.
Tuma asamtai aarma nuna umíakun winiajai timiajai.*
9 Uunt Yusá, ti untsurí irunar matsatmanum Ame péṉker túramurmin yawe̱tsuk etserkamaj nuka Ámeka nékame.
10 Ame péṉker túriniaitmena núnaka aya winia enentái̱rui̱ni̱ṉ ikiuschaitjiai.
Antsu waitnenkartutairmin nekasa nunasha tímiatrusmek umitiáirmincha
nuyá̱ uwemtikkiartutairmincha ti untsurí irunar matsatmanum ú̱tsuk paant etserkamjai.
11 Uunt Yusá, Ame wáitnenmai enentáimkiartutairmesha
núnisaraṉ waitnenkartutairmesha tura Ame nekasrumja̱i̱ tuke wáitkiarti.
12 Kame yajauch túrutai̱ peṉké nekapmarchamnia téntatkayi.
Winia tunaarusha amaintiúkmatai paṉkaichmin ajakjai
nuyá̱ yajauch túrutairsha intiashruja̱i̱ naṉkaamas ajatrúsmatai jakamnia nekapeajai.
13 Uunt Yusa, aṉkant awajtúsam waitneasam wárik yáintkiata.
14 Túram winia mantuattsa e̱a̱tainia nuka iniatsá̱raram imiamtikrata.
Winia itiurchat ajasat tusa wakerutainia nuka natsa̱a̱r úkumur waketkiarti.
15 Wi natsan ajakmán wakeruinia nú aentsun yapajmiátrukti.
16 Tura ashí Ámin e̱a̱tmainia nuka tuke shiir enentáimtumasar warasarti.
Uwemtikkiartutairmin wararainia nusha tuke iniaitsuk Ámin pachitmasar
“Yuska nekas ashí naṉkamantu awajnásti” turamarti.
17 Wi wáitiakun kúntuts nekapeakuisha winia Uunt Yusruka tuke enentáimtursattawai.
Winia yáintkiam aṉkant awajtinmeka Ámetme.
Tuma asam Uuntá meṉkasa aipia antsu wárik yáintkiata. *